Ձեր վստահելի աղբյուրը

Մաշկի տարածված խնդրի՝ գորտնուկների, դրանց առաջացման պատճառների ու բուժման մասին Panorama.am-ը զրուցել է մաշկաբան Ռուզաննա Մխոյանի հետ։

Panorama.am-Բժշկուհի, ի՞նչ է գորտնուկը և ինչպե՞ս է այն առաջանում։
Մաշկաբան- Գորտնուկը վիրուսային ծագում ունեցող հիվանդություն է, որը փոխանցվում է հիվանդ մարդուց մարդ շփման հետևանքով, կամ կենցաղային ճանապարհով։

Panorama.am-Ո՞ր տարիքային խումբն է գտնվում վարակի ռիսկի գոտում։
Մաշկաբան-Ինչպես մեծահասակների, այնպես էլ երեխաների մոտ կարող է նկատվել երևույթը։ Երեխաների մոտ առավել հաճախ է հանդիպում, քանի որ նրանց իմունիտետը դեռ ցածր է, ու հիմք է վիրուսի դրսևորման։

Panorama.am-Կա՞ն արդյոք գորտնուկների տեսակներ, ո՞րն է առավել տարածված։
Մաշկաբան-Առավել հաճախ հանդիպում են գորտնուկների վուլգար կամ հասարակ տեսակները։ Տարբերակում ենք նաև ներբանային գորտնուկ , որը տեղակայվում է ներբանի շրջանում, հարեղնգային գորտնուկ,  որը տեղակայվում է եղունգի շուրջ, և , իհարկե, տափակ գորտնուկները, որոնք իրենցից ներկայացնում են մանր գորտնուկներ տեղակայվում են հիմնականում դեմքի և պարանոցի շրջանում։

Panorama.am-Որո՞նք են գորտնուկի և կոշտուկի տարբերակիչ նշանները, հիվանդը ինչպե՞ս կարող է ինքնազննման միջոցով որոշել առաջացած խնդրի տեսակը։
Մաշկաբան-Կոշտուկը առաջանում է հիմնականում այն հատվածներում, որտեղ տեղի է ունենում հարում և շփում, բացի դրանից, արտաքնապես տարբերվում են նրանով, որ գորտնուկի մեջտեղի հատվածում նկատվում է սև կետ, որը թրոմբոզի ենթարկված մազանոթն է։ Այն ավելի հստակ է երևում, երբ կատարվում է դերմատոսկոպիկ հետազոտություն։ Գորտնուկի դեպքում տեղի է ունենում վեգետացիա, այն իրենից ներկայացնում է վեգետատիվ գերաճ։

Panorama.am-Գորտնուկի բուժման ի՞նչ միջոցներ կան։
Մաշկաբան-Երբեմն սխալ է մանր բազմաթիվ գորտնուկները հեռացնելը, ինչն անիմաստ սպիներ է առաջացնում, այնինչ կարելի էր դրանք բուժել՝ հետազոտելով հիվանդին, գտնելով օրգանիզմում հնարավոր պատճառ։ Այնուհետև պետք է նշանակել յուրաքանչյուր հիվանդի համար հատուկ մշակված բուժում անհատական մոտեցմամբ, որը կընկճի վիրուսը։ Գրագետ բուժման արդյունքում բազմաթիվ գորտնուկները հետ են զարգանում։

Panorama.am-Ի վերջո, կարելի՞ է զբաղվել ինքնաբուժությամբ։
Մաշկաբան-Գորտնուկի պարագայում ինքնաբուժությունը կարող է ավարտվել ավելի վատ հետևանքներով։ Սխալներն, իկհարկե, շատ են. նշվում են տնական մեթոդներ, որոնք շատ բարդացած բորոբոքային երևույթների, կամ սպիացումերի պատճառ են դառնում։ Պացիենտները խորը վերքերով  գալիս են մասնագետի մոտ՝փորձելով շտկել խնդիրը։

Panorama.am-Ի՞նչ անել, երբ կրկնվում է գորտնուկը՝ համապատասխան բուժում ստանալուց հետո։
Մաշկաբան-Եթե համապատասխան միջոցներով կատարվել է գորտնուկի հեռացում, բայց այն կրկնվել է կարճ ժամանակ անց ու նույն հատվածում, ապա հեռացումը կատարվել է ոչ ճիշտ եղանակով, այսինքն՝ հեռացվել է ոչ ամբողջությամբ։ Սակայն հնարավոր են նաև դեպքեր, երբ այն առաջանա մեկ այլ հատվածում. դա արդեն խոսում է օրգանիզմում վիրուսի ակտիվության մասին։

Panorama.am-Հիվանդների շրջանում գորտնուկի հեռացման ի՞նչ սխալ մեթոդների եք հանդիպել։
Մաշկաբան-Հիմնականում գորտնուկը փորձում են վերացնել տնային պայմաններում թթուներով` օրինակ չիստատելով, կամ ժողովրդական բժշկության եղանակներով։ Արդյունքում առաջանում են հարակից առողջ մաշկի այրվածքներ, երկրորդային ինֆեկցված օջախներ և այլ բարդություններ։ Ճիշտ է դիմել մասնագետին, որը գրագետ ձևով կորոշի հեռացնելու եղանակը։

Panorama.am-Գորտնուկի հեռացման ի՞նչ եղանակներ կան բժշկության մեջ։
Մաշկաբան-Եղանակները տարբեր են՝ լազերով, պլազմայով, սուրգիտրոնով, սառեցված ազոտի միջոցով։ Ընտրվում է կախված տեղակայումից, տարիքից, քանակից, խորության աստիճանից և վաղեմությունից։