Ձեր վստահելի աղբյուրը

«Ներկայացնում եմ Արցախի շուրջ ստեղծված իրավիճակի մեր լրամշակած տարբերակը, որը ԱԺ Արտաքին հարաբերությունների հանձնաժողովում, մեզ համար անընդունելի պատճառաբանությամբ, մերժվել է»,-ԱԺ հերթական նիստի մեկնարկում ներկայացնելով Լաչինի միջանցքի խնդրով ԱԺ հայտարարության նախագիծը՝ ասաց «Հայաստան» խմբակցության պատգամավոր Անդրանիկ Թևանյանը:

Հայտարարության նախագծում ասվում է, որ ՀՀ Ազգային ժողովը դատապարտում է Ադրբեջանի կողմից 2022 թվականի դեկտեմբերի 3-ին և դեկտեմբերի 12-ից մինչ օրս շարունակվող Արցախի Հանրապետության շրջափակումը, որը հանգեցրել է անվտանգային հումանիտար տնտեսական լրջագույն ճգնաժամի:

Նշվում է նաև, որ շրջափակման հետևանքով գոյաբանական խնդիրներ են առաջացել 120 հազար Արցախի քաղաքացիների համար և այն խախտում է 2020 թվականի նոյեմբերի 9-ի հայտարարության 6-րդ կետի պահանջները, նպատակ է հետապնդում ցեղասպանություն իրականացնել և նոր պատերազմ սանձազերծել:

Ընդդիմադիր խմբակցությունը հայտարարության մեջ ամրագրել է. «Ադրբեջանն իր ահաբեկչական քայլերով ցանկանում է ամբողջությամբ կլանել Արցախը՝ հակադրվելու դեպքում սպառնալով ավելի կոշտ քայլեր իրականացնել»:

Նախագծում ընդգծվում է նաև, որ պաշտոնական Բաքուն ծավալապաշտական վարքագիծ է ցուցաբերում նաև Հայաստանի նկատմամբ:

Ըստ նախագծի՝ Ադրբեջանը չի կատարել նաև ՄԱԿ Արդարադատության միջազգային դատարանի որոշումը, ինչը նշանակում է, որ Արցախը չի կարող լինել Ադրբեջանի կազմում և ելքը ինքնորոշման իրավունքի իրացումն է, իսկ Բաքվի վարքը ստիպում է երկարացնել ՌԴ խաղաղապահ առաքելության գտնվելու ժամկետը:

«Կոչ ենք անում ՄԱԿ-ի անվտանգության խորհրդի մշտական անդամներին պարտադրել Ադրբեջանին կատարելու Բերձորի միջանցքի վերաբերյալ Արդարադատության միջազգային դատարանի որոշումը: Արձանագրելով, որ ղարաբաղյան հակամարտությունը վերջնական կարգավորում չի ստացել, դիմում ենք միջազգային հանրությանը, աշխարհի պետությունների խոհրդարաններին, միջազգային հումանիտար կազմակերպություններին՝ դատապարտել Ադրբեջանի ապօրինի քայլերը և ռազմատենչ վարքագծին տալ համարժեք գնահատականներ»,-ամրագրված է հայտարարության մեջ:

Ընդդիմությունը հայտարարությամբ Արցախի հայրենակիցներին կոչ է անում պայքարել իր իրավունքների համար:

Հարակից ելույթով հանդես եկած ՔՊ-ական պատգամավոր Մարիա Կարապետտյանը նշեց, որ հայտարարության մեջ ասվում է, թե Ադրբեջանը, խմբագրելով Պրահայում ձեռք բերված պայմանավորվածությունը, փակել է Լաչինի միջանցքը և դրանով պատասխանատվության բաժին է վերագրում նաև Հայաստանի իշխանություններին և այդ պատճառով միայն կարելի էր մերժել հայտարարությունը:

Կարապետյանը ընթերցեց նախագծի մերժման հիմնավորումը՝ հիշեցնելով, որ Լաչինի միջանցքով արդեն ԱԺ հայտարարության տեքստ ընդունվել է, իսկ ներկայացված հայտարարության մեջ չի խոսվում միջազգային փաստահավաք առաքելություն բերելու անհրաժեշտության մասին, այլ  հարց է շեշտադրում:

ՔՊ պատգամավորները չմասնակցեցին քվերակությանը և հայտարարությունն ընդդիմության 28 կողմ ձայնով մերժվեց: