Ձեր վստահելի աղբյուրը

«Առաջարկում ենք դատավորի թեկնածուի հավակնորդին ներկայացվող պահանջներում կատարել փոփոխություն»,- այսօր խորհրդարանում ասաց ԱԺ «Իմ քայլը» խմբակցության պատգամավոր Արթուր Դավթյանը։

Նշենք, որ խորհրդարանը քննարկում է «ՀՀ դատական օրենսգրքում փոփոխություններ կատարելու մասին» օրենքի նախագիծը։

Արթուր Դավթյանի խոսքով, կրթական ցենզը առաջին ատյանի դատարանի դատավորների համար ավելի խիստ է, քան ՍԴ դատավորների համար.«ՍԴ դատավորի համար սահմանված կրթական ցենզը պետք է բավարարի, որ մարդը կարողանա հավակնել առաջին ատյանի դատարանի դատավորի պաշտոնին»։

Ներկայումս այն անձն է հավակնում դատավորի պաշտոնին, ով ունի բակալավրի և մագիստրոսի կրթություն։ Բայց Դավթյանը նշեց, որ իրենք առաջարկում են այս կարգավորմանը զուգահեռ ևս մեկ տարբերակ գործառնել, ըստ որի՝ դատավորի հավակնորդ կարող է դառնալ բակալավրի կրթություն և 10 տարի իրավաբանի մասնագիտական ստաժ ունեցող անձը։

Դավթյանը ասաց, որ ՍԴ դատավոր դառնալու համար պարտադիր չէ մագիստրատուրայի կրթությունը, և եթե անձը կարող է բակալավրի կրթությամբ դառնալ ՍԴ դատավոր, ապա, ըստ նրա, նույն կրթական ցենզն ունեցող մարդը կարող է նաև առաջին ատյանի դատարանի դատավոր դառնալ։

ԱԺ «Իմ քայլը» խմբակցության պատգամավոր Գոռ Գևորգյանը նշեց՝ իշխանությունն անընդհատ պնդում է, որ պետական համակարգը պետք է լինի գիտելիքահեն, իսկ այս դեպքում հարց է առաջանում՝ աշխատանքային փո՞րձ, թե՞ գիտելիք։

Պատասխանելով Գևորգյանի հարցին, թե ենթադրենք անձը 2005 թվականին բակալավրիատն ավարտել է և 15 տարվա մասնագիտական ստաժ ունի, դատավորի հավակնորդ դառնալու համար մենք պահանջում ենք, որ նա մագիստրատուրա ավարտած լինի,  Արթուր Դավթյանը ընդգծեց. «Երբ ՍԴ դատավորի համար մենք չենք պարտադրում մագիստրատուրայի կրթությունը, ապա ավելի ցածր՝ առաջին ատյանի դատարանի դատավորի համար էլ չպետք է պարտադրենք»։

ԱԺ «Իմ քայլը» խմբակցության պատգամավոր Սոֆյա Հովսեփյանն էլ նկատեց, որ առաջարկվող 10 տարվա շեմը բարձր է, քանի որ 3-5 տարվա իրավաբանի աշխատանքային փորձի ընթացքում բավականին մեծ գործընթացներում է ներգրավված լինում անձը.

«Գուցե պարտադիր մագիստրատուրան և 5 տարվա ստաժը բավական լինեին, որ անձը դառնա դատավոր։ Այդ դեպքում նաև երիտասարդ կադրերի խնդիրը չէր լինի»։

Արձագանքելով՝ Արթուր Դավթյանն ասաց, որ դատավոր դառալու համար արդեն իսկ կա նմանատիպ պահանջ՝  բակալավրի և մագիստրատուրայի կրթություն և 3 տարվա աշխատանքային փորձ։