Ձեր վստահելի աղբյուրը

Panorama.am - Տարիներ առաջ, երբ ես եկա հիվանդանոց Ձեզ տեսնելու, ասացիք՝ մի նկարեք, որ թուրքն այսպես ինձ չտեսնի...  Այդ օրվանից, անընդհատ, թուրքը Ձեզ տեսել է միայն հաղթած՝ էլ լեռնագնացություն, էլ լող, էլ բազկամարտ ու՝ Դուք բազկամարտի Եվրոպայի, աշխարհի չեմպիոն։  Ի՞նչն է ավելի շատ  ձեզ առաջ մղում հաղթանակների՝ հանուն մարդու, թե՞ ի հեճուկս թուրքի։
 

Սարգիս Ստեփանյան- Հայ տեսակը հաղթող տեսակ է։ Միշտ ասում եմ՝ մեր հայոց բանակը, հայ զինվորը չի պարտվել։ Մենք քանի ողջ ենք, պետք է հաղթենք տարբեր հարթակներում՝ սպորտի, կրթության, պատերազմի։ Մենք մեր տեսակը պետք է ցույց տանք։ Ես այդ տեսակի մեջ եմ։ Քանի Աստված առողջություն տա, ողջ լինենք, փորձելու եմ տարբեր ոլորտներում հաղթող ճանաչվեմ ու նույն հաջողությամբ իմ թիմը, իմ երեխաները, իմ ընկերները, որովհետև մենք նույն գաղափարով ենք շարժվում։

Ես որևէ մեկին ցույց տալու համար չեմ անում,  մենք մեր տեսակն առհասարակ ամեն օր պետք է ցույց տանք։
 

Panorama.am - Հիմա արդեն Ձեր որդին՝
Վարդանն է մասնակցում Բազկամարտի Եվրոպայի առաջնությանը։

Ի՞նչ արդյունքներ է  գրանցել։  

Ինչո՞ւ հենց բազկամարտ։ 

Դո՞ւք եք մարզում իրեն։ 

Ի՞նչ խորհուրդներ եք տալիս մրցումներից առաջ Ձեր որդուն։ 
 

Սարգիս Ստեփանյան - Իմ տղան արդեն 17 տարեկան է։ Բազկամարտի Եվրոպայի առաջնությանում հանդես եկավ։ Բավականին լուրջ մրցապայքարներով անցավ ու զբաղեցրեց երրորդ հորիզոնականը։ Ինչո՞ւ հենց բազկամարտ։ Երևի թե, որ ես բազկամարտով զբաղվեցի, հետս եկավ մարզադահլիճ, սեր առաջացավ և ցանկացավ նմանվել հայրիկին։ Իր մարզիչն իր հորեղբայրն է՝ Գևորգ Ստեփանյանը։ Ես էլ եմ իրեն ուղղություններ, խորհուրդներ տալիս։ Բացի մարզական խորհուրդներից, որ ճիշտ մարտավարություն վարի, որպեսզի հաղթող ճանաչվի, նաև՝ լավ մարդ դառնա, պիտանի լինի իր ազգին, ծառայի իր հայրենիքին, անմնացորդ նվիրվի հայրենիքն, սիրի իր ժողովրդին։

Panorama.am - Այնքան ենք սովորել Ձեր նորանոր հաղթանակներին, անընդհատ առաջընթացին, որ դա արդեն չի էլ զարմացնում։ Նույնիսկ արդեն ենթագիտակցաբար պատերազմից վիրավորումներով դուրս եկած մեր երիտասարդներից ենք սպասում նույնը։  Գիտենք՝ խորհորդներով ու ներկայությամբ նրանց կողքին էլ եք։ Ի՞նչ եք անում հիմա, ի՞նչ նպատակներ ունեք նրանց ու Ձեզ համար։



Սարգիս Ստեփանյան - Բուխարեստում անցկացվում է հաշմանդամային բազկամարտի Եվրոպայի առաջնությունը, մեծ թիմով այնտեղ ենք։ Ունենք վիրավոր տղաներ, ովքեր առաջնությունում արդեն տարբեր հորիզոնականներ են զբաղեցրել։ Մեր նպատակն է՝ առողջ ապրելակերպ, առողջ գաղափարով մտածել, շարժվել և հաղթել, շարունակել ողջ մարդուն վայել ապրել, հպարտ ապրել, հայի կեցվածքը պահել, ոչ թե նվնվալ։ Շոտով նոր մարզասրահ կունենանք։ Մեր նպատակներից  է շրջաններում էլ բացենք մարզասրահներ։ Փոքրիկ-փոքրիկ քայլերով ոտքի կանգնենք ու մեր տեսակը ցույց տանք։





 

Panorama.am - Շնորհակալություն հարցերին պատասխանելու համար։

Սարգիս Ստեփանյանը 2014 թվականի ամռանն Արցախի պաշտպանական շրջաններից մեկում հակառակորդի դիվերսիոն գործողությունը հետ մղելիս վիրավոր ծառայակից ընկերոջ մարմինը ականապատված տարածքից հանելու ժամանակ վիրավորվել էր ականի պայթյունից՝ կորցնելով երկու ոտքն ու ձեռքը։ Վիրավորումից ամիսներ անց նա ոտքի կանգնեց, սկսեց քայլել ու զբաղվել սպորտով։

ՀՀ ԶՈւ փոխգնդապետ, «Արիության համար» մեդալակիր, հաշմանդամություն ունեցողների բազկամարտի Եվրոպայի առաջնության կրկնակի չեմպիոն, աշխարհի առաջնության եռակի չեմպիոն Սարգիս Ստեփանյանն իր քայլերով, հաջողություններով ցույց է տալիս՝ երբեք չպետք է հանձնվել, պետք է առաջ գնալ ու հասնել նպատակին։ Նա բոլորին է հիացնում իր կամքի ուժով, հերոս, ում կողքին ապրելու համար անգամ հպարտ ենք...