Ձեր վստահելի աղբյուրը

«Քաղաքական մեծամասնությունն առաջնորդվում է ոչ թե իրավունքի գերակայությամբ, ոչ թե սահմանադրական նորմերի անմիջական  գործադրման պարտավարության ընկալմամբ, այլ սեփական  քաղաքական շահն առաջ տանելու մղումով»,- լրագրողների հետ հանդիպմանն ասաց ՀՅԴ ԳՄ անդամ Արծվիկ Մինասյանը:

Նա չի բացառում, որ ցանակցած փոփոխություն, առաջարկ, ինչպես նախընթաց ժամանակահատվածն է ցույց տալիս, ծնվում է  քաղաքական մեծամասնության առանձին ներկայացուցիչների մոտ զուտ  տվյալ պահին քաղաքական այս կամ այն շահը  սպասարկելու համար: Դաշնակցական գործչի գնահատմամբ, սա անտրամաբանական է:

«Բազմաթիվ նորմեր, որոնք ամրագրված են Սահմանադրական դատարանի մասին սահմանադրական օրենքում, Սահմանադրական դատարանի դատավարի համար նախատեսված էթիկական նորմերը պատգամավորները հաճախ վերածում են նորմատիվ այնպիսի բնույթի, որ իրենք են դառնում ՍԴ դատավորի դատավոր: Սա ակնհայտ սեփական լիազորությունները չգիտացող անձի վարքագիծ է, ճիշտ բան չէ, դեգրադացնում է  իրավական համակարգը»,- ասաց Ա. Մինասյանը:

Նրա խոսքով, ակնհայտ է, որ իշխող քաղաքական ուժի առանձին ներկայացուցիչներ այս լայնամասշտաբ հարձակումը, որ կազմակերպել են ՍԴ-ի նկատմամբ, և անհատապես թե դատարանի նախագահի, թե առանձին դատավորների, անգամ նկատի չեն առնում տարրական բարոյական մոտեցումներն ու ներմերը:

«Ամեն գնով իրենց նպատակին հասնելու այս ցանկությունը՝ վկայակոչելով ամենատարբեր բաներ, մենք համարում ենք ոչ ճիշտ, ոչ նպատակային, ոչ ըստ էության  արժեք ստեղծող  վարքագիծ»,- ասաց նա:

Խոսելով «գրիչի» պատմության մասին, Ա. Մինասյանը ամոթ  է համարում միջին մակարդակի կամ ԱԺ փոխնախագահի մակարդակով արտաբերած ցածրակարգ մոտեցումները, նրա խոսքով, պատիվ չի բերում երկրի կառավարման համակարգում ներգրաված մարդկանց այս մակարդակի զրույցները:

«Բայց այն, որ  գործող քաղաքական իշխանությունը՝ թե գործադիր, թե օրենսդիր մակարդակներում, նաև իրավապահ մարմինների միջոցով ակնհայտորեն, անթաքույց հարձակում են գործել դատական իշխանության նկատմամբ, վաղուց է հայտնի: Քաղաքական իշխանությունն ամեն գնով, նույնիսկ այս ցածրակարգ մակարդակի՝ գրիչ նվիրելուց սկսած ավարտած գրկախառնությունների մեխանիզմներով, փորձ է անում ազատվել ՍԴ-ից: Եկել է ժամանակը և պահը, որ հայ հասարակությունը, քաղաքական ուժերը, բոլոր այն շարժումները, ում համար չափազանց կարևոր է իրավական պետության  նվազագույն սկզբունքների պահպանումը, դեմ արտահայտվի այս մոտեցումներին, կանկրետ քաղաքական ակցիաներ պետք է իրականացվեն, պետք է զսպվի քաղաքական իշխանության ախորժակը, քաղաքական իշխանության անբացատրելի, հակաօրինական ախորժակը:

Մեկը մեկի դեմ հանելու, սեփական ցանկությունն ամեն գնով ժողովրդի անվան տակ փաթեթավորելու իշխանության վարքագիծը տանելու է առճակատման, օր առաջ հասարակության պատասխանատու քաղաքական, հանրային հատվածը պետք է միավորվի այս օրակարգի շուրջ՝ թույլ չտալու սահմանադրական կարգի հերթական տապալումը»,-ասաց Դաշնակցական գործիչը:

Ա. Մինասյանի խոսքով, ՍԴ-ի դեմ պայքարի իշխանության գործեալոճը կամակոր երեխայի անբացատրելի ցանկությունների դրսևորման մի օրինակ է, երբ քաղաքական մեծամասնություն իրեն կամակոր, չարաճճի երեխայի պես է պահում՝ ինչ ուզել է, ստացել է, հիմա իրեն թվում է, թե պետք է ուզի Սահամանդրական դատարան խաղալիքը՝ «տվեք ինձ, պետք է տաք և վերջ, ով չտվեց, ուրեմն պատժել նրան»:

«ՍԴ-ն իսկապես խաղալիք չէ և ոչ էլ քաղաքական մեծամասնության հլու հնազանդ ենթական: ՍԴ-ն որ օրը դարձավ քաղաքական իշխանության, մեծամասնությանն խոսքերը, ցանկությունները կատարող, այդ պահից մենք ոչ միայն չենք ունենալու ՍԴ, ընդհանրապես պետք է մոռանալ սահմանադրության արդյունավետ կենսագործման մասին»,- ասաց Ա. Մինասյանը: