Ձեր վստահելի աղբյուրը

Երկրաշարժի հետևանքով անօթևան մնացած ընտանիքների բնակարանային խնդիրների լուծմանն ուղղված պետական աջակցության բնակապահովման ծրագրով (2008-2020 թթ.)  հաջորդ տարի 3.0 միլիարդ դրամով լուծվելու է 226 ընտանիքի բնակարանային խնդիր:   Լրագրողների հետ հանդիպմանն ասաց ՀՀ քաղաքաշինության կոմիտեի Բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը:

Նա նշեց, որ 2019 թվականի ծրագրով նախատեսված էր 288 ընտանիքի խնդրի լուծում՝ 1,85 մլրդ դրամով:

«2019 թվականի ծրագիրը նախատեսվածից անհամեմատ արագընթաց տեմպերով ստացվեց առաջ տանել»,- ասաց Տ. Արզումանյանը:

Հարցին՝ 2020 թվականին աղետի գոտում բնակարանային խնդիրը լուծված կլինի՞, Տանյա Արզումանյանն ասաց, որ եթե գումարը կա, պետական աջակցության  ծրագրի շահառու ճանաչված ընտանիքների բնակարանային խնդիրների լուծման նկատմամբ ձևավորված պարտավորությունները կառավարության  ծրագրով նախատեսված ժամկետում՝ 2020 թվականին, միանշանակ ավարտին կհասցվի:

Երկրաշարժի հետևանքով անօթևան մնացած ընտանիքների բնակարանային խնդիրների լուծմանն  ուղղված պետական աջակցության բնակապահովման ծրագրի շահառու էին ճանաչված 5396 ընտանիք Շիրակի, Լոռու և Արագածատոնի մարզերից: 2008-2017 թթ. ընթացքում 4838 ընտանիքի բնակարանային խնդիրները լուծման համար մոտ 65.0 մլրդ դրամ էր տրամադրվել:  2018 թվականի դրությամբ բնակարանային  պայմանների բարելավման կարիք ուներ 558 ընտանիք: 2018 թվականի ծրագրով բարելավվել է 44 ընտանիքի խնդիր (0.46 մլրդ դրամ): 

Տ. Արզումանյանն ասաց, որ աղետի գոտու բնակավայրերն ընդհանուր առմամբ դեռևս թոթափված չեն երկրաշարժի հետևանքներից, խնդիրը ոչ միայն բնակարանային և սոցիալական խնդիրների  մեջ է, նաև այդ քաղաքները քաղաքաշինական միջավայրի առումով  լիարժեք վերականգնված չեն:

«Դրան «նպաստում են» ոչ հիմնական շինությունները, որոնք կան քաղաքների տարբեր մասերում: Փաստագրվել են ոչ հիմնական 7219 շինություն՝   ավտոտնակներ, սովորական քարաշեն կառույցներ, մետաղական, փայտյա,  կիսաքարաշեն վագոն տնակներ: Ոչ հիմնական շինություններից 3531-ը Շիրակի մարզում է, 3530-ը՝ Լոռիում,  158-ը՝ Արագածոտնում: Գյումրիում տակների թիվը 2800-ն»,- նշեց նա:

Տ.Արզումանյանի ներկայացմամբ, դրանց 99 տոկոսը բնակության  նպատակով են օգտագործում. «Ովքե՞ր են այդ ընտանիքները: Մեծ կտորը բաժին է ընկնում ներքին միգրացիային, մի մասը ընտանեկան ներքին անհամաձայնությունների պատճառով գնել է տնակ ու ապրում է այդտեղ,   զգալի մասը երկրաշարժի հետևանքով  անօթևան մնացած ընտանիքներն են:  Բայց այս մասով ևս շատ տարբեր են նրանց կարգավիճակները. նրանց մեջ կան ընտանիքներ, որոնք նախկինում ստացել են բնակարաններ, վաճառել են, ընտանիքներ, որոնք ստացել են բնակարաններ, սակայն ընտանիքի մեծ լինելու պատճառով մի մասը տնակում է  ապրում, մի հատված կա, որ կորցրել են երկրաշարժի հետևանքով բնակարանները, սակայն սահմանված ժամկետում տարբեր պատճառներով չեն դիմել պետական ծրագրերում ընդգրկվելու համար, մի հատվածը նրանք են, ովքեր թեև դիմել են, բայց կորցրել են  նախկինում պետական ծրագրերի շրջանակներում իրենց բնակարանային պայմանները բարելավելու իրավունքը: Ձևավորվել է մոտեցում՝ փուլ առ փուլ, ըստ խմբերի անդրադառնալ ոչ հիմնական շինությունների խնդրին»:

Նա տեղեկացրեց, որ այս տարի հնարավորություն են ունեցել 2020-2022 թվականների  միջնաժամկետո հատվածում բյուջեից ֆինանսական միջոցներ  նախատեսել Գյումրիում 3 հատ, 1-ական Սպիտակում և Վանաձորում բազմաբնակարան շեքերի կառուցման համար:  Տ. Արզումանյանն ասաց, որ նաև Շիրակի մարզպետարանի կողմից բարձրացված 4 վթարային շենքերի խնդրի լուծման ուղղությամբ արդեն հանձնարարականներ կան: