Ձեր վստահելի աղբյուրը

«Ես ու դուք մի խրամատում ենք, սիրելի հայրենակիցներ, ու այդ խրամատը պատերազմից փոքրացած ու շրջափակված Արցախն է։ Մենք բոլորս զինվոր ենք միմյանց օգնելու, աջակցելու, պաշտպանելու, հուսադրելու համար»,- Արցախի Հանրապետության մայրաքաղաք Ստեփանակերտի Վերածննդի հրապարակում համաժողովրդական հանրահավաքին ասաց մարտակերտցի Սոնա Ադամյանը։

Նա դիմեց աշխարհի առաջադեմ մարդակությանն ու կազմակերպություններին. «Դուք չսանձելով Ադրբեջանի ծավալապաշտական նկարտումները, անտարբեր լինելով արցախահայության պահանջներին՝ ուղղակի  աջակցում եք Արցախի հայաթափման և հայասպանման ծրագրերին։ Գուցե ձեր մեծ շահերի կետերում մենք տեսանելի չենք, բայց կանք ու ապրում ենք որպես հզոր ուժ, որպես Արցախ։ Անտարբեր եք դուք, լուռ եք, չեք տեսնում, չեք արձագանքում։ Մենք, փաստորեն, պատանդ ենք մեր տանը, գերի ենք մեր հայրենիքում։ Աշխարհ, իսկ դու լուռ ես, իսկ դու կույր ես։ Կոչ եմ անում՝ նայիր ու տես բազմահազար արցախցիների պահանջը։ Սանձիր թշնամուն»։

Նա պատմեց, որ 2020 թվականին պատերազմի ժամանակ  որդին ընկերների հետ 70 օր շրջափակման մեջ է եղել։

«70 օրը գուցե մեզ համար 700 էր, իրենց համար, համոզված եմ, ավելի՝ առանց հաց, ջուր, առանց կապի ու ձմեռվա սառնամանիք։ Գիտեմ իմ ապրելու բանաձևը, որ ստացել եմ որդուցս՝ մենք հերոսություն չենք արել, մենք պայքարել ենք, որ փրկվենք, մենք պայքարել ենք, որ ապրենք ի հեճուկս բոլոր դժվարությունների։

Այսօր սա իմ բանաձևն է, այսօր սա մեր բոլորի բանաձևն է։ Ի հեճուկս  բոլոր դժվարությունների, բոլոր արգելքների՝ մենք պետք է ապրենք, արարենք ու ապրելու ենք, լինելու ենք, հայ ենք մնալու, Արցախը հայկական է լինելու եթե ուզում ենք, եթե հավատում ենք»,- ասաց Սոնա Ադամյանը։