«Կրիստալ» թմրամիջոցը լուրջ հոգեկան խանգարումների պատճառ կարող է դառնալ
Թմրամոլությունը լուրջ հիվանդություն է, որը վնասակար ազդեցություն է ունենում մարդու ֆիզիկական և հոգեկան առողջության վրա։ Մասնագետներն ահազանգում են՝ կան թմրամիջոցներ, որոնք ոչ միայն մեկ անգամ օգտագործելուց կախվածություն են առաջացնում, այլև լուրջ հոգեկան խանգարումների պատճառ կարող են դառնալ։
Հոգեկան առողջության պահպանման ազգային կենտրոնի տնօրեն Սերգեյ Խաչատրյանը Panorama.am-ի թղթակցի հետ զրույցում ասում է, որ թեև վիճակագրական հավաստի տվյալներ չկան վերջին տարիներին հոգեկան հիվանդություններ ունեցողների թվի ավելացման մասին, սակայն նկատում են, որ հիվանդների մոտ որոշ թմրամիջոցների օգտագործման հետևանքով առաջացող հիվանդություններն են զգալի ավելացել։
Մասնավորապես, ըստ նրա, խոսքը «կրիստալ» տեսակի թմրանյութի մասին է, որի օգտագործումն անդառնալի հետևանքներ է ունենում։
«Մեր կենտրոնում գտնվող հիվանդների մեծ մասն օգտագործել են տարբեր թմրամիջոցներ, բայց վերջին 2-3 տարիներին «կրիստալ» օգտագործող հիվանդների թիվը մեծացել է, ավելի շատ մարդիկ են սկսել դիմել մեր օգնությանը»,- նշում է Սերգեյ Խաչատրյանը։
Ներկայում կենտրոնում բուժում է ստանում թմրամիջոցներից կախվածություն ունեցող 30-ից ավելի հիվանդ. նրանց մեծ մասը երիտասարդներ են։
Կենտրոնի ղեկավարի խոսքով՝ «կրիստալ»-ն այն թմրամիջոցն է, որի մեկ անգամ օգտագործումը կարող է կախվածություն առաջացնել։
««Կրիստալ»-ի օգտագործման ժամանակ առաջանում է էյֆորիայի զգացողություն, ուղեղը սկսում է արագ աշխատել առաջին իսկ փորձից, իսկ դրա ազդեցությունը բավականաչափ երկար է տևում՝ մինչև 12 ժամ։ Դրանից հետո առաջանում է անհանգստություն, սրտխփոց և այլ նշաններ, որոնք ստիպում են մարդուն նորից օգտագործել այդ թմրամիջոցը, հետո ավելացնում են չափաբաժինը և սկսում են արդեն թմրամիջոցից կախվածություն ունենալ»,- ասում է Սերգեյ Խաչատրյանը։
Հետևանքներն էլ, ըստ նրա, ուշացնել չեն տալիս. որոշ ժամանակ անց տվյալ մարդկանց մոտ առաջանում են սուր պսիխիոզ երևույթներ՝ վարքային և հոգեկան խանգարումներ, հալյուցինացիաներ, լսում են ինչ-որ ձայներ, զրկված են լինում իրականությունից, բացի այդ խիստ ագրեսիվ վարքագիծ են ունենում, ինչի արդյունքում նրանց տեղափոխում են հոգեբուժական կլինիկաներ։
Հոգեկան առողջության պահպանման ազգային կենտրոնի ղեկավարը նշում է, որ այդ հիվանդները հեշտ չեն բուժվում, երկարատև բուժում է պահանջվոմ, իսկ ցավալին այն է, որ լավ արդյունքներից հետո դուրս են գալիս հիվանդանոցից, բայց հետո սկսում են նորից թմրանյութն օգտագործել, ինչն էլ ավելի է բարդացնում նրանց վիճակը։
«Համաշխարհային գրականությունում ևս տեսնում ենք, որ «կրիստալ» օգտագործողների շրջանում մահվան հավանակությունը խիստ բարձր է։ Բնականաբար, այն օգտագործող երիտասարդներն այդ մասին չգիտեն»,- նկատում է նա։
Սերգեյ Խաչատրյանի խոսքով՝ բոլորը խոսում են թմրանյութերի վտանգավորության մասին, բայց պետք է դպրոցում, տանը խոսեն, թե ինչ հետևանքներ այն կարող է ունենալ, որպեսզի պատանիների, երիտասարդների մտքով նույնիսկ չանցնի մոտ գնալ թմրամիջոցին։
«Բոլոր կենտրոնները՝ Կախվածությունների ազգային կենտրոնը, հոգեբուժական հիվանդանոցները, ոստիկանությունը, սոցիալական ծառայությունները հսկայական աշխատանք են տանում, բայց նրանք սկսում են աշխատել արդեն թմրանյութից կախվածություն ունեցողների հետ։ Իրականում մենք կրթության, տեղեկացվածության խնդիր ունենք։
Պետք է դեռահասներին, երիտասարդներին, որոնք դեռ կեղծ ինֆորմացիա չեն ստացել թմրամիջոցների մասին, ներկայացնենք դրա վնասների մասին, թե ինչպես կարող է այն խորտակել մարդկանց կյանքը։ Հանրությունը պետք է ակտիվ լինի, ընտանիքը պետք է ուշադիր լինի, որ ցանկացած կասկածելի նշանի դեպքում անմիջապես արձագանքի, որպեսզի երեխային հետ պահի վատ քայլերից»,- նշում է Սերգեյ Խաչատրյանը։
Մանրամասները՝ տեսանյութում։
Լրահոս
Տեսանյութեր
«Հայաքվե» նախաձեռնության մարզային քարոզարշավը մեկնարկել է Գյումրիից
