Ձեր վստահելի աղբյուրը

Երևան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, շարունակվում է  «Համախմբում» շարժման անդամ, հասարակական-քաղաքական գործիչ Ավետիք Չալաբյանի գործով  նախնական դատալսումները։

Պաշտպան Արթուր Հարությունյանն ասաց, որ մեղադրական եզրակացությունը պաշտպանական թիմի կողմից մանրակարիտ ուսումնասիրվել է,  արձանագրվել, որ քննիչ կողմից կազմված և դատախազ Արմեն Բեգլարյանի կողմից հաստատված մեղադրական եզրակացության մեջ կան թերություններ, բացթողումներ խեղաթյուրումներ։

«Անգամ իրավաբանական բարձր գիտելիքներ չունեցող մարդու մոտ կասկած չեն թողնում առ այն, որ կազմված մեղադրական եզրակացությունը չի համապատասխանում Քրեական դատավարության օրենսգրքի 202–րդ հոդվածի պահանաջներին, հետևաբար այս հիմքով այս դատական նիստը ենթակա է հետաձգման, իսկ դատարանը պարտավոր է հանրային  մեղադրողին պարտավորեցնել դատարանի սահմանաված ժամկետում մեղադրական եզրակացությունը համապատասխանեցնել Քրեական օրենսգրքի 202-րդ հոդվածի պահանաջներին  և միայն հետո այն ներկայացնել դատարան»,- ասաց պաշտպանը՝ միջնորդություն ներկայացնելով սույն դատական քննությունը հետաձգել մեղադրական եզրակացությունը շտկելու համար։ 

Ավետիք Չալաբյանն ասաց, որ այստեղ հավաքվել են արդար դատաքննության համար, Հայաստանի քաղաքացիներին ի վերջո հետաքրքրում է ճշմարտության բացահայտումը, ինչը ենթադրում է, որ  դատավարության բոլոր մասնակիցները պետք է գործեն իրենց վերապահված իրավասության շրջանակում։

«Նախորդ նիստին, երբ ես ասացի այս ամեն ինչի մեջ քաղաքական հետապնդում եմ տեսնում, դատախազը բողոքեց, ասաց, որ ամեն ինչ արվել է օրենքի շրջանակներում։ Բայց երբ կարդացի այս մեղադրական եզրակացությունը, ինձ մոտ այնպիսի զգացողություն է, որ  այն ծայրահեղ միտումնավոր է կազմված։

Ձայնագրության  վերաբերյալ գործի նյութերում ունենք փորձագիտական  եզրակացություն,  ամբողջ ձայնագրության բառ առ բառ  վերծանություն, որը հստակ տարանջատում է  իմ խոսքը խոսակցության ուրիշ  մասնակիցների խոսքից, ցույց է տալիս, որ ոչ ցույցների կազմակերպման, ոչ նյութական խրախուսաման,  և որևէ  արտահայտություն ես չեմ արել։  Այդ վերծանությունը մեղադրական եզրակացության մեջ տեղ չի գտել, դրա  փոխարեն տեղ է գտել ոչ մասնագիտական զննությունների երկու արդյունք, որոնք  իրար կրկնում են։

Հարց եմ տալիս, եթե այս մեղադրական եզրակացությունն իսկապես միտումնավոր չէ,  իմ մեղքը ծանրացնելը չէ, իմ անմեղությունը թաքցնելը չէ, ինչո՞ւ այդ վերծանությունը տեղ չի գտել»,- հարցադրում արեց Չալաբյանը։

«Դատալեքս»-ում հրապարակված մեղադրական եզրակացության համաձայն. «Ավետիք Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար»:

Այս գործով անցնում է նաև Էմմա  Սարգսյանը, ում՝ «մեղադրանք է առաջադրվել այն բանի համար, որ նա 2022 թվականի մայիսի 4-ին Երևան քաղաքի Աբովյան 12 հասցեում գտնվող՝ «Դալան» ռեստորանում, այնուհետև մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում նշված համալսարանի ուսանողական խորհրդի նախագահ Թոռնիկ Ալիյանին և նրա միջոցով Հայաստանի ազգային ագրարային համալսարանի ուսանողական խորհրդի անդամներին ու համալսարանի ուսանողներին ՀՀ-ում «Դիմադրություն» և «Համախմբում» շարժումների հավաքներին՝ անհնազանդություններ, բողոքի ակցիաներին, ցույցերին, փողոցներ փակելու գործողություններին մասնակցելու նպատակով դիտավորությամբ նյութապես շահագրգռել է՝ առաջարկելով 2.000.000 ՀՀ դրամ գումար»: