Ձեր վստահելի աղբյուրը

Հայաստանում նախորդ տարվա աշնանն ու ձմռանը գրանցվել է մեղուների զանգվածային անկում, պատճառը եղել է հիվանդությունը:

«Նոր հիվանդություն էր, տեղեկատվություն չկար դրա մասին,  մեղվաբույծները բուժեցին հին մեթոդներով, ոչ որակյալ դեղերով, դրա համար օգուտ չեղավ»,- Panorama.am-ի հետ զրույցում  ասաց «Հայաստանի մեղվաբույծների ազգային միավորում» հասարակական կազմակերպության փոխնախագահ Արմեն Նազարյանը:

Նրա խոսքով, Հայաստանի ողջ տարածքում մեղուների մոտավորապես 30 տոկոս անկում է արձանագրվել, իսկ օրինակ՝ Շամշադինի, Նոյեմբերյանի, Դիլիջանի կողմերում՝ մոտավորապես 80 տոկոս: Անկած մեղուների տեղը, Ա. Նազարյանի խոսքով, այս մեկ տարում չէին կարող լրացնել. «Եղել է դեպք՝ 180 հատով, 120 հատով մեղվաընտանիքներ են ունեցել, անխտիր բոլորն անկել են: Պետք է նոր մեղվաընտանիքներ գնեին: Ոչ մի օգնություն չի տրամադրվել: Եղան մարդիկ, որոնք կարողացան իրենց ուժերով գնել 10-20 հատ, եղան մարդիկ, որոնք հրաժարվեցին զբաղվել մեղվապահությամբ»:

ՀԿ փոխնախագահն ասաց, որ շատ դեպքերում են համապատասխան պետական գերատեսչություններին տեղյակ պահել մեղպահաների խնդիրների մասին, սակայն որևէ աջակցություն չեն ստացել:

«Ուղղակի հոգնել են պետությանը դիմելուց ու մերժում ստանալուց: Դրա համար այս անգամ ոչ մի մեղվաբույծ չէր դիմել»,- ասաց Ա. Նազարյանը:

Նա  նշեց, որ այս տարի վարակի դեպք չի գրանցվել, սակայն հստակ չի կարող ասել՝ ամբողջությամբ այն վերացել է, թե ոչ, քանի որ համապատասխան լաբորատոր ուսումնասիրություն է անհրաժեշտ, իսկ մեղվապահները հնարավորություն չունեն նման  լաբորատորիայի և հետազոտության համար:

Ա. Նազարյանի խոսքով, այս տարի մեղրի խնդիր կա՝ պայմանավորված ինչպես մեղուների քանակի նվազմամբ, այնպես էլ անբարենպաստ եղանակային պայմաններով:

«Գարնանը  տեղումները շատ էին, այնուհետև միանգամից շոգերը եկան: Դրա համար բույսերը նորմալ նեկտար չտվեցին: Երբ որ պետք է մի մեղվաընտանիքից 15-20 կիլոգրամ մեղր հավաքվեր, Հայաստանում հիմնականում 3-4 կիլոգրամ է հավաքվել: Դրա համար 4-5 անգամ քիչ մեղր է եղել»,- նշեց նա:

«Հայաստանի մեղվաբույծների ազգային միավորում» ՀԿ փոխնախագահի ներկայացրած տվյալներով, Հայաստանում ամեն շրջանում միջինը 8-10 հազար հատ մեղվաընտանիք կա:

Նա ընդգծեց, որ Հայաստանի մեղրը տարբերվում է մյուս երկրների մեղրից, քանի որ հայկականը բազմածաղկային  մեղր է, իսկ մյուս երկրներինը՝ միածաղկային:

«Կարելի է ասել, որ Հայաստանը միակ երկիրն է, որ ծաղկատեսակները բոլորը նաև դեղաբույսային են, ինչից էլ հենց մեղրի բուժիչ հատկություններն են գալիս»,- ասաց Ա. Նազարյանը:

ՀԿ փոխնախագահն ասաց, որ մեղվաբուծությունը Հայաստանում զարգացման կարիք ունի, անհրաժեշտ է պետական սուբսիդավորում, ապահովագրություն, նաև դասընթացներ, որպեսզի մարդիկ գրագետ մեղվաբուծություն անեն: