Ձեր վստահելի աղբյուրը

Արցախի Հանրապետության խորհրդարանի քաղաքական բոլոր ուժերի նախաձեռնությամբ մեկնարկել է Ազգային ժողովի արտահերթ նիստ և հանրահավաք՝ նվիրված Արցախի Հանրապետության  արժանապատիվ ու անվտանգ ապագային: Նիստն ուղիղ հեռարձակմամբ ցուցադրվում է Ստեփանակերտի Վերածննդի հրապարակում միաժամանակ հրավիրված մեծ հանրահավաքի առջև:

Նիստին ներկա է 33 պատգամավոր։

ԱԺ նախագահ Արթուր Թովմասյանը հայտարարեց, որ բացակա չկա, «այդպես էլ պետք է լիներ»։

«Արցախը հայկական պահելու, Արցախի Հանրապետության ժողովրդի ինքնորոշման իրավունքը իրացնող  հանրահավաքի ամենակրտսեր, ամենատարեց մասնակից, արցացխի՝  սա քո հանրահավաքն, է սրա կազմակերպիչը դու ես։ Սիրելի հայրենակից, եթե այս պահին տանն ես, շտապիր քո  տեղը զբաղեցնել Վերածննդի հրապարակում, քո խաղաղասեր խրամատում, սա նաև քո հանրահավաքն է»,- ասաց  ԱԺ նախագահը։

Նա խոսքն ուղղեց աշխարհի բոլոր երկրների առաջնորդներին, մասնավորապես՝ ՌԴ, ԱՄՆ, Ֆրանսիայի, Իրանի նախագահներին, ժողովուրդներին՝ նշելով, որ այս փոքրիկ աշխարհատարածքն իրենից վտանգ չի  ներկայացնում, բայց վտանգված է Արցախի ժողովրդի լիարժեք ապրելու և գոյատևելու իրավունքը. «Որպեսզի արցախցին ապրի, արարի, ստեղծագորի իր հայրենիքում, ճանաչեք նրա ինքնորշման իրավունքը։

Հայ ժողովրդի հավաքական ապագան այսօր որոշվում է նաև Արցախում։ Դիմում եմ ողջ հայ ժողովրդին՝ միասնաբար նեցուկ կանգնել արցախահայությունը, շարունակել աջակցել նրա ազատագրական պայքարին, հասնել նրա ինքնորոշման իրավունքի լիակատար իրացմանը։ Այսօր հայոց պետականությունը կանգնած է ազգային ինքնության և լինելությանը  սպառնոցող լուրջ վտանգների առջև։ Այսօր է, որ առավել քան երբևէ հայ ժողովուրդը պետք է շարունակի գործել միասնաբար, միաբան։

Ադրբեջանի ռազմաքաղաքական ղեկավարության հավականությունները մեր հայրենիքի նկատմամբ զուրկ են պատմական, իրավական բարոյական հիմքերից, քանզի Արցախը երբեք անկախ Ադրբեջանի մաս չի եղել և չի կարող լինել։

Ներկա դրությամբ առաջնահերթ խնդիրը երկրի հուսալի անվտանգության ապահովումն է, որն իրականացում է  ՌԴ խաղաղապահ զորակազմը, Արցախի պաշտպանության բանակի ուժերը։
Մենք շարունակելու ենք մեր ջանքերը Արցախի ժողովրդի ինքնորոշման և անվտանգության համար մղված արցախյան ազատամարտի արդյունքների պաշտպանության խնդրի խաղաղ և արդարացի լուծմանը հասնելու ուղղությամբ»։

Շարունակելով իր խոսքը՝ նա ընդգծեց. «Լիահույս ենք, որ հոկտեմբերի 31-ին Սոչիում կայանալիք եռակողմ հանդիպմանը չի ստորագրվի այնպիսի փաստաթուղթ, որը կարող է անտեսել արցախյան հիմնախնդրի գոյությունը, հարվածի տակ դնել արցախյան հիմնախնդրի կարգավորման հեռանկարը,  և սսահմանափակել Արցախի ժողովորդի ինքնորոշման իրավունքի իրացումը»։

Այնուհետև Արցախի ԱԺ պատգամավորները մեկ րոպե լռությամբ հարգեցին արցախյան գոյապայքարի և Հայաստանի սահմանների պաշտպանության համար նահատակված քաջորդիների հիշատակը։

«Արցախը եղել է, կա ու լինելու է»,- իր ելույթն ավարտեց Ա. Թովմասյանը։

Նիստից անմիջապես հետո ելույթները կշարունակվեն Վերածննդի հրապարակում հրավիրված հանրահավաքում:

Հիշեցնենք, որ հոկտեմբերի 31-ին Սոչիում կայանալու է Պուտին-Փաշինյան-Ալիև եռակողմ հանդիպում։