«Վիեննայի հանդիպումը հօգուտ Հայաստանի էր». Հայաստանում Իտալիայի նախկին դեսպան
Իտալական Spondasud.it պարբերականը հրապարակել է Հայաստանում Իտալիայի նախկին դեսպան Բրունո Սկապինի հեղինակային հոդվածը: Նախկին դեսպանը վերլուծել է Լեռնային Ղարաբաղի հարցով Վիեննայում կայացած հանդիպմանը՝ նշելով, որ այն հօգուտ Հայաստանի էր:
Բրունո Սկապինի գրել է. «Մայիսի 16-ին Վիեննայում ԵԱՀԿ Մինսկի խմբի նախաձեռնությամբ կայացած Հայաստանի և Ադրբեջանի նախագահների հանդիպումն ունեցավ իր արդյունքը՝ ետ տալով ժամանակը մինչ այն պահը, երբ Լեռնային Ղարաբաղի կոնֆլիկտի խաղաղ լուծման համար առկա էին անհրաժեշտ նախապայմանները:
Վիեննայի հանդիպման արդյունքները դիտարկելով, կարելի է նշել, որ դրանք միանշանակ ի օգուտ Հայաստանի են եղել: Երևանն ԱՄՆ պետքարտուղար Ջոն Քերիի և Ռուսաստանի արտաքին գործերի նախարար Սերգեյ Լավրովի մասնակցությամբ ընթացող բանակցությունների սեղանին դրեց Ադրբեջանի կողմից հրադադարի խախտման ռեժիմի մասին հարցը:
Հայաստանը ստացավ նաև բոլոր կողմերի, այդ թվում՝ Բաքվի համաձայնությունը կատարելու 1994-1995թթ. զինադադարի վերաբերյալ համաձայնագրի կետերը, ինչը պետք է նպաստի հիմնախնդրի խաղաղ կարգավորմանը: Սա ենթադրում է, որ Լեռնային Ղարաբաղը ևս պարտավոր է պահպանել համաձայնագրերը: Բաքուն ցանկանում էր բացառել դա, քանի որ այս կերպ բանակցությունները հնարավոր է վերադառնան նախկին՝ եռակողմ ձևաչափին: Այսինքն՝ բանակցային գործընթացում Բաքուն ստիպված է լինելու լսել ոչ միայն Հայաստանի, այլև՝ Ստեփանակերտի ղեկավարության կարծիքը:
Գագաթաժողովի արդյունքներից մեկն էլ այն էր, որ Բաքուն «հասանելի դարձավ» ԵԱՀԿ Մինսկի խմբի կողմից շփման գծում մոնիթորինգի նոր մեխանիզմների ներդրման հարցում, որ այդ առումով, սակայն Վիեննայում որևէ հստակ որոշում չի կայացվել: Բաքուն, պարզապես, «բարի կամք դրսևորելով» հնարավոր է համարել հրադադարի ռեժիմի պահպանման համար մոնիթորինգի նոր մեխանիզմների ներդրումը, որի վերաբերյալ առաջարկները պետք է ներկայացվեն և ընդունվեն մի քանի հանդիպումների ընթացքում:
Բաքուն, այդուամենայնիվ, չի հրաժարվում սադրանքներից: Շփման գծում կրկին խախտվում է հրադադարի ռեժիմը, շարունակվում են մահաբեր կրակոցները գնդացիրներից, կիրառվում են տարբեր տրամաչափի ականանետեր և հրետանի: Հրադադարը տեղ-տեղ պահպանվում է միայն այն ժամանակ, երբ շփման գծում ԵԱՀԿ Մինսկի խմբի կողմից իրականացվում է մոնիթորինգ:
Այսպիսով՝ Վիեննայի հանդիպումը Հայաստանի համար հաղթական էր: Դա, թերևս, պետք է անվանել «պյուռոսյան հաղթանակ» բանակցությունների վարման տեխնիկական մակարդակի վրա. գագաթնաժողովի արդյունքներն ուղղակի «ճանաչումն էր» այն ամենի, ինչը պետք է ձեռք բերված լիներ տարիներ տևող բազմակողմ բանակցային գործընթացի ընթացքում, սակայն արատավորվել էր ապրիլին Ադրբեջանի ՝ հակամարտությունը ռազմական ճանապարհով լուծելու հանդուգն փորձով:
Հաղթանակը, թերևս, ծառայում է նաև ԵԱՀԿ Մինսկի խմբի դերի վերականգնմանը, որի գործունեությունը, հատկապես վերջին տարիներին, արդյունավետությամբ աչքի չէր ընկնում: Վերականգնում է նաև վստահությունը հենց բանակցային գործընթացի հանդեպ, ինչը մինչ այդ անիրատեսական էր թվում:
Ադրբեջանի անհուսալիությանը սովոր Երևանն, իր հերթին, թույլ չի տա մյուս կողմին չկատարել իր «խոստումները», որոնք կարող են ծառայել Լեռնային Ղարաբաղի ժողովրդի ինքնորոշման օրինական շահերը պաշտպանելուն»:
Ամփոփելով՝ նախկին դեսպանը նշում է, որ, անկախ ամեն ինչից, այլևս հնարավոր չէ հետ բերել ապրիլյան քառօրյա պատերազմում զոհվածների կյանքը:
Հարակից հրապարակումներ`
- ԵԱՀԿ Մինսկի խումբ. Նախագահները վերահաստատեցին հրադադարի պահպանման հանձնառությունը
- Լավրով. Առաջիկայում Հայաստանի և Ադրբեջանի նախագահները կհստակեցնեն հաջորդ հանդիպման ժամկետները
- Վիեննայում համաձայնություն է ձեռք բերվել շփման գծում միջադեպերի հետաքննության մեխանիզմի ներդրման շուրջ
- ԱՄՆ-ի համար կարևոր է, որ շփման գծում լարվածությունը նվազի, բռնությունները դադարեն. Պետքարտուղարություն
- Ուորլիք. Քերրին և Լավրովը մտադիր են Վիեննայում վերահաստատել հրադադարը. «Ազատություն»
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ