Վրաստանի ֆուտբոլի ֆեդերացիան նույնպես կաջակցի Չեֆերինին
Վրաստանի ֆուտբոլի ֆեդերացիայի նախագահ Լևան Կոբիաշվիլին և կազմակերպության գլխավոր քարտուղար Դավիդ Մուջիրին քննարկել են ՈՒԵՖԱ-ի նախագահի առաջիկա ընտրությունների հարցը։ Ինչպես տեղեկացնում է sport-express.ru-ն, խորհրդակցության ընթացքում որոշվել է աջակցել սլովեն Ալեքսանդր Չեֆերինին։
«Մենք կաջակցենք Չեֆերինին, որովհետև նա լիովին կիսում է ֆուտբոլի զարգացման վերաբերյալ մեր պատկերացումները։ Նրա գործունեությունն օգտակար կլինի մեր մարզաձևի համար»,- նշված է Վրաստանի ֆուտբոլի ֆեդերացիայի տարածած հայտարարության մեջ։
Ավելի վաղ Ռուսաստանի ֆուտբոլային միության նախագահ Վիտալի Մուտկոն հաղորդել է, որ ՌԴ-ն նույնպես կպաշտպանի Չեֆերինի թեկնածությունը։
Ավելացնենք, որ երկրորդ թեկնածուն հոլանդացի Միքայել վան Պրաագն է։ Ընտրությունները կկայանան սեպտեմբերի 14-ին, Աթենքում կայանալիք ՈՒԵՖԱ-ի համաժողովում։