ՀՅԴ-ն անձերի փոփոխության հետ լուրջ հույսեր չի կապել՝ պետք է փոխվի բովանդակությունը
Միանշանակ՝ Դաշնակցության պորտֆելները չեն պակասի: Չեմ կարծում, որ կավելանան: Այն համագործակցությունը, որ մենք ունեցել ենք և դրա հիման վրա բաշխվել են պորտֆելները, ուժը պահպանում է,- Ազգային ժողովում լրագրողների հետ զրույցում ասաց ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը՝ պատասխանելով հարցին, թե արդյո՞ք նոր ձևավորվող կառավարությունում ՀՅԴ-ի պորտֆելները հնարավոր է պակասեն կամ ավելանան:
Ըստ նրա, ՀՅԴ-ն էլ էր ցանկանում, որ փոփոխություններ տեղի ունենային, որովհետև ներքին և արտաքին մարտահրավերները, որոնց առջև կանգնած է Հայաստանը, թույլ չեն տալիս սպասել 2017 թվականին սահմանադրական փոփոխություններով արդեն բնականոն հունի մեջ մտնող գործընթացին:
«Քանի որ երկիրն անցում է կատարելու խորհրդարանական համակարգի, ճիշտ կլինի սահուն անցում ապահովելու համար հենց այսօրվանից սկսել փոփոխությունները, որովհետև մեր հասարակության մի զգալի մասը չունի համբերություն, չի պատկերացնում, որ 2017 թվականից սկիզբ առնող բարեփոխումները կբերեն այն նպատակների իրականացմանը, որոնք շատերն այսօր ունեն իրենց մտքում: Ոչինչ չի խանգարում մեզ Սահմանադրությամբ, ընտրական բարեփոխումներով նախատեսվող փոփոխությունները սկսել այսօր: Մենք այս փոփոխություններն այդ կոնտեքստի մեջ ենք տեսնում: Պետք էր նոր սկզբի հիմք դնել, մարդկանց մոտ հույս արթնացնել: Այդ առումով գնահատում եմ վարչապետի քայլը»,- ասաց ՀՅԴ-ական գործիչը:
Ա. Ռուստամյանը հույս ունի, որ նոր փոփոխություններով, հատկապես ճանաչելով նոր նշանակվող վարչապետին որպես բանիմաց, կրթված, իր գործն իմացող, ժամանակակից մտածելակերպ ունեցող անձնավորության, այդ գործընթացը կարող է առաջնորդել:
Պատասխանելով հարցին, թե չե՞ք կարծում, որ իշխող ուժն ընտրություններին ընդառաջ փոփոխություններն անում է իր վարկանիշի համար, պատգամավորն ասաց. «Բայց դա բնական չէ՞, որ մարդիկ իրենց վարկանիշի համար են մի բան անում: Ժամանակին ունեցել ենք իշխանություններ, որ թքած ունեին իրենց վարկանիշի վրա, բացարձակապես համարում էին, որ իրենց դեմ խաղ չկա, ինչ էլ անեն, կմնան իշխանության:
Հասկացել են, որ իրավիճակ է փոխվել, եթե ուզում են իրենց իշխանությունը պահպանել, պետք է համապատասխան վարկանիշ ձեռք բերեն: Նորմալ է, ժողովրդավարական պրոցեսները դա է պահանջում, մարդն իր վարկանիշը բարձրացնելու համար քայլեր է կատարում»:
Միաժամանակ Ա. Ռուստամյանն ասաց, որ իրենք միշտ էլ անձերի փոփոխության հետ լուրջ հույսեր չեն կապել, պետք է փոխվի բովանդակությունը, խաղի կանոնները, հարաբերություններն իշխանության մեջ:
«Այդ փոփոխությունները լինելու էին 2017 թվականին արդեն Սահմանադրության ուժով: Հիմա հարց է առաջանում՝ ինչո՞ւ հիմա չսկսել, եթե միևնույնն է՝ մի քանի ամիս հետո դա տեղի է ունենալու:
Կարծում եմ, որ այս գիտակցությունն է մղել այսօր նախագահին գնալ այս քայլին: Բոլորս էլ հասկանում ենք, որ այսօր այդ փոփոխությունները սկսելը շատ ավելի մեծ հնարավորություն է տալիս նույն քաղաքական ուժին, ով մտածում է իր ապագայի մասին, ընտրություններում հաջողելու: Ինչո՞ւ ոչ, դա էլ պետք է նպատակ լինի, այլ ոչ թե մտածել, որ ընտրությունները կանխորոշված են: Սա խոսում է այն մասին, որ հասարակության վերաբերմունքը, քո ունեցած հեղինակությունը մեծ դեր կունենա ապագա ընտրությունների ժամանակ, այն, ինչին մենք ձգտում ենք, որ լինի հեղինակությամբ, իրական վարկանշով պայմանավորված, ոչ թե կեղծիքներով ու վերարտադրման մեխանիզմներով»,- ասաց Ա.Ռուստամյանը:
Հարցին, թե լինելով կոալիցիոն գործընկեր, ե՞րբ եք իմացել վարչապետի հրաժարականի մասին, նա ասաց, որ վաղուց են խոսել այդ մասին, մեկ ամիս առաջ տեղի է ունեցել կոալիցիոն նիստ, որի ժամանակ ընդհանրապես խոսել են փոփոխությունների անհրաժեշտության մասին:
«Ակնկալելի էր, այս փոփոխություններ տեղի էին ունենալու»,- հավելեց Դաշնակցական գործիչը:
Հարակից հրապարակումներ`
- Ասեմ, որ կարող եք էական փոփոխություններ սպասել առաջիկայում. Սերժ Սարգսյանը՝ ՀՀԿ խորհրդի նիստում
- Ապագա կառավարությունը կլինի համախոհների թիմ. ՀՀԿ փոխնախագահ
- ՀՀԿ-ն որոշել է նոր կառավարությամբ գնալ դեպի խորհրդարանական ընտրություններ. Արմեն Աշոտյան
- Նոր կառավարությունը կաշխատի մինչև սպասվող խորհրդարանական ընտրություններ. Արտակ Զաքարյան