Ձեր վստահելի աղբյուրը

«Մենք ծրագրավորված, հետևողականորեն մեր պայքարն առաջ ենք տանում։ Օրեցօր ավելանում ենք։ Ամեն ինչ գնում է ճիշտ ճանապարհով»,-Ֆրանսիայի հրապարակում հանրահավաքի ժամանակ հայտարարեց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ առանց հուսահատության, ավելորդ զգացումների, հետևողական պայքարով, հենվելով առաջին հերթին սեփական ուժերի վրա՝ այս պայքարը հասցնելու են հաղթական ավարտին։

«Մենք պետք է ապացուցենք՝ Հայաստանի, հայ ժողովրդի, Արցախի ճակատագիրը որոշելու է հայ ժողովուրդը՝ մեկ անգամ ևս հաստատելով, որ Նիկոլը որևէ մանդատ չունի երկիրը նոր զիջումների տանելու»,- ասաց Սաղաթելյանը՝ հավելելով, որ իշխանություններին հեռացելու միակ ճանապարհը հանրային լայն ճնշումն է, երկրում ստեղծել ամբողջական երկիշխանություն։

«Մենք այդ փուլում ենք, և օրեցօր սա ապացուցելու ենք։ Այս պայքարը մեկ օրվա, մեկ մարդու, մեկ կուսակցության, մեկ առաջնորդի շարժում չէ, սա հայ արժանապատիվ մարդու պայքար է։ Հետևաբար այս պայքարին պետք է մաս կազմեն բոլորը՝ անկախ տարիքից, կուսակցական պատկանելիությունից, քաղաքական նախասիրություններից, մասնագիտությունից, գտնվելու վայրից։ Այսօր մենք այդ ընթացքի մեջ ենք։ Նայեք շուրջներդ՝ ուսանողներ,  գիտնականներ, բժիշկներ, գործարարներ, գյուղացի մարդիկ, ովքեր իրենց ամենօրյա աշխատանքը թողել, այսօր այս հրապարակում են, հետևաբար սա համաժողովրդական, համազգային շարժում է»,- ասաց ընդդիմադիր գործիչը։ 

Սաղաթելյանը նշեց, որ հակահայ ծրագրեր իրականացնողները, ապագան մեզանից խլողները դիմադրության պետք է հանդիպեն ամեն տեղ՝ իրենց աշխատավայրում, փողոցում, սրճարանում, արտերկրում։

«Իշխանությունն այլևս որևէ հենարան չունի, միակ հենարանը ոստիկանական բիրտ ուժն է, ամեն օր  տարբեր կեղծ, շինծու մեղադրաքներով փորձում են ապօրինի ձերբակալել ու կալանքի տանել մեր պայքարի ընկերներին»,- ասաց նա։

Սաղաթելյանի փոխանցմամբ, այսօր կալանավորված  իրենց բոլոր ընկերների ուղերձը կալանավայրերից մեկն  է՝ պինդ են, ամուր ենք, իսկ մենք այս գործը պետք է շարունակենք։

«Այս մարդը, իշխանությունը վերջին փրփրուներից են կախված, փորձում են այս ճանապարհով այս պայքարը լռեցնել։ Չի ստացվելու, հետ չենք կանգնելու, նահանջ չկա։ Գործը շարունակելու ենք մինչև վերջ։

Մենք գործ ունենք հայրենադավ, առոթից կառչած իշխանության հետ, բայց մենք հաղթելու ենք, քանի որ միասին ենք։ Բոլոր ճնշումները, սադրանքները մեզ ընդամենը ուժեղացնում են, հետևաբար տեղիք չտաք որևէ բանին։ Մենք ասել ենք՝ սա սրբազան պայքար է, իմացեք ինչքան շատ են հետապնդում, ուրեմն այդ խուճապն ավելի մեծ է։

Ծիծաղեք, բանի տեղ մի դրեք, նրանք այլևս գոյություն չունեն, Նիկոլ չկա»,- ասաց քաղաքական գործիչը։

Ներկայացնելով վաղվա և մայիսի 15-ի անելիքները՝ Իշխան Սաղաթելյանը հայտարարեց, որ մայիսի 14-ին մեծ հանրահավաք ու երթ չեն նախատեսել, այս հարթակը հատկացնում են ծրագրային և բովանդակային քննարկումներին. «Ժամը 13։00-14։00-ին տեղի կունենա մշակութային ծրագիր, ժամը 14։00-ին հանդես կգամ մամուլի ասուլիսով, ժամը 15։00-ին հայտնի մասնագետների մասնակցությամբ տեղի է ունենալու երկրի սոցիալ-տնտեսական վիճակի մասին մեծ քննարկում, խոսվելու է մեր ապագա ծրագրերի, անելիքների մասին, ժամը 16։30-ին տեղի կունենա այլ քննարկում, պրոֆեսիոնալ մարդիկ են հրավիրված լինելու, ովքեր ներկայացնելու են անվտանգության բլուկում երկրում ստեղծված իրավիճակն ու անելիքները, ժամը 18։00-ից հետո տեղի է ունենալու մշակութային ծրագիր։

Մայիսի 15-ին ժամը 18։00-ին այս հրապարակում հրավիրում ենք համահայաստանյան մեծ հանրահավաք»։