Ձեր վստահելի աղբյուրը

Բարձրագույն ուսումնական հաստատությունների ընդունելության քննությունների արդյունքում բարձր միավորներ ստացած, բայց  բուհեր չընդունված դիմորդներն ու նրանց ծնողներն այսօր կրկին հավաքվել են Ազգային ժողովի դիմաց:

Ծնողներից մեկն ասաց, որ փոփոխությունները պատկան մարմինները բավականին աղավաղված են բացատրել, մարդիկ չեն էլ հասկացել:

«Գերազանցիկ երեխան պետք է գնա, նստի տանը, 7,5 միավոր ստացածը սովորի՞: Սա՞ է մեր երկրի ապագան լինելու»,- նշեց ակցիայի մասնակից Խաչատուր Նազարեթյանը:

Այսօր Ազգային ժողովում քննարկում է լինելու կապված այս խնդրի հետ, ծնողները ցանկանում են, որ գոնե իրենցից էլ մարդ ներկա լինեն, որպեսզի իրենք լսեն հարցերն ու պատասխանները:

Հարցին՝ ի՞նչ սպասելիք ունենք այսօրվա քննարկումից, Խ.Նազարեթյանն ասաց. «Որ այսպիսի նախարար ունենանք, եթե ինքը պետք է որոշի, դժվար լավ բան սպասենք: Սրա համար չենք արել հեղափոխություն, որ մեր երխաները մնան դրսում:  Նախարարն առաջարկում է՝ թող գնա ձեր երեխան թուրքագիտություն սովորի, իմ երեխան չի ուզում սովորի: Ասում եմ՝ թող երեք քննություն հանձնեին, պատասխանում է՝ վտանգավոր է: Ասացի՝ սենց որ շարունակվի, դուք ավելի վտանգավոր եք մեր երեխայի համար, քան կորոնավիրուսը» :

Հայկ Աբելյանն ասաց, որ առաջին հայտով նշել է իրավագիտական բաժին, 15,75 միավորով անցել է 10-րդ հայտով նշված հնագիտության բաժին:

Նա նշեց, որ կատարվել են փոփոխություններ, սակայն հավուր պատշաճի չեն տեղեկացրել այդ փոփոխությունների մասին: Հայկի խոսքով, 739 դիմորդ բավարար գնահատական է ստացել ու որևէ տեղ չի անցել, կան հարյուրավոր դիմորդներ, որոնք ընդունվել են, բայց ոչ իրենց ցանկացած բաժինը:

«Պայքարի միջոցով պետք է հասնենք խնդրի լուծմանը»,- ասաց դիմորդ Հայկ Աբելյանը:

Ծնողներին նաև ասել են, որ ԱԺ-ում նիստ փակ է: Նրանց զայրացել է այդ փաստը.

«Թող բաց լինի, շահագրգիռ մարդիկ ներկա լինեն: Իշխանափոխություն եղավ սրա համա՞ր, որ բոլոր հարցերը դռնափակ լուծվեն»:

«Այս երեխաներն են հեղափոխություն արել, որոնք դասերից դուրս էին գալիս, կանգնում ասֆալտին: Հեղափոխությունն ի՞նչ է մեզ տվել, ինչի՞ համար ենք դա արել: Այս ղեկավարությունը չի ուզում այդ երեխաներին գոնե մեկ շանս տա, արտոնություն տա: Շատ բան չեն ուզում, ուզում են սովորել»,- նշեցին ծնողները:

Հիշեցնենք, որ նախօրեին նրանք հավաքվել էին նախ  Գնահատման ու թեստավորման կենտրոնի մոտ, այնուհետև Ազգային ժողովի: Նրանք պահանջում են, որպեսզի ավելացվեն տեղերը,  բոլոր դրական ստացած դիմորդները  համարվեն ընդունված, իսկ արդեն առաջին կիսմայակի վերջում ցածր առաջիմություն ցուցաբերած ուսանողները հեռացվեն:

Ծնողներն ասացին, որ չեն հեռանա ԱԺ մոտից, մինչև չներկայանա կրթության, գիտության, մշակույթի և սպորտի նախարարը, բողոքի ակցիա կանեն նաև նախարարության դիմաց, կսպասեն նախարարին այնքան, մինչև  կներկայանա: