Ձեր վստահելի աղբյուրը

12։40
Նստացույց ԿԳՍՄ նախարարության առջև

Ակցիայի մասնակիցները շարժվեցին դեպի կրթության, գիտության, սպորտի և մշակույթի նախարարություն:

«Քանի որ այս ընթացքում ոչ նախարարը, ոչ կառավարության կողմից ոչ մի մարդ չիջավ, չներկայացավ, հիմա երթով շարժվելու ենք դեպի նախարարություն, շարունակելու ենք նստացույցով: Մենք կաթվածահար ենք անելու կրթության, գիտության, մշակույթի և սպորտի նախարարության աշխատանքը: Գտնում ենք՝  ավելի լավ է  այդ նախարարությունը չաշխատի, քան աշխատի Արայիկ Հարությունյանի ղեկավարությամբ»,- ասաց Ա. Գևորգյանը: 

12:17
Արայիկ Հարությունյանին տվել են 20 րոպե

Ա. Գևորգյանը հայտարարեց, որ 20 րոպե են տվել Արայիկ Հարությունյանին լքելու կառավարության  նիստերի դահլիճը:

«Հուսանք, կառավարությունը, իշխող թիմը, Արայիկ Հարությունյանը կգտնվեն այնքան խոհեմ ու կգնան այդ քայլին, այլապես կգնան կտրուկ գործողությունների»,- հայտարարեց նա:

Իսկ եթե 20 րոպեից չհեռնա ի՞նչ քայլեր եք անելու հարցին ի պատասխան Ա. Գևորգյանն ասաց, որ կքննարկեն:  

11։51
ՀՅԴ Հայաստանի Երիտասարդական միությունն ակցիա է իրականացնում ՀՀ կառավարության առջև: Նրանց միակ պահանջն է կրթության, գիտության, մշակույթի և սպորտի նախարար Արայիկ Հարությունյանի հրաժարականը:

«Արայիկ Հարությունյանը պետք է տուն գնա, տապալել է իրեն որպես նախարար: Հայաստանի կրթության, գիտության, մշակույթի և սպորտի նախարարը պետք է գործի հայկական տրամաբանությամբ: Նա այդ գործընթացում իրեն տապալել է, չի արդարացրել, ուրեմն պետք է նախարարը փոխվի,  գա նոր նախարար, որը լինի հայակենտրոն ու հայամետ»,-ասաց բողոքող երիտասարդ Արգիշտի Գևորգյանը: 

Երիտասարդներին նաև զայրացրել է այն փաստը, որ «Մել» ֆիլմի համար պետական ֆինանսավորում է եղել:

«Ասել են, որ այդ ֆիլմը նրա սեռափոխվածության մասին է, թե ինչպես է եղել, ինչ բարդություններ են եղել: Որպես հարկատուներ ու այս երկրի քաղաքացիներ, պահանջում ենք, որ Արայիկ Հարությունյանը հրաժարական տա: Չենք տա հարկեր այստեղ, եթե պետք է ուղղվի Մելի կամ այլ սեռափոխվածությունների մասին ֆիլմեր նկարահանելուն:

Մեր մեջ հերոսները շատ են: Մեր ժողովուրդն ունի շատ հերոսներ, ծանրորդներ, մարզիկներ, որոնց մասին կարելի է շատ ֆիլմեր նկարահանել ու ուղերձ հղել մեր երիտասարդներին: Սակայն սեռափոխված, Հայաստանի քաղաքացիությունից հրաժարված մարդու մասին ֆիլմ ֆինանսավորելը պարոն Հարությունյանի խայտառակությունն է»,- նշեց Ա. Գևորգյանը:

ՀՅԴ երիտասարդներն ասացին, որ շարունակելու են իրենց ակցիաներն այնքան, մինչև Ա. Հարությունյանը հրաժարական տա:

Նրանք դեմ են նաև  «Հայոց լեզու և գրականություն»,  «Հայոց պատմություն» առարկաները բուհերում ոչ պարտադիր դարձնելու ԿԳՄՍ նախարարության կողմից մշակված նախագծին:

«Մեզ մոտ տպավորություն է, որ Արայիկ Հարությունյանը հայ, ազգային, հայ եկեղեցի բառերի հետ խնդիրների ունի, անգամ իր հարցազրույցներում այդ մարդը քմծիծաղով է խոսում այդ եզրույթների մասին»,- ասաց բողոքող երիտասարդը: