«Ռեալն» ու «Ատլետիկոն» չեն կարող նոր ֆուտբոլիստների գրանցել մինչև 2018 թ. հունվարը

ՖԻՖԱ-ի բողոքարկման կոմիտեն պաշտոնապես մերժել է մադրիդյան «Ռեալի» ու «Ատլետիկոյի» բողոքը, որն իսպանական ակումբները ներկայացրել էին՝ ի պատասխան ՖԻՖԱ-ի կարգապահական կոմիտեի՝ հաջորդ երկու տրանսֆերային պատուհանի ընթացքում նոր ֆուտբոլիստների գրանցելու արգելքի վերաբերյալ որոշման։ Այս մասին հայտնում է isport.ua-ն։

Այսպիսով՝ մադրիդյան ակումբները մինչև 2018 թ. հունվարը չեն կարող պայմանագրեր կնքել նոր խաղացողների հետ։

«Արքայական ակումբն» արդեն արձագանքել է կարգապահական կոմիտեի այդ որոշմանը և մտադիր է ևս մեկ բողոքարկում ներկայացնել, այս անգամ՝ Լոզանի մարզական արբիտրաժային դատարան։

Հիշեցնենք, որ «Ռեալն» ու «Ատլետիկոն» նման պատժի են արժանացել մինչև 18 տարեկան ֆուտբոլիստների հետ պայմանագրերի ստորագրման գործում տրանսֆերային կանոնների խախտման համար։