Ամերիաբանկը շարունակում է պահպանել առաջատար դիրք Հայաստանի բանկային համակարգում
Վերջին 5 տարում Ամերիաբանկն իր գործունեության հիմնական ցուցանիշների մասով գրանցել է միջինում տարեկան 20% աճ և 2019 թվականի երրորդ եռամսյակի արդյունքներով շարունակում է պահպանել առաջատար դիրք Հայաստանի բանկային համակարգում: Այս մասին «Բիզնեսի ֆինանսավորում․ թվային նոր լուծումներ» խորագրով քննարկման ժամանակ ասաց «Ամերիաբանկի» մանրածախ բանկինգի տնօրեն Արման Բարսեղյանը:
Նրա խոսքերով՝ բանկն առաջինն է ակտիվների, պարտավորությունների, կապիտալի, զուտ շահույթի ցուցանիշներով և երկրորդը՝ ավանդների ծավալով։
Արման Բարսեղյանը նշեց, որ 2019 թվականի ինն ամիսների ընթացքում այդ հիմնական ցուցանիշների գծով բանկը միջինում մոտ 15% աճ է ապահովվել։
Մանրածախ բանկինգի տնօրենի խոսքով՝ բանկի ռազմավարական ուղղությունները մանրածախ բիզնեսն ու թվայնացումն են։
Ներկայացնելով որոշ ցուցանիշներ՝ Արման Բարսեղյանը հայտնեց, որ 2019 թվականի ընթացքում բանկի ֆիզիկական անձ հաճախորդների քանակը 200 հազարից հասել է մինչև 250 հազարի, մանրածախ ավանդների ծավալը 244 մլրդ դրամից սեպտեմբերի վերջին հասել է 270 մլրդ, իսկ ներկա պահին այն գերազանցել է 280 մլրդ դրամը։
Ինչ վերաբերում է վարկային պորտֆելին, ապա, ըստ բանախոսի, տարին սկսել են 115 մլրդ դրամ մանրածախ վարկային պորտֆելով, իսկ այսօրվա դրությամբ այն արդեն գերազանցում է 160 մլրդ-ը, ինչն այս տարվա 9 ամիսների կտրվածքով ենթադրում է 40 տոկոսի աճ։
Արման Բարսեղյանն անդրադառնալով հիպոթեքային վարկային պորտֆելին՝ նշեց, որ տարվա սկզբին պորտֆելը կազմում էր 45 մլրդ դրամ, իսկ այսօր արդեն կազմում է 70 մլրդ՝ ինն ամիսների կտրվածքով ապահովելով մոտ 50% աճ։ Նա նաև ասաց, որ հիպոթեքային վարկերի շուկայում ևս Ամերիաբանկն առաջատար է։
Մանրածախ բանկինգի տնօրենը ներկայացնելով այլ ցուցանիշներ՝ ընդգծեց, որ մասնավորապես, այս տարի ավտովարկավորման պորտֆելը 2 մլրդ-ից հասել է 3 մլրդ-ի՝ ապահովելով մոտ 40% աճ։ Այդ ծառայության գծով նույնպես բանկն առաջատար է։
Կարևորելով բանկային ծառայությունների զարգացման անհրաժեշտությունը մեր օրերում, Արման Բարսեղյանն ասաց, որ Ամերիաբանկը շարունակում է հանդես գալ թվային նոր լուծումներով: Մասնավորապես, անդրադառնալով օնլայն տարբերակով տրամադրվող սպառողական վարկերին, բանկի ներկայացուցիչն ասաց, որ սպառողական վարկերի պորտֆելը տարեսկզբի 14 մլրդ-ից հասել է 24 մլրդ դրամի՝ ապահովելով 70% աճ։
Նրա խոսքով՝ ներկայումս սպառողական վարկերի գերակշիռ մասն օնլայն թվային հարթակներով են տրամադրվում, այլ ոչ թե մասնաճյուղերում։
«Գրեթե բոլոր ծառայությունների գծով ունենք 40-50 տոկոս աճ։ Վարկային ծառայությունների աճին զուգահեռ Ամերկաբանկը ձևավորվել է բարձր որակի վարկային պորտֆել, մասնավորապես՝ ներկայումս ժամկետանց վարկերի տեսակարար կշիռը տարբեր ծառայությունների մասով չի գերազանցում 2-3%-ը»,- ասաց Արման Բարսեղյանը։
Նաև նշեց, որ 2019 թվականի երրորդ եռամսյակի տվյալներով՝ Ամերիաբանկի գործարքների 80 տոկոսից ավելին իրականացվում է թվային պլատֆորմների միջոցով: Այսինքն՝ բանկի մասնաճյուղերում փաստացի իրականացվում է գործարքների ընդհանուր թվի միայն 20 տոկոսը, մնացած գործարքները կատարվում են թվային հարթակներով։
Մանրածախ բանկինգի տնօրենը տեղեկացրեց, որ 2019 թվականի հունվար-սեպտեմբերին ինտերնետ-բանկի օգտագործողների թիվն ավելացել է 73%-ով, գործարքների քանակը՝ 111%-ով, վճարային տերմինալների միջոցով կատարվող գործարքները՝ 400%-ով, VPos կամ վիրտուալ էլեկտրոնային վճարումների գործարքների քանակն էլ աճել է 128%-ով։
Ինչ վերաբերում է բիզնես վարկավորմանը, Արման Բարսեղյանն ասաց, որ բիզնես վարկավորման մանրածախ պորտֆելը 18 մլրդ դրամից այս տարվա ինն ամիսներին աճել է մինչև 25 մլրդ-ի՝ ապահովելով մոտ 40% աճ։ Ընդ որում, նշված ժամանակահատվածում այդ պորտֆելում թվային, առցանց տրամադրվող վարկերի ծավալը երեք անգամ աճել է։
«Այս պահի դրությամբ ավելի քան 1000 բիզնես վարկեր են տրամադրվել առցանց՝ արժեքային արտահայտությամբ գերազանցելով 3 մլրդ դրամը»,- ասաց Արման Բարսեղյանը։
Հարակից հրապարակումներ`
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
