Երևանի կենտրոնում հսկա փոս էր գոյացել, ո՞վ է մեղավոր. Գեղամ Նազարյան
Վարչական իրավախախտումների վերաբերյալ և Քրեական օրենսգրքերում փոփոխությունների նպատակն է կանխարգելել ճանապարհների, ճանապարհային ինժեներական կառույցների վնասման, ինչպես նաեւ ճանապարհներից օգտվելու կարգի խախտման վերաբերյալ դեպքերը եւ խստացնել օրենսդրությամբ նախատեսված պատասխանատվության միջոցները: Այս մասին ԱԺ պետական-իրավական հարցերի մշտական հանձնաժողովի նիստում հայտնել է ՀՀ տարածքային կառավարման եւ ենթակառուցվածքների նախարարի տեղակալ Քրիստինե Ղալեչյանը: Նա նշել է, որ 2006 թվականին ընդունված օրենքի կանոնակարգումները վերանայման կարիք ունեն:
Փոխնախարարը տեղեկացրել է, որ արձանագրվել են ճանապարհային նշանները փակելու, հանելու, անօրինական նշաններ տեղադրելու, ճանապարհային նշանների գողության, նաեւ երթեւեկության համար խոչընդոտներ ստեղծելու բազմաթիվ դեպքեր: Նախարարության վերլուծությունները ցույց են տվել, որ վերջին երեք տարիներին միայն միջպետական եւ հանրապետական ճանապարհներից գողացվել ր վնասվել են շուրջ 661 ճանապարհային նշան, 670 գծամետր արգելափակոց: Ըստ զեկուցողի՝ յուրաքանչյուր իրավախախտում, գողացված կամ վնասված ճանապարհային նշան բարձրացնում է պատահարների ռիսկը:
ԱԺ կայքից տեղեկանում ենք, որ առաջարկվում է փոփոխել Վարչական իրավախախտումների վերաբերյալ օրենսգրքի 140-րդ հոդվածը, սահմանված տուգանքը եռապատկել՝ հասցնելով նվազագույն աշխատավարձի յոթանասունհինգապատիկի, ինչպես նաեւ՝ եթե նախատեսված արարքները կատարելու հետեւանքով անձի առողջությանը պատճառվել է թեթեւ վնաս, նախատեսվել է սահմանված տուգանքը եռապատկել՝ հասցնելով նվազագույն աշխատավարձի իննսունապատիկի: Առաջարկվում է վերանայել նաեւ օրենսգրքի 150.2-րդ հոդվածի տույժ տուգանքները՝ դրանք ևս եռապատկելով:
Ճանապարհային անվտանգության ապահովմանն ուղղված միջոցառումները ոչ պատշաճ ապահովելու համար իրավասու մարմիններին պատասխանատվության ենթարկելու կարևորությանն է անդրադարձել «Հայաստան» խմբակցության պատգամավոր Գեղամ Նազարյանը:
Նա նշեց, որ Երևանի խաչմերուկներից մեկում դարերով մի փոս կա, անդադար բերում են, ասֆալտ անում, բայց գիտեն, որ այդ փոսի տակ շատ ավելի լուրջ խնդիր կա ու դա չի կարգավորվում։
«Հիմա դրա համար քաղաքային իշխանությունները պատժի չպե՞տք է արժանանան, թե՞ այն խեղճ հովիվը պետք է պատժի արժանանա, ով ստիպված մի քանի կովին պետք է անցկացնի փողոցով»,- ասաց նա։
Գ.Նազարյանը նաև ասաց, որ Երևանի կենտրոնում շաբաթներ առաջ օրեր շարունակ հսկա փոս էր գոյացել, հիմա ո՞վ է մեղավոր. «Դրա համար ինչ որ մեկին պատժելո՞ւ ենք, թե՞ ոչ։ Չէ, չենք պատժելու»։
Ընդդիմադիր պատգամավորը նշեց, որ Աբովյան-Սայաթ-Նովա խաչմերուկի լուսացույցը ճիշտ չի աշխատում, մարդկանց թյուրիմացության մեջ է գցում։ Թեև այդ խնդրի մասին երկու տարուց ավելի բարձրաձայնում է, սակայն որևէ մեկը չի ուղղել ու պատասխանատվության չի ենթարկվել։
«Օրենքներ ընդունելուց առաջ չպե՞տք է մտածենք այն մարդկանց պատժելու մասին, որոնք պարտավոր են հետևել»,- ասաց Գեղա, Նազարյանը։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
