Ձեր վստահելի աղբյուրը

 Ռուսաստանի վարչապետ Միխայիլ Միշուստինը հայտարարել է Հայաստանի հետ առևտրի ռեկորդային ցուցանիշի մասին՝ առաջարկելով նոր նախագծեր սկսել և հայ ձեռներեցներին հրավիրելով ավելի ակտիվ աշխատել ռուսական շուկայում։Այս մասին գրում է ՏԱՍՍ-ը։

«Կառավարության մակարդակով ակտիվ աշխատանք է տարվում առևտրատնտեսական համագործակցության ամրապնդման ուղղությամբ, և չնայած արտաքին բարդ իրավիճակին, մեր համագործակցությունը հաջողությամբ զարգանում է»,-  Նիկոլ Փաշինյանի հետ հանդիպմանն ասել է ՌԴ նախարարների կաբինետի ղեկավարը։

Միշուստինը նշել է, որ Ռուսաստանը արտաքին առևտրային առաջատար գործընկերն է և Հայաստանի տնտեսության հիմնական ներդրողը։

«2022 թվականի հունվար-նոյեմբերին ապրանքաշրջանառությունը նախորդ տարվա նույն ժամանակահատվածի համեմատ աճել է 77 տոկոսով, այն գերազանցել է 4 միլիարդ 100 միլիոն դոլարը, ինչն այսօր ռեկորդային է մեր փոխադարձ առևտրում»,- հայտարարել է ՌԴ վարչապետը և հավելել․

«Ռուսաստանի կուտակված ներդրումների ծավալը կազմում է մոտ 2 մլրդ դոլար, հայկական շուկայում գործում են ավելի քան 40 ռուսական առաջատար ընկերություններ, որոնք Հայաստանի խոշորագույն հարկատուներից են»։

«Մենք անկեղծորեն գնահատում ենք Հայաստանի հետ դաշնակցային եւ գործընկերային հարաբերությունները։ Մեր երկրներին կապում են եղբայրական հարաբերությունները, որոնք հիմնված են ռուս և հայ ժողովուրդների պատմական բարեկամության վրա»,-վստահեցրել է Միշուստինը։

Միշուստինն ընդգծել է, որ  ավանդաբար հատուկ նշանակություն է տրվում կրթության ոլորտին։

«Ռուսական բուհերում սովորում է մոտ 5 հազար հայ ուսանող, առաջիկա ուսումնական տարվա համար հատկացվել է 250 կրթաթոշակի քվոտա ՌԴ կառավարության գծով»,- ավելացրել է քաղաքական գործիչը: