Ձեր վստահելի աղբյուրը

Արթուր Վանեցյանը՝ ՀՖՖ նորընտիր նախագահը, օրերս հայտարարեց, թե պատրաստվում է Հայաստանի մայրաքաղաքում նոր մարզադաշտ կառուցել:

Այս հայտարարությունը, կարծես թե, անհրաժեշտ ուշադրությանը հանրության կողմից չի արժանանում, բայց այն մի շարք հարցեր է առաջացնում:

1.  Անհասկանալի է, թե ինչու է մեզ նոր մարզադաշտ անհրաժեշտ։ Դժվար է հիշել, թե «Հանրապետականը» երբ է լեփ-լեցուն եղել վերջին անգամ:
2. Ինչո՞ւ կառուցել Երևանում. ենթադրենք՝ Վանեցյանը ճիշտ է, ու մեզ նոր մարզադաշտ է պետք, բայց ինչո՞ւ այն չկառուցել Աբովյանում, Վանաձորում կամ Գյումրիում: Դժվար չէ պատկերացնել, թե հավաքականի կամ ակումբային մակարդակի միջազգային հանդիպում այնտեղ անցկացնելու դեպքում ինչ աշխուժություն կառաջանա: Թող հավաքականը միայն Երեւանում չխաղա։ Որեւէ այլ բնակավայրում մարզադաշտն իր ենթակառուցվածքներով ուղղակի կաշխուժացնի կյանքն այնտեղ։ Ամեն ինչ չի կարելի կենտրոնացնել Երևանում։
3. Նոր մարզադաշտի համար անհարժեշտ են լինելու տասնյակ միլիոնավոր դոլարներ։ Մի՞թե ավելի լավ չէ դրանով ֆուտբոլը զարգացնել՝ պարզապես զանգվածաբար փոքր խաղադաշտեր կառուցել Հայաստանի տարբեր քաղաքներում և գյուղերում, ինչը թույլ կտա զարգացնել ֆուտբոլը, և համապատասխան ենթակառուցվածքներով կաշխուժացնի նաև մարզային կյանքը:
4. Անհասկանալի անճշտություններ կան «Հրազդան» մարզադաշտի պահով։ Վանեցյանն ասում է, որ գրավադրված է 26 մլն դոլարով։ Ա. Աղաբաբյանն ասում է, թե դա այդպես չէ, և գրավադրված  է ընդամենը 3 մլն-ով։
5. Եւ վերջապես, հետաքրքիր է իմանալ՝ Վանեցյանի հայտարարությունը քննարկման առարկա դարձե՞լ է ՀՖՖ նորընտիր գործկոմում, կա՞ն այլ տեսակետներ, թե՞ դարձյալ նույն նախկին մթնոլորտն է, երբ ֆեդերացիայի նախագահի ասածները և հայտարարությունները քննարկման ենթակա չէին: Մենք դրա մասին ի դեպ զգուշացրել ենք, երբ ընտրվեց գործկոմի ՔՊ-ական կազմ։

Գեղամ Նազարյան
«Այլընտրանքային նախագծեր խումբ»