ԱԱԾ փոխտնօրենը խեղաթյուրեց պատասխանը. Արծվիկ Մինասյան
«ԱԱԾ-ից կոչնչացվեն այն փաստաթղթերը, որոնք պետք է ոչնչացվեն, մտահոգվելու շատ բան չունենք»,-ԱԺ արտահերթ նիստում «Ազգային անվտանգության մարմինների մասին» օրենքում փոփոխություններ և լրացումներ կատարելու մասին նախագծի քննարկմանն ասաց «Քաղաքացիական պայմանագիր» խմբակցության պատգամավոր Անդրանիկ Քոչարյանը։
Նրա խոսքով, երևույթները չեն կարող ոչնչացնել, քանի որ դա եղել է, արձանագրված է ամենուր։
Հիշեցնենք, որ առաջարկվում է. «Լիազորված մարմնի արխիվի նյութերը գաղտնազերծվում կամ ոչնչացվում են օրենքով և այլ իրավական ակտերով սահմանված կարգով»։ Իսկ 2001 թ. օրենքում գրված է. «Լիազորված մարմնի արխիվի նյութերը գաղտնազերծվում են օրենքով սահմանված կարգով»:
Հարցի հիմնական զեկուցող ՀՀ ազգային անվտանգության ծառայության տնօրենի տեղակալ Անդրանիկ Սիմոնյանն իր եզրափակիչ ելույթում ասաց. «Ընդդիմադիր պատգամավորների նկատմամբ ամենայն հարգանքով, սակայն լիահույս եմ, որ ելույթ ունեցող ընդդիմադիր պատգամավորներից որևէ մեկը իրավաբանական կրթություն չուներ։ Չեղած տեղն աղմուկ բարձրացնելու որևէ խնդիր չկա, քանի որ նրանց բարձրաձայնած հարցերն արդեն իսկ կարգավորված են դեռևս 1996 թվականին ընդունված Պետական և ծառայողական գաղտնիքի մասին օրենքով, հոդվածներ 15, 16, որտեղ նախատեսվում են ինչպես ոչնչացման ենթակա նյութերի պահպանման ժամկետները, դեպքերը, 2002 թ., փետրվարի 22-ին ՀՀ կառավարության ընդունած որոշմամբ, որով նախատեսում է պահպանման ժամկետները լրացած, պետական և ծառայողական գաղտնիք կազմող գաղտազերծված տեղեկությունները պետական արխիվ հանձնելու կամ տեղեկությունները ոչնչացնելու կարգը։ Այսինքն, որևէ խնդիր այս պահին չկա»։
ԱԺ փոխնախագահ Ռուբեն Ռուբինյանը հետաքրքրվեց. «Այսինքն, նոր կարգավորումների արդյունքում չի լինելու փաստաթուղթ, որը նախկինում հնարավոր չէր առանց գաղտնազերծելու ոչնչացնել, իսկ հիմա հնարավոր է»։
Անդրանիկ Սիմոնյանն ասաց. «Այո։ Օրենսդրական փաթեթը ներկայացվել է գործող օրենսդրությանը ներդաշնակեցնելու խնդրով պայմանավորված։ Այսինքն, որևէ նոր բան չի լինելու այս օրենքի ընդունման արդյունքում, ինչը որ չէր կարող լինել մինչև այս կարգավորումները»։
Մինչ «Ազգային անվտանգության մարմիններում ծառայության մասին» օրենքում փոփոխություններ և լրացումներ կատարելու մասին և «Ազգային անվտանգության մարմինների մասին» օրենքում փոփոխություններ և լրացումներ կատարելու մասին օրենքերի նախագծերի փաթեթն առաջին ընթերցմամբ ընդունելու մասին հարցի քվեարկությունը, «Հայաստան» խմբակցության քարտուղար Արծվիկ Մինասյանն անդրադարձավ Ա. Սիմոնյանի եզրափակիչ ելույթին. «Նախ արձանագրեմ, որ «Հայաստան» խմբակցությունում բազմաթիվ են իրավաբանական կրթություն ստացած անձինք, այդ թվում նաև ես, ի տարբերություն պարոն Սիմոնյանի, կրթությունը ստացել ենք ԵՊՀ իրավաբական ֆակուլտետի բարձրակարգ դասախոսների մոտ և հենց այդ ուժով ենք հնչեցնում հարցադրումները։
Ռուբեն Ռուբինյանը հարցադրում հնչեցրեց, բայց պատասխանը նորից խեղաթյուրվեց։ Անդրանիկ Սիմոնյանի վկայակոչած իրավական ակտերում խոսվում է ոչնչացման հնարավորության մասին միայն գաղտնազերծումից հետո, իսկ ներկայացված նախագծով առաջարկվող այս ձևակերպման ներքո՝ գաղտնազերծվում կամ ոչնչացվում է, ստացվում է, որ նյութը կարող է ոչնչացվել առանց գաղտնազերծման»։
Նախագծերի փաթեթն առաջին ընթերցմամբ ընդունվեց՝ 60 կողմ, 29 դեմ, 0 ձեռնպահ ձայների հարաբերակցությամբ։
ՔՊ խմբակցության պատգամավոր Վիլեն Գաբրիելյանն առաջարկեց «Հայաստան» խմբակցության պատգամավորներին մասնակցել հանձնաժողովի նիստին ու ներկայացնել իրենց առաջարկությունները. «Միգուցե դուք ճշմարիտ եք ձեր հիմնավորումներով։ Հորդրում եմ՝ եկեք հանձնաժողովի նիստին, եթե ճիշտ եք, այդ խնդիրը կշտկենք»։
Արծվիկ Մինասյանն արձագանքեց, որ իրենք իրենց առաջարկություններն անպայման կներկայացնեն։
Հարակից հրապարակումներ`
- Հարցեր են առաջանում, երբ ԱԱԾ արխիվում պահվող չգաղտնազերծվող փաստաթղթեր են ոչնչացվում. Արթուր Խաչատրյան
- Մինասյան. ԱԱԾ արխիվների ոչնչացման քայլով նաև լուրջ կասկածներ են առաջանալու հանրության մոտ
- Ինչո՞ւ են ցանկանում ոչնչացնել ԱԱԾ նյութերը. Քննարկում են սոցցանցերը
- Արտահերթ նիստով ԱԱԾ-ին կամ այլ անձանց տրվում է իրավունք ոչնչացնել հսկայական արխիվներ. Գեղամ Մանուկյան
- Օրենքով նախատեսվում է ԱԱԾ արխիվից փաստաթղթերի ոչնչացման հնարավորություն, խնդիրն ինչո՞ւմն է. ԱԱԾ փոխտնօրեն
- Արխիվում այդ ի՞նչ թուղթ կա, որ պետք է այսպես հրատապ ռեժիմով որոշվի, որ պետք է վերացվի. Արթուր Խաչատրյան
- Այսօր կգումարվի ԱԺ արտահերթ նիստ