Ձեր վստահելի աղբյուրը

«Ես արդեն շատ երկար ժամանակ թիրախավորված եմ իշխանությունների կողմից։ Թիրախավորված եմ դեռ Երևանի պետական համալսարանից»,- ասուլիսում ասաց Oragir.News կայքի գլխավոր խմբագիր, ԵՊՀ նախկին խոսնակ Գևորգ Էմին-Տերյանը։

Նա կարծում է, որ այստեղ խնդիրը իր անձը չէ, ավելի շատ գուցե ինչ-որ տեսակների  պայքարի հարց է, քանի որ թիրախավորված է ոչ միայն ինքը, նաև իր նման մտածող  իր ընկերները, իր գործընկերները։

«Այն, ինչ կատարվում է  իմ նկատմամբ, տեսնում եմ նաև այլ մարդկանց նկատմամբ։ Իրավական բեսպրեդել է, որն այսօր առկա է մեր երկրում, կոնկրետ իմ մաշկի վրա զգում եմ»,- ասաց Գ.Էմին-Տերյանը։

Նա ներգրավված է դատական 9 գործում։

Գ.Էմին-Տերյանը խոսեց «ամենազավեշտալի, ամենաառանցքային» գործի՝ «տոնածառի գործի մասին։

«Լաչինչ միջանցքի փակումից երեք օր անց  գրառում էի կատարել, որ ի նշան բողոքի պետք է վառել հրապարակի տոնածառը և իմ գրառումից գուցե մի կես ժամ անց մի քանի հարյուր ոստիկաններ շրջապատել էին հրապարակի տոնածառը։

Ինձ մեղադրանք առաջադրվեց քաղաքական, սոցիալական, ռասսայական, սեռական հայացքներով պայմանավորված անձի կամ անձանց խմբի նկատմամբ բռնության կոչ հնչեցնելու համար։ Ես արդեն կես տարի է ունեմ  մեղադրյալի կարգավիճակ, ստորագրությունը է վերցված երկրից չբացակայելու մասին, բայց դեռևս ինձ չեն պարզաբանել, թե ինչպես է դատախազությունը հասկացել իմ գրառումը, թե ում նկատմամբ է հնչել բռնության կոչ։ Ենթադրություններ ունեմ, որ գուցե  Հայաստանում կա մարդկանց խումբ, որ համարում է, որ ինքն առաջացել է  այդ հրապարակի տոնածառից։

Պետք է փորձաքննություն անեն, թե որտեղից եմ կատարել գրառումը, մեկնաբանություններ գրողներին կանչեն հարցաքննության։ Սա իրավական բեսպրեդելի շատ ցայտուն օրինակ է»,- գործի մասին պատմեց Գ.Էմին-Տերյանը։

Նա ենթադրում է, որ այս գործով հրահանգ է եղել հենց վարչապետի աշխատակազմի ղեկավար Արայիկ Հարությունյանից. «Իր հետ ծանոթ եմ շատ վաղուց, անձնական բաներ ունի իմ դեմ, իր նախաձեռնությունները ես ձախողել եմ»։

Ասուլիսին ներկա փաստաբան Վարազդատ Հարությունյանն ասաց, որ  եթե չեն կարողանալու պարզել այդ անձանց խումբը, ստացվում է, որ պաշտպանության օբյեկտը հենց տոնածառն է, որի նկատմամբ «սպառնալիք» է  հնչեցրել Գևորգ Էմին-Տերյանը։

«Վերցնենք մեկ այլ գործ, որը կապ չունի Էմին-Տերյանի հետ։ Օրինակ, Էդգար Ղազարյանը, որին ԱԺ մարդու իրավունքների հանձնաժողովում ուղղակի ասացին՝  մենք քեզ սպառնում ենք, խնդրում ենք  սա ընդունել որպես սպառնալիք, ականջդ, լեզուդ կկտրենք։ Էդգար Ղազարյանի գործով հաղորդում ենք ներկայացրել քննչական կոմիտե,  քրեական վարույթ նախաձեռնվել է, մերժվել է քննիչի որոշմամբ այն պատճառաբանությամբ, որ սպառնալիքն իրական չի եղել։

Հիմա ինչ է ստացվում. մի կողմից Գևորգ Էմին-Տերյանի  սատիրիկ գրառումն է  հրապարակի տոնածառը վառելու վերաբերյալ, որի հաջորդ  օրը նախաձեռնվում է քրական հետապնդման բոլոր միջոցառումներն ամենաօպերատիվ  կերպով ու պաշտպանվում է  տոնածառի իրավունքները, մյուս կողմից ընդդիմադիր քաղաքական գործիչ է, մարդ է, որին ասում են՝  լեզուդ, ականջդ կկտրենք, պնդում են, որ դա սպառնալիք է, քննիչն ասում է՝ սպառնալիքն իրական չի եղել»,- ասաց նա։

Փաստաբան Վաչե Սիմոնյանը նշեց, որ տոնածառին «սպառնալու» համար մինչև 5 տարի ազատազրկում է  սպառնում Գևորգ Էմին-Տերյանին։

Նրա խոսքով, այս գործն իրենից մեծ բարդություն չի ներկայացնում. «Մենք ակնկալում էինք, որ մինչև  հունիսի 1-ը  պետք է որոշում կայացվի՝ գործը կարճվի կամ գնա դատարան։ Հունիսի 2-ին կապ հաստատեցի վարույթ իրականացնող մարմնի հետ, տեղեկացա, որ մեղադրանքի  ժամկետը վերադաս դատարանի որոշմամբ մեկ ամսով երկարացվել է։ Հիմա մենք սպասում ենք մինչև հուլիսի 1-ը, որպեսզի հասկանանք՝  գործը դատարան գնալո՞ւ է, թե՞ չի գնալու։

Ժամկետի  երկարացումը չի կարող կամայական լինել, նմանատիպ գործերով առավելապես։

Այս գործով պարապուրդի է մատնված քննիչը։ Գործը մի անգամ քննիչը ուղարկել է  դատախազություն՝ դատարան ուղարկելու համար, սակայն  դատախազը հանձնարարություններ տալով՝ գործը  վերադարձրել էր քննիչի՝ լրացուցիչ  նախաքննություն, գործողություններ կատարելու համար։ Իմ տպավորությունն այն է, որ  չգիտեն այս գործն ինչ են անելու, ելքը ոնց է լինելու, իրենք էլ չեն կողմնորոշվել, սակայն մենք տրամադրված ենք այս գործով արդարության հասնել»։

Նա նաև նշեց, որ իրավական հարթակներում՝ դատարաններում, նախաքննական մարմիններում, իրենք չեն հասնում այն ակնհայտ բարենպաստ հետևանքներին, արդյունքին, որին, առաջին հայացքից, թվում է, պետք է հասնել անխոչընդոտ։