Ձեր վստահելի աղբյուրը

«Եթե իշխանությունը փորձի կիրառել վարչական ռեսուրս, եթե իշխանությունը փորձի տարբեր եղանակներով կեղծի ընտրությունները, այո, այդ դեպքում լինելու են հետընտրական գործընթացներ, որոնք կարող են ունենալ նաև անկանխատեսելի  հետևանքներ»,-ասուլիսում հայտարարեց «Հայաստան» նախընտրական դաշինքի առաջնորդ, ՀՀ երկրորդ նախագահ Ռոբերտ Քոչարյանը:

Նա նշեց, որ այս իշխանությունը չունի բավարար ռեսուրս նման կարգի լկտիություն ցուցադրելու համար:

Պատասխանելով հարցին` եթե լինեն հետընտրական զարգացումներ, կլինե՞ք այն ուժը, որը կգեներացնի հետընտրական գործընթացները, Ռ.Քոչարյանն ասաց. «Այո, իհարկե»:

Անդրադառնալով սոցհարցումներին և պատասխանելով հարցին, որ ըստ դրանց ՀՀ-ում Նիկոլ Փաշինյանի ռեյտինգը  բարձր է, «Քաղաքացիական պայմանագիր» կուսակցությանն ընտրողներ կան, ո՞րն է «Հայաստան» դաշինքի հույսը, ինչպե՞ս եք ընտրվելու, Ռոբերտ Քոչարյանն ասաց. «Բոլոր այդ հարցումները, ինչքան ես գիտեմ, հեռախոսային են: Հեռախոսային հարցումներն ընդունված են աշխարհում, բայց սովորաբար այն երկրներում են ամբողջությամբ արժանահավատ, որտեղ չկա այսպիսի ներքին բևեռվածություն:

Երբ որ մեկ լայքի համար մարդուն հեռացնում են աշխատանքից, եթե մարդ աշխատում է  բյուջետային ոլորտում, անմիջապես հարազատների վրա ճնշումներ են սկսում գործադրվել, ինչպե՞ս եք պատկերացնում:

Կա մի ստվար զանգված, որը չի ուզում իր կարծիքը հայտնել, մտածում է ճնշումների տակ կհայտնվի:

Մենք չենք ասում, որ այսօրվա պաշտոնակատարը վարկանիշ չունի, բայց վստահ ենք, որ 25-30 տոկոս ունենալով խորհրդարանում՝ հնարավոր չէ վերընտրվել վարչապետ և ձևավորել կառավարություն, եթե քեզ հետ չլինեն այլ ուժեր, որոնք  պատրաստ են քեզ հետ համագործակցել: Սա էլ է փաստ: Դեռ  ընտրությունների մասնակիցների ցանկում չի երևում որևէ քաղաքական ուժ, որը նույն դաշտից է, պատրաստ է դավաճանների հետ համագործակցել և որը կարող է անցնել խորհրդարան: Բավական հստակ է իրավիճակը. եթե նույնիսկ այդ 30 տոկոսը  չհաջողվի մաշեցնել մինչև 15-20 տոկոս, այդ քաղաքական ուժն ի վիճակի չի լինելու ձևավորել կառավարություն, վերահսկողություն սահմանել գործադիր իշխանության վրա:

Բայց ամեն ինչ անելու ենք, որ մաշեցնենք մինչև քոք»:

«Հայաստան» դաշինքի մաս կազմող «Վերածնվող Հայաստան» կուսակցության նախագահ, Սյունիքի նախկին մարզպետ Վահե Հակոբյանն ասաց, որ ոչ մի հարցում չի կարող արտացոլել օբյեկտիվ պատկերը՝ հատկապես հիմա, հատկապես Հայաստանում այսպիսի խառն իրավիճակում:

«Ինձ գոհացնում է այն տենդենցը, որ տեսնում ենք վերջին 1-2 ամսում: Իսկ այդ տենդենցն ի օգուտ մեզ է, միանշանակ»,-նշեց Վահե Հակոբյանը: