Այս նոր իշխանությունը շատ ավելի մեծ թիրախ է դառնալու ՀԿ-ների կողմից. Իրավապաշտպան
«Ժողովրդավարական պետությունում ոստիկանությունը մի պարզ բան պետք է աներ, հայտարարեր, որ պատրաստ է պաշտպանել Հայաստանի բոլոր քաղաքացիների և բոլոր հյուրերի անվտանգությունը՝ անկախ ինչ-որ հատկանիշից, բայց դա չարվեց»,-Հանդուրժողականության համաշխարհային օրվան նվիրված «Խտրականության և արտելության խոսքի տարածումը, մշակութաբանական ընկալումներն ու հանրային կարծրատիպերը» թեմայով քննարկմանն ասաց «Իրական աշխարհ, իրական մարդիկ» ՀԿ-ից Հովհաննես Մադոյանը՝ խոսելով ԼԳԲՏ ֆորումի չեղարկման մասին։
Նա նշեց, որ ատելության ցանկացած կոչ կարող էր բերել կոնկրետ ֆիզիկական գործի, որոշ մարդկանց կարող էր նման կոչերը դրդեին կոնկրետ գործողությունների, միգուցե ֆորումի մասնակիցների մնալը Հայաստանում այդ մի քանի օրը վտանգված լիներ։ Հ. Մադոյանի խոսքով, նման թեմաները Հայաստանում, աշխարհում հաճախ ակտիվանում են քաղաքական կարևոր իրադարձությունների հետ կապված։
«Այն քաղաքական ուժերը, ովքեր ձախողել են իրենց քաղաքական օրակարգը, չեն կատարել խոստումները, ունեն մի գործիք՝ տարբեր խմբերի նկատմամբ ատելությունը մանիպուլյացնելով ձեռք բերել դիվիդենտներ։ Այս դեպքում տեսնում ենք դա»,- ասաց նա։
Քննարկմանը ներկա իրավապաշտպան Զառա Հովհաննիսյանն ասաց, որ այդ մանիպուլյացիոն գործիքը մշակված է, հաճախ ի հայտ է գալիս այն ժամանակահատվածում, երբ երկրում քաղաքական պրոցեսները հասնում են որոշակի հանգուցակետի՝ օրինակ հետհեղափոխական շրջան է, նախընտրական շրջան է, կամ որևէ շատ կարևոր հարցի լուծման վերաբերյալ քաղաքականության մշակման ժամանակահատված։
«Ուշադրությունը շեղելու համար ամբողջովին այդ գործիքը դրվում է գործի, թիրախավորվում են այն խմբերը, որոնք մշակութաբանորեն հասարակության կողմից դեռևս հասկացված չեն»,- ասաց Զ. Հովհաննիսյանը։
Իրավապաշտպանն այդ պահի հակաքարոզչությունը գնահատում է հենց այդ պատկերացումների ծիրում։
«Քաղաքական ուժերը պետք է լինեին քաղաքականապես ավելի գրագետ և հասուն։ Մենք ունենք իրավական բազա, բայց այսօր չունենք խտրականության համապարփակ օրենսդրություն։ Հաջորդ Ազգային ժողովն անպայման կանգնելու է այդ օրենքը մշակելու, ընդունելու ճանապարհին, որովհետև հասարակական կազմակերպություններն այլևս չեն լռելու։ Այս նոր իշխանությունը շատ ավելի մեծ թիրախ է դառնալու մեր ՀԿ-ների կողմից, պահանջը նրանցից ավելի մեծ է լինելու՝ ընդունել թե խտրականության դեմ համապարփակ օրենսդրություն, թե խտրականության դեմ պայքարի, թե ատելության խոսքի վերացման ուղղությամբ քայլեր ձեռնարկել»,- նշեց Զ. Հովհաննիսյանը։
Նա ասաց, որ խիստ է քննադատում այն երևույթը, որ Հայաստանում առաջին և երկրորդ դեմքով ֆորումի հետ կապված ընդհանրապես որևէ հայտարարությունն չեղավ։
«Պետություն, որը ժողովրդավարական արժեքների կրող է, այն իշխանությունը, որ թավշյա հեղափոխություն է արել, ասել է, որ այն բոլոր միջոցառումները, որոնք խաղաղ կերպով են կատարվում, Հայաստանում տեղ ունեն, պետք է գնահատական տար ոստիկանության հայտարարությանը։ Եթե իր ոստիկանությունն անկարող է պաշտպանել որևէ խմբի, նշանակում է, որ անկարող է պաշտպանել յուրաքանչյուր քաղաքացու իրավունք»,- նշեց իրավապաշտպանը։
ՀՔԱ Վանաձորի գրասենյակի ղեկավար Արթուր Սաքունցն ասաց, որ խտրականության երևույթը չթիրախավորեն ըստ տեսակների. «Սա հետևանք է իշխանության գործունեության, որն ունեցել է կամ իր գործունեությունը հիմնել է խտրական մտածելակերպի և խտրականության հիման վրա։ Այս առումով, իհարկե, հիմնական ուղերձը, պահանջը իշխանությանն է»։
Ա. Սաքունից խոսքով, չի կարող մարդու իրավունքի նկատմամբ խտրական վերաբերմունքը թույլատրելի լինել ըստ քաղաքական նպատակահարմարության։
Հարակից հրապարակումներ`
- Հայաստանում ԼԳԲՏ-ի քարոզը պետք է արգելվի. Տեր Կյուրեղ
- ԼԳԲՏ ֆորում Հայաստանում չի անցկացվի. Վալերիյ Օսիպյան
- Գերագույն հոգևոր խորհուրդ. Խստորեն մերժելի են և դատապարտելի ԼԳԲՏ ներկայացուցիչների կողմից հրահրումներ առաջացնելու քայլերը
- ԼԳԲՏ-ի հետ կապված պետք է որոշում կայացնել օրենսդրական մակարդակով. Փաշինյան
- Շուռնուխ գյուղում ծեծել են ԼԳԲՏ ակտիվիստների
- Երևանի քաղաքապետարանը ապամոնտաժել է ԼԳԲՏ թեմայով պաստառները