Մինչև հիմա քանի՞ դավաճանի են գնդակահարել. զոհված զինծառայողների ծնողները ՊՆ-ի մոտ իրենց հարցերի պատասխանին են սպասում
Պաշտպանության նախարարության շենքի մոտ բողոքի ակցիա են իրականացնում 44-օրյա պատերազմում զոհված զինծառայողների ծնողները։ Նրանց պահանջը մեկն է՝ պարզել, թե ինչպես և ինչ հանգամանքներում են զոհվել իրենց որդիները, իսկ նրանց հրամանատարները ողջ են մնացել։
Ժամկետային զինծառայող Ժորա Սահակյանը զոհվել է 2020 թ-ի հոկտեմբերի 30-ին Մարտունիում։ Նրա հետ զոհվել են նաև զինակից 19 ընկերները։
Ժորայի հայրը՝ Վահե Սահակյանը նշեց, որ չորրորդ անգամ են հավաքվում նախարարության մոտ։ Ըստ նրա՝ առաջին անգամ ծնողները հանդիպել են փոխանախարար Արմեն Սարգսյանի հետ, որի ընթացքում բարձրացրել են մի շարք հարցեր, որոնք մինչև օրս անպատասխան եմ մնացել։
«Մեր տղաները զինակոչվել են 2019 թվականին, ծառայել են 5-րդ պաշտպանական շրջանում։ Պատերազմի ժամանակ 27 օր տղաները կռվել են Մարտակերտ-Մատաղիս հատվածում, հոկտեմբերի 23-ին գումարտակը տեղափոխվում է Մարտունի 2։ Մեկ գիշեր մնալով Գիշի գյուղում նրանց բարձրացնում են Մարտունի 2-ի դիրքեր։ Հիմա հարց ենք բարձրացնում, թե ում հրամանով է գումարտակը տեղափոխվել Մարտունի, քանի որ դա նրանց համար անծանոթ տարածք էր, նույնիսկ այդ մասին ասել է գումարտակի հրամանատարը, որ իր համար ևս տարածքն անծանոթ է։ Մեր տղաները մարտնչել են բաց երկնքի տակ, չի եղել որևէ խրամատ, պաշտպանական որևէ կառույց։ Այդպես նրանք պաշտպանվել են մինչև հոկտեմբերի 30-ը։
Հոկտեմբերի 27-ին զոհվել է վաշտի հրամանատար Սուրեն Վահանյանը, լավագույն հրամանատարներից մեկը, որից հետո մեր տղաները մնում են առանց հրամանատարի։
Տղաները կռվում են մինչև վերջ, վերջին զինվորը զոհվել է հոկտեմբերի 30-ին։ Երբ թուրքերը տեսնում են, որ չեն կարողանում դիրքը գրավել, հետ են նահանջում և սկսում է արտիլերիան աշխատել, վերջում էլ ռումբ են գցել։ Տղաներն անճանաչելի էին, ես նույնիսկ չեմ ուզել տեսնել, թե արկղի մեջ ինչ են դրել, ես ուզել եմ իմ տղայի դեմքը հիշել այնպես, ինչպես իր կենդանության օրոք։ Մարդիկ կորցրել են իրենց ամենաթանկը և այսօր երեք ժամ պաշտպանության նախարարության դիմաց կանգնած որևէ բարձրաստիճան պաշտոնյա չէր ուզում մեզ ընդունել»,- ասաց Վահե Սահակյանը։
Նա նշեց, որ միայն երեք ժամ հետո հանդիպել են մեկ գնդապետի հետ, որը խոստացել է 2-3 օր հետո իրենց հարցերին պատասխանել, հանդիպում կազմակերպել հրամանատարի հետ, սակայն վստահ չէ, թե որքանքով դա ճիշտ կլինի։
Վահե Սահակյանի խոսքով՝ եթե ՊՆ-ն խոստումը չկատարեց, ապա ծնողները կորոշեն իրենց հետագա անելիքները։ «Այն, որ մենք պետք է քայլեր ձեռնարկենք, դա միանշանակ է։ Մենք չենք կարողանում քնել, ուտել, խոսել, երեխաների նկարներին ամեն անգամ նայելով ասում ենք, որ որևէ ծնող, այդ թվում՝ ես, չկարողացավ իր որդուն օգնություն ցույց տալ։ Մեկ-մեկ ինձ մեղադրում եմ, ասում եմ՝ կարող է մենք ենք սխալ դաստիարակել մեր երեխաներին, որ հայրենիքի համար զոհեցին ամենաթանկը՝ իրենց կյանքը, բայց հետո ասում եմ, որ այդպես չէ, մենք ճիշտ ենք դաստիարակել, պարզապես պետությունը չգնահատեց նրանց։ Սա է ցավալին»,- նշեց Վահե Սահակյանը։
Նա նաև ասաց, որ մինչև օրս չգիտեն, թե ինչ համգամանքներում են զոհվել իրենց տղաները, հիմա դա են ուզում պարզել։
«Քրեական գործ կա հարուցված, բայց չկա դատապարտված որևէ անձ։ Ասում են՝ դավաճանության դեպքեր են հայտնաբերել, բայց քանի՞ դավաճանի են գնդակահարել։ Այս հարցերի պատասխանները մենք պետք է ստանանք։ Մենք պետք է հանդիպենք հրամանատարի հետ, եթե ինքը մեղավոր չէ, ապա թող անուններ տա՝ ովքեր են մեղավորները»,- նշեց Վահե Սահակյանը։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
