Ձեր վստահելի աղբյուրը

Վերջին մեկուկես տարվա ընթացքում բավականին նոր ծրագրեր են սկսվել միջին մասնագիտական կրթության ոլորտում: Այս մասին այսօր լրագրողների հետ հանդիպմանը հայտնեց ՀՀ կրթության և գիտության նախարարության նախնական (արհեստագործական) և միջին մասնագիտական կրթության վարչության պետ Արտակ Աղբալյանը՝ նշելով, որ դրանք հիմնականում միջազգային դոնոր կազմակերպությունների կողմից իրականացվող ծրագրերն են:

«Այսօր դոնոր կազմակերպությունները մեր ոլորտում արդեն հասել են տասի, իսկ ընդամենը մեկուկես տարի առաջ այդ թիվն ընդամենը մեկ-երկուսն էր»,- տեղեկացրեց նա:

Անդրադառնալով Գերմանիայի տնտեսական համագործակցության և զարգացման նախարարության աջակցությամբ իրականացվող դուալ կրթական համակարգին, ԿԳՆ պաշտոնյան հայտնեց, որ այն կիրականացվի փորձարարական կարգով հանրապետության չորս ուսումնական հաստատություններում՝ չորս մասնագիտությունների գծով:

«Դուալ կրթական համակարգը երկակի ուսուցման կամ աշխատանքի ուսուցման վրա հիմնված համակարգ է, որտեղ ուսումնական գործընթացին զուգահեռ կիրականացվի նաև աշխատանքի վրա հիմնված ուսուցում: Այսինքն հինգօրյա ուսուցման ընթացքում երկու կամ երեք օր ուսանողը կանցկացնի քոլեջում կամ ուսումնարանում, մնացած երկու օրը կանցկացնեն կոնկրետ գործատուի մոտ՝ կոնկրետ մասնագիտության գծով և ավելի պրակտիկ գիտելիքներ կստանա իր մասնագիտական գիտելիքները բավարարելու առումով»,- մասնրամասնեց Արտակ Աղբալյանը:

Նրա խոսքով՝ նախկինում անցկացվող ուսուցումը հիմնականում տեսական էր, իսկ որոշակի ժամաքանակով տրվող պրակտիկաներն ավելի ձևական բնույթ էին կրում:

«Դուալ կրթական համակարգի պիլոտային ծրագրում ընդգրկված ուսումնական հաստատություններն են Տավուշի տարածաշրջանային քոլեջը, այնտեղ իրականացվելու է ճշգրիտ ճարտարագիտությունից ավտոմեխանիկների, ավտոէլեկտրիկների պատրաստման գործընթաց, Վայոց Ձորի տարածաշրջանային քոլեջում իրականացվելու է գինեգործություն, Երևանի հումանիտար քոլեջում՝ տուրիզմ, Շիրակի տարածաշրջանային քոլեջում՝ ՏՏ ոլորտի մասնագիտությունների գծով»,- ներկայացրեց նա:

Աղբալյանը նշեց, որ այս հաստատություններից յուրաքանչյուրն ունեն իրենց հստակ գործընկերը գործատուների դաշտում: Շիրակում Գյումրու տեխնոպարկն է, Եղեգնաձորում գինեգործական ընկերություններն են, Երևանում մի քանի հայտնի հյուրանոցներ, իսկ Տավուշում Ենոքավանի հայտնի տուրիզմի ոլորտի ընկերությունը. «Կսկսենք այս չորս մասնագիտությունների գծով, հետագայում կփորձենք ավելացնել գյուղատնտեսական մասնագիտությունների գծով»:

Երկրորդ ծրագիրը ԵՄ բյուջետային աջակցությամբ է իրականացվում և ուղղված է գյուղատնտեսական մասնագիտությունների զարգացմանը՝ աշխատանքի վրա հիմնված ուսուցման ձևով: Ծրագիրն արդեն սկսված է և կավարտվի 2020 թվականին:

Երրորդ ծրագիրն իրականացվում է «Սեյվ դը չիլդրեն» հասարակական կազմակերպության հետ, որն ավելի շատ ուղղված է մասնագիտական կրթության ոլորտում ներառական կրթությանը:

«Վաղն արդեն Արմավիր քաղաքում կբացենք առաջին սոցիալական ձեռնարկությունը, Արմավիրի արվեստի քոլեջում՝ տպագրական գործ մասնագիտությամբ: Սիսիանում մեղվաբուծության, Իջևանում՝ ավտոսպասարկման ոլորտի ձեռնարկություններ կբացվեն հաստատությունների ներսում»,- հավելեց նա: