Ձեր վստահելի աղբյուրը

«Մեկ Հայաստան» կուսակցության իրավական հանձնախումբը նախապատրաստել է «Մի խումբ բարձրաստիճան անձանց կողմից պետական դավաճանություն կատարելու մասին» հաղորդում, որը կներկայացվի ՀՀ գլխավոր դատախազին: Ասուլիսում կուսակցության նախագահ Արթուր Ղազինյանը նախ անդրադարձավ 2020թ. նոյեմբերի 17-ին ՀՀ ԶՈւ ԳՊ պետ Օնիկ Գասպարյանի հայտարարությանը՝ նշելով, որ վարույթ իրականացնող մարմինը պետք է պարզի՝ ձեռնարկվե՞լ են արդյոք բոլոր հնարավոր քաղաքական, դիվանագիտական միջոցները պատերազմը կանգնեցնելու համար, գնահատի դրանց համարժեքությունը ստեղծված իրավիճակին, պարզի, թե կոնկրետ ինչպիսի՞, ի՞նչ բնույթի և ծավալի փորձեր, առաջարկություններ են արվել կանգնեցելու պատերազմը։

«Վարույթ իրականացնող մարմինը պետք է պարզի, թե Հայաստանի վարչապետը ՌԴ նախագահ Վլադիմիր Պուտինի՝ այդ պահին հայանպաստ առաջարկությունը մերժելուց ո՞ր իրավասու մարմինների հետ է  խորհրդակցել, խորհրդկացե՞լ է  առահասարակ, թե՞ ոչ, տեղյա՞կ է  եղել ՀՀ Զինված ուժերի գլխավոր շտաբի պետը Պուտինի առաջարկի մասին, թե՞ ոչ, ի՞նչ  պայմաններով,  պատճառներով է մերժվել ՌԴ նախագահի առաջարկությունը ՀՀ վարչապետի կողմից։

Հարկ է պարզել, թե որքա՞ն տարածքային և մարդկային կորուստներ են արձանագրվել հոկտեմբերի 19-ից հետո, գտնի ՀՀ բարձրագույն իշխանության ներկայացուցիչների գործողությունների շարժառիթներն ու դրդապատճառները։ Այսինքն, եթե կանգնեցվեր պատերազմը հոկտեմբերի 19-20-ին, որքա՞ն տարածքային կորուստներից, զոհերից հնարավոր կլիներ խուսափել։

Հետևաբար, այս գործողությունը պետք է արժանանա վարույթ իրականացնող մարմնի քրեաիրավական գնահատականին՝ պարզելով, թե ինչ դրդապատճառներով, ինչպիսի հանգմանքներում է տեղի ունեցել ՌԴ միջնորդական առաքելության խափանումը Հայաստանի քաղաքական իշխանության կողմից»,- ասաց Ա. Ղազինյանը։

Անդրադառնալով գեներալ-գնդապետ Մեվսես Հակոբյանի՝ նոյեմբերի 19-ին արված բացահայտումներին, «Մեկ Հայաստան» կուսակցության նախագահը նշեց, որ վարույթ իրականացնող մարմինը քրեական գործի հարուցման պարագայում պետք է պարզի ՀՀ ԶՈւ սպառազինության ձեռքբերման պլանի փոփոխության պատճառը, նպատակը, այն իրականացնող անձնաց շրջանակը, բացահայտվի նշված անպիտան տեխնիկայի ձեռքբերման պայմանները, աղբյուրը, տրամադրված միջոցները։

«Նախաքննության առարկա պետք է դառնա թիվ 0038 հույս գաղտնի հրամանի հիմքերը, նպատակները, հրաման արձակած և ի կատար ածած պաշտոնատար անձանց ցանկը։

Առանձնակի կարևորություն է ներկայացնում սեպտեմբերի 30-ին Նիկոլ Փաշինյանի կողմից  Զինված ուժերի լրահամալրումը կասեցնելու մասին հրամանի  էությունը, բովանդակությունը, նպատակները, դրդապատճառները, գնահատվի այդ հրամանի կատարման ու  Արցախում արձանագրված մարդկային, տարածքային կորուստների հետ պատճառահետևանքային կապը»,- ասաց Ա. Ղազինյանը։

Նրա խոսքով, հարկ է պարզել՝ ՀՀ վարչապետը և ԱԳ նախարարը գիտակցում էին արդյոք, որ ՀՀ կողմից բանակցությունների տապալումը անխուսափելիորեն հանգեցնելու էր Ադրբեջանի կողմից պատերազմ սանձազերծելու լեգետիմության հիմքերի ամրապնդման և ապահովման։

«Նախաքննության հատուկ առարկա պետք է հանդիսանա ՀՀ-ում ռազմական դրության հայտարարելու մասին որոշման և այդ որոշման կատարումն ապահովող օրենսդրական և ենթաօրենսդրական ակտերի ընդունման նպատակը՝ պետական դավաճանության գործընթացը կանխելու բոլոր փորձերը ռեպերսիվ մեքենայի միջոցով ճնշելու նպատակի ենթատեքստում։

«Պատերազմի ողջ ընթացքում հասարակությանը սուտ և կեղծ պաշտոնական տեղեկատվություն հաղորդելը, հաղթանակի պատրանք ստեղծելը պետք է վարույթ իրականացնող մարմինը դիտարկի պետական դավաճանության ծրագիրն անխափան և հանրային բարձր լեգիտիմության պայմաններում ավարտին հասցնելու համատեքստում»,- ասաց Ա. Ղազինյանը։

Նա ընդգծեց՝ այս ամենը վկայում է, որ Հայաստանի բարձրագույն ղեկավարությունը գործել է ի վնաս Հայաստանի ինքնիշխանության, տարածքային անձեռնմխելիության, արտաքին անվտանգության՝ օգտագործելով պետական ապարատի ռեսուրսները։

«Պահանջում ենք օրենքով սահմանված կարգով հարուցել քրեական գործ, իրականացնել քրեական գործի բազմակողմանի, լրիվ, օբյեկտիվ քննություն, բացահայտել և քրեական պատասխանատվության ենթարկել  կատարվածի համար մեղավոր բոլոր անձանց։

Հաղորդումն ուղղվում է  ՀՀ գլխավոր դատախազ Արթուր Դավթյանին, դատախազից ակնկալում ենք գործի հարուցում, գործն ԱԱԾ քննչական դեպարտամենտ ուղարկել գործի լրիվ, համակողմանի, բազմակողմանի նախաքննություն իրականացնելու համար։ Դատախազության կողմից որևէ այլ գործողություն մեր կողմից կգնահատվի որպես պատասխանատվությունից խուսափելու փորձ դատախազության կողմից»,- նշեց Արթուր Ղազինյանը։