Վահագն Թումասյանի ծննդյան օրն է՝ հանուն Հայաստանի և Արցախի պաշտպանության ապրած և անմահացած հերոս
Այսօր փոխգնդապետ, հետախույզ Վահագն Թումասյանի ծննդյան օրն է։ Նա զոհվել է 2020 թվականի հոկտեմբերի 12-ին:
«Վահագն Թումասյանը (1981-2020) հանուն Հայաստանի Հանրապետության և Արցախի պաշտպանության ապրած և անմահացած հերոս է։ Պատմաբան, ռազմագետ, հետախույզ, փոխգնդապետ Վահագն Թումասյանն իր կյանքի ճանապարհն անցել է՝ յուրաքանչյուր բնագավառում դրսևորելով առավելագույն պատասխանատվություն, ինքնակատարելագործման անկոտրում կամք, անդուլ աշխատանք, խորին հարգանք ազգային արժեքների նկատմամբ։
Փայլուն տիրապետել է թուրքերենին և ադրբեջաներենին, մի քանի սպորտաձևերի չեմպիոն է եղել։ 44-օրյա պատերազմի ժամանակ առաջինն է հայտնաբերել արաբ վարձկաններին և նրանցից փաստաթղթեր առգրավել՝ ապացուցելով, որ հայոց բանակի դեմ կռվում են ծայրահեղ իսլամիստ վարձկանները։ Ճեղքել է թշնամու զորքը և շրջափակումից դուրս բերել 82 զինվոր։ Վահագնի կյանքը սխրանքների և խիզախումների փառահեղ ուղի է եղել, մահը՝ հերոսացման վերջին գործողություն։
Զոհվել է 2020 թվականի հոկտեմբերի 12-ին՝ մարտական առաջադրանքը կատարելիս։ Ռազմական գործի լավագույն գիտակ, անհավանական ունակությունների տեր մարդ, անվեհեր մարտիկ, ուղնուծուծով հայրենասեր, ազգային հերոսի կերպար․ այսպես են ճանաչողները նկարագրում 39-ամյա փոխգնդապետ, հետախույզ Վահագն Թումասյանին։ Վահագն Արամի Թումասյանը հետմահու արժանացել է «Մարտական խաչ» առաջին աստիճանի շքանշանի։
ԵՊՀ պատմության ֆակուլտետում գործում է Վահագն Թումասյանի հիշատակին նվիրված «Ոսկի սերմեր․ երախտիքի և հարգանքի կրթամրցանակ», նրա անունով բացվել է լսարան։
«Այսպիսի լսարանում կրթված ուսանողներն ունենալու են այն նույն ոգին ու հայրենասիրությունը, որ ունեին Վահագնն ու իր ընկերները և շարունակելու են նրանց կիսատ թողած գործը»,-Էդիկ Մինասյան, ԵՊՀ պատմության ֆակուլտետի դեկան։
«Նա անմնացորդ նվիրված էր Հայրենիքին ծառայելու գործին: Դա նրա գերակա նպատակն էր, մնացածը` վտանգներ, սպառնալիքներ, ստորադասվում էին։ Վստահ եմ, որ հաջորդ սերունդների հերոսների ընդօրինակման առարկան լինելու են Վահագն Թումասյանը և 44-օրյա պատերազմի մյուս հերոսները»․- ասել է ԵՊՀ արևելագիտության ֆակուլտետի դեկան Ռուբեն Մելքոնյանը։
«Վահագնը մեր ընտանիքի ազնվազարմ շառավիղներից էր, մեր հպարտությունը, որ կատարեց իր պարտքը Հայրենիքի առջև՝ հանուն իր գործի մնայունության», - ասել է Վահագն Թումասյանի հայրը՝ Արամ Թումասյանը։
Վահագն Թումասյանի տևապես կատարելագործված, հիրավի օրինակելի սպայական ծառայությունը և վճռական պայքարում ռազմական գիտելիքն ու անձնազոհ նվիրումը լավագույնս մեկտեղած նրա սխրանքը հերոսականության բարձր օրինակ են, արժանի՝ պետական գերագույն գնահատականին և իր ժողովրդի մեծագույն երախտագիտությանը։
«Նրանց թաղեցին, բայց չգիտեին, որ նրանք սերմեր են»։
Մեր խոնարհումը Վահագն Թումասյանի ծնողներին՝ Մարիամ Թումասյանին և Արամ Թումասյանին»,- ֆեյսբուքյան էջում գրել է «Հայ Ձմեռ պապ» բարեգործական հիմնադրամի տնօրեն Արմինե Պետրոսյանը։
Հարակից հրապարակումներ`
- Փոխգնդապետ Վահագն Թումասյանին ՀՀ ազգային հերոսի կոչում շնորհելու վերաբերյալ գրությունն ուղարկվել է ՊՆ
- «Ոսկե սերմեր» կրթամրցանակ. Տասնյակ զինվորների կյանքը փրկած հետախույզ Վահագն Թումասյանի հիշատակին
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին