Ձեր վստահելի աղբյուրը

Մինչ ՀՅԴ անդամ Իշխան Սաղաթելյանը Հանրապետության հրապարակում բեմահարթակ էր բարձրանում՝ ելույթ ունենալու համար, քաղաքացիներից մեկը բացականչեց․ «Անցե՛ք գործի, հերիք է խոսեք»։

Այնուհետև Սաղաթելյանը հայտարարեց, որ խոսելու է շատ կարճ։

«Երեկ Հայաստանի գրեթե բոլոր ընդդիմադիր ուժերի հետ ունեցել ենք խորհրդակցություն՝ քննարկելու նպատակով ստեղծված իրավիճակից դուրս գալու ճանապարհային քարտեզը։Երկու հարցում ձեռք ենք բերել փոխըմբռնում և ունենք որոշում․

1․ժողովրդական շարժումը գլխավորելու և առաջնորդելու համար անհրաժեշտ է ստեղծել մարմին, որը պատասխանատվություն կկրի այս ամեն ինչի համար, առաջնորդի ժողովրդին և այս պայքարը հասցնի հաղթական ավարտին։ Այն կկոչվի «ազգային կոմիտե»

2․մշակել ենք քայլերի գործողությունների ծրագիր, որի վերջնարդյունքը պետք է լինի այս չարիքի կառավարության հեռացումը։

Խորհրդարանական ընդդիմությունն այդ ծրագրի շրջանակում օգտվելու է ԱԺ-ում իմպիչմենտ սկսելու գործընթացով։Մեր քաղաքական ուժերի խորհրդակցությունների արդյունքում ձևավորած ծրագիրը, պատկերացումները փոխանցելու ենք նոր ստեղծվող ազգային կոմիտեին, որը շատ կարճ ժամանակ հետո այս հարթակից ներկայացնելու է քայլերի և գործողությունների ծրագիր։
Բոլորն ասում են՝ ամեն ինչ վերջացել է, ուշ է, ուշ չի, ժողովուրդ, եթե ուշացնենք Սյունիքն էլ ենք կորցնելու, Գեղարքունիքն էլ, մի՛ կոտրվեք, պետք է շարունակեք պայքարը»,- ասաց Սաղաթելյանը՝ վանկարկելով Արցախ։

Ելույթից հետո քաղաքացիները կրկին արձագանքեցին․ « Կենացներ հերի՛ք է ասեք»։