Ձեր վստահելի աղբյուրը

Այսօր Ազգային ժողովում Հանրապետական խմբակցության անդամների հետ հանդիպումից հետո լրագրողների հետ ճեպազրույցում Գլխավոր դատախազի թեկնածու Արթուր Դավթյանը հայտարարեց, որ իրեն ուղղված հարցերը հիմնականում վերաբերել են իր կենսագրությանը:

Ասաց նաև, որ ինքը ներկայացրել է Գլխավոր դատախազության անելիքները և գործունեության տեսլականը:

«Գլխավոր դատախազությունը տարիներ շարունակ տքնաջան աշխատանք է կատարել: Բավականին բարեփոխումներ է իրականացրել մինչև այսօր և ըստ էության, կատարված դրական աշխատանքը պահելու և առավել արդյունավետ դարձնելու անհրաժեշտություն ունենք: Ես կարծում եմ, որ առաջնահերթ խնդիրներից մեկը լինելու է մեր աշխատանքի հրապարակայնության ապահովումը: Առաջիկայում մենք կփորձենք հաճախակի շփվել, մեր աշխատանքը հաճախակի ներկայացնել ու մասնագիտորեն պարզաբանել մեր կողմից կայացվող որոշումները», -ասաց Դավթյանը:

Անդրադառնալով քաղաքական պատճառներով մարդկանց ձերբակալելու ու կալանավորելու մասին հայտարարություններին, Դավթյանն ասաց, որ այդ բնույթի ձերբակալումներ չեն կատարվում Հայաստանում ու հավելեց. «Քաղաքական պատճառներով մարդկանց ձերբակալումներ չունենք մեր երկրում: Ցանկացած ձերբակալում իրականացվում է բացառապես Քրեական դատավարության օրենքով նախատեսված հիմքերով և կարգով»:

Լրագրողը փորձեց հասկանալ՝ այսինքն գլխավոր դատախազի թեկնածուն պնդում է, որ քաղաքական բանտարկյալներ Հայաստանում չկա՞ն, և նա արձագանքեց. «Իհարկե, պնդում եմ՝ մենք քաղբանտարկյալ չունենք»:

Հարցին, թե եթե թեկնածուն պնդում է, որ չկան քաղբանտարկյալներ և չեն իրականացվում քաղաքական հիմքերով ձերբակալումներ, այդ դեպքում ի՞նչ է փոխելու Դավթյանը համակարգում, թեկնածուն պատասխանեց հարցով. «Իսկ ո՞վ է ասում, որ Հայաստանում կան քաղբանտարկյալներ, որ ես էլ ոչինչ չեմ փոխելու»:

Լրագրողի դիտարկմանը, թե հանրությունն է այդ կարծիքին ու թվարկեց անուններ՝ Շանթ Հարությունյան, Գևորգ Սաֆարյան, Գլխավոր դատախազի ժամանակավոր պաշտոնակատարը արձագանքեց. «Ես չեմ կարող վստահ լինել, որ որևէ մեկիդ ներկայացրածը ամբողջ հանրության կարծիքն է, ես մասնագիտական առումով կարող եմ ասել, որքանով ես ներգրավված եմ եղել այդ որոշումների կայացմանը, այդ որոշումները կայացվել են բացառապես օրենքով նախատեսված հիմքերով»:

Հարցին, թե այսուհետև նույնպես կձերբակալվեն քաղաքական գործիչներ, եթե նրանք փողոց դուրս գան, Դավթյանը պատասխանեց.

«Քրեական օրենսգիրքը սահմանում է քրեական պատասխանատվության անխուսափելիության սկզբունքը, այսինքն՝ ցանկացած անձ, որը կկատարի քրեական օրենսգրքով նախատեսված արարք, պետք է ենթարկվի քրեական պատասխանատվության: Միևնույն ժամանակ, քրեական դատավարության օրենքն էլ սահմանում է, որ ոչ մի անմեղ անձ չպետք է ենթարկվի քրեական պատասխանատվության»: