Առաջատար հայագետները կմասնակցեն միջազգային գիտաժողովի Մոսկվայում

2016 թվականի սեպտեմբերի 14-ին և 15-ին Մոսկվայի Մ.Վ. Լոմոնոսովի անվան պետական համալսարանի Պատմության ֆակուլտետում տեղի կունենա «Հայկական սփյուռքը և հայ-ռուսական հարաբերությունները. անցյալ և ներկա» խորագրով միջազգային գիտաժողովը, որի նպատակն է համակողմանիորեն քննարկել աշխարհի տարբեր ժողովուրդների հետ հայության շփման պատմական փորձը, ինչպես նաև անդրադառնալ այն դերին, որը հայկական սփյուռքը կատարել է Ռուսաստանի, Հայաստանի և այլ երկրների պատմության մեջ։

«100 կյանք» հիմնադրամի տարածած հաղորդագրության մեջ նշված է.
«Գիտաժողովը նշանակալի իրադարձություն կդառնա ռուսաստանյան հայագիտության համար, և առաջին անգամ այս թեմային անդրադարձ կարվի ակադեմիական և համալսարանական մակարդակով՝ միավորելով գիտաճյուղի առաջատար մասնագետներին Մոսկվայի համալսարանի և դրա պատմության ֆակուլտետի հենքի վրա։

Միջոցառմանը կմասնակցեն հայագիտության և հարակից ճյուղերի ավելի քան 100 մասնագետներ աշխարհի 16 երկրների մոտ 50 քաղաքներից: Նրանց թվում՝ նշանավոր պատմաբաններ Սերգեյ Կարպովը (Ռուսաստան, Մ.Վ. Լոմոնոսովի անվան ՄՊՀ), Աշոտ Մելքոնյանը (Հայաստան, ՀՀ ԳԱԱ Պատմության ինստիտուտ), Ժերար Դեդեյանը (Ֆրանսիա, Պոլ Վալերի Մոնպելյեի անվան համալսարան), Ռայմոն Գևորգյանը (Ֆրանսիա, Սեն-Դենիի Փարիզ VIII համալսարան), Կլոդ Մութաֆյանը (Ֆրանսիա), Սեպուհ Ասլանյանը (ԱՄՆ, Կալիֆորնիայի UCLA համալսարան) և ուրիշներ։

Գիտաժողովի հիմնական թեմաներն են՝ Հայաստանի և Ռուսաստանի պատմական ճակատագրերը X–XXI դդ., ռուսահայ սփյուռքի պատմություն, հայկական սփյուռքն աշխարհում, Հայաստանի ու հայկական սփյուռքի արվեստն ու մշակույթը, աղբյուրագիտության և պատմագրության հիմնահարցեր։

Հայաստանի, հայկական սփյուռքի և հայ-ռուսական հարաբերությունների պատմության մեջ մասնագիտացող երիտասարդ գիտնականները համատեղ քննարկումների հնարավորություն կունենան։

Գիտաժողովը նախաձեռնել են Մոսկվայի Մ.Վ. Լոմոնոսովի անվան պետական համալսարանի Պատմության ֆակուլտետը և Սփյուռքի պատմության  գիտահետազոտական կենտրոնը՝ «Անիվ» հայագիտական հետազոտությունների աջակցության և զարգացման հիմնադրամի հետ համատեղ: Գիտաժողովի ինֆորմացիոն հովանավորն է 100LIVES նախագիծը, որը «Ավրորա» համաշխարհային մարդասիրական նախաձեռնության մի մասն է։

Գիտաժողովի անցկացմանն աջակցել են նաև Ռուսաստանի գիտությունների ակադեմիայի պատմաբանասիրական գիտությունների բաժինը, Հայաստանի Գիտությունների ազգային ակադեմիան, Պետական Էրմիտաժը, Մ.Մաշտոցի անվան հին ձեռագրերի գիտահետազոտական ինստիտուտը՝ Մատենադարանը, Արևելքի պետական թանգարանը, Հայաստանի պատմության թանգարանը, ինչպես նաև՝ ՌԴ Մշակույթի նախարարության արվեստագիտության պետական ինստիտուտը, Ռուսաստանի Ազգերի բարեկամության համալսարանի Հումանիտար և սոցիալական գիտությունների ֆակուլտետը, Ազգային հետազոտական միջուկային համալսարանի  մշակութապատմական «Մեր ժառանգությունը» (Наше наследие)կենտրոնը:

Գիտաժողովի շրջանակում թանգարանային ցուցադրություն կլինի, այդ թվում՝ պատմա-վավերագրական հատուկ ցուցադրություն. «Հոկտեմբերի գվարդիականը. Պ.Գ. Հարությունյանց (1892–1938)», վավերագրական գրքերի հատուկ ցուցադրություն «Հայաստան. պատմական ուղի» և Հայաստանի էթնիկ ժառանգության ցուցանմուշներ՝ Արևելքի պետական թանգարանից: 

Գիտաժողովի աշխատանքային լեզուներ. ռուսերեն, անգլերեն, ֆրանսերեն»: