![](https://panorama.am/news_images/903/2707593_1/293966958_1627541334306593_4628770205474379989_n.thumb.jpg)
Բյուրականյան գիտաճամբար արցախցի դպրոցականների համար
Բյուրականի աստղադիտարանում (ԲԱ) մեկնարկեց «Բյուրականյան գիտաճամբար արցախցի դպրոցականների համար» ամառային ծրագիրը։ Ճամբարը կազմակերպվել է Բյուրականի աստղադիտարանի ջանքերով և ամերիկահայ աստղագետ Նորա Անդրեասյանի աջակցությամբ:
Աստղադիտարանից հայտնում են, որ այն կտևի մինչև հուլիսի 18-ը, որի ընթացքում մասնակից 23 երեխաները (Շուշիի, Մարտակերտի, Պատարայի, Ճարտարի և Սարգսաշենի դպոցներից) ձեռք կբերեն նոր գիտելիքներ և կանցկացնեն հետաքրքիր ժամանակ։
Գիտաճամբարի շրջանակներում դպրոցականների համար զրույց-դասախոսություններով հանդես կգան ԲԱ տնօրեն Արեգ Միքայելյանը («Վիկտոր Համբարձումյանը և Բյուրականի աստղադիտարանը»), ավագ գիտաշխատող Հովհաննես Պիկիչյանը («Տիեզերքի մասին պատկերացումների զարգացումն անտիկ շրջանից մինչև մեր օրերը»), գիտաշխատող Հայկ Աբրահամյանը («Արեգակնային համակարգ»), ՀՀ ԳԱԱ Ա. Նազարովի անվան երկրաֆիզիկայի և ինժեներային սեյսմաբանության ինստիտուտի տնօրեն Ջոն Կարապետյանը («Հայաստանի սեյսմիկ քարտեզը»), ՀՀ ԳԱԱ Պատմության ինստիտուտի գիտաշխատող Կարեն Թոխատյանը («Հայոց նախնյաց աստղագիտական գիտելիքը ժայռապատկերներում»), ԲԱ գիտաշխատող Նաիրա Ազատյանը («Աստղերի աշխարհում») և ԲԱ գիտաշխատող Գուրգեն Պարոնյանը («Գալակտիկաների աշխարհում»)։
Ինչ վերաբերում է գործնական պարապմունքներին, երեխաները կմասնակցեն ռոբոտաշինության դասընթացի և տարբեր ինտելեկտուալ խաղերի, ինչպես նաև կսովորեն արձակել հրթիռներ։
Աստղադիտարանին ավելի մոտից ծանոթանալու համար դպրոցականներն կայցելեն Վիկտոր Համբարձումյանի տուն-թանգարան և 2.6մ աստղադիտակ, իսկ երեկոյան ժամերին կմասնակցեն աստղադիտման։ Կլինեն նաև այցելություններ տարածաշրջանի մի շարք տեսարժան վայրեր՝ Հայաստանի պատմամշակութային ժառանգությանը ծանոթանալու նպատակով։
Լրահոս
Տեսանյութեր
![ԱՆԻՖ-ի գործով Ավինյանը Քերոբյանի հայտարարությունը սուտ որակեց](https://panorama.am/video_images/17/50276_1/f66a0f86157c73_66a0f86157cb2.png)
![Կոնկրետ թիրախավորված է Գերասիմ Վարդանյանը. Փաստաբան](https://panorama.am/video_images/17/50265_1/f669fa592e5df9_669fa592e5e49.jpg)