06.06.2021. «Հենակետ». Արցախյան շաբաթ
«Հենակետ» վերլուծական կենտրոնն ամփոփել ու հրապարակել է համառոտ տեղեկություններ ընթացիկ շաբաթվա ընթացքում Արցախում և Արցախի շուրջ տեղի ունեցած իրադարձությունների վերաբերյալ.
«Ընդհանուր բնույթի տեղեկություններ
ԱՀ դատախազությունից հայտնել են, որ քրգործ է հարուցվել Ադրբեջանի զինուժի առաջխաղացման համար նախապես ճանապարհ հարթելու առթիվ։ Հիշեցնենք, որ 44-օրյա պատերազմից հետո Արցախում բավականին ակտիվ լուրեր էին պտտվում, որ տարբեր բարձրաստիճան պաշտոնյաների կողմից Հադրութի անտառներով ճանապարհ է նախապես հարթվել, ինչի օգնությամբ էլ հակառակորդին հաջողվել է առաջխաղացում ունենալ։
Շաբաթվա ընթացքում համացանցում լուրեր էին շրջանառվում, որ Արցախում թշնամու արձակած կրակից զոհ կա։ Ըստ որոշ տեղեկությունների՝ Լիսագորի հատվածում թշնամին կրակ է բացել մեքենաների ուղղությամբ։
Արցախի նախագահի խոսնակը լրագրողների հետ զրույցում հերքել է այտ տեղեկությունները։
ՌԴ խաղաղապահների մասին
ՌԴ ՊՆ ից հայտնում են, որ ռուս խաղաղապահները կենցաղային իրեր և սննդի փաթեթներ են հանձնել ներքին տեղահանված անձանց և բազմազավակ ընտանիքներին: Ընդհանուր առմամբ՝ այս շաբաթ ավելի քան 150 ընտանիք ռուս խաղաղապահներից ստացել է հասցեական մարդասիրական օգնություն: Մարդասիրական արձագանքման կենտրոնի աշխատակիցները հասցեկան օգնություն ցուցաբերելու անհատական մոտեցում ունեն:
Պաշտոնական լրահոս
ԱՀ նախագահ Արայիկ Հարությունյանը մայիսի 30-ին այցելել է Մարտունի շրջկենտրոն և ծանոթացել քաղաքում իրականացվող շինարարական աշխատանքների ընթացքին:
Հարությունյանը հունիսի 2-ին այցելել է ԱՀ պետնախարարի աշխատակազմ և կառավարության անդամներին ու պետնախարարի աշխատակազմի աշխատակիցներին ներկայացրել նորանշանակ պետական նախարար Արտակ Բեգլարյանին:
Նույն օրը Արայիկ Հարությունյանը աշխատանքային շրջայց է կատարել Ասկերանի շրջանում։ Այցի ընթացքում նախագահը հանդիպումներ է ունեցել Խանապատ և Խրամորթ համայնքների բնակիչների հետ: Քննարկվել են ինչպես անվտանգային, այնպես էլ սոցիալ-տնտեսական խնդիրները
ԱՀ Նախագահը հրամանագիր է ստորագրել ՆԳ նախարարի առաջին տեղակալ նշանակելու մասին: Ըստ հրամանագրի՝ ՆԳ նախարարի առաջին տեղակալ է նշանակվել գնդապետ Սամվել Պետրոսյանը:
ԱՀ նախագահ Արայիկ Հարությունյանը հունիսի 4-ին պետական և զինվորական բարձրաստիճան պաշտոնյաների հետ Ստեփանակերտի քաղաքային հուշահամալիրի մոտ դիմավորել է հայրապետական այցով Արցախ ժամանած Ամենայն հայոց կաթողիկոս Ն.Ս.Օ.Տ.Տ. Գարեգին Բ-ի գլխավորած պատվիրակությանը: Վեհափառ Հայրապետը և Կաթողիկոսի հետ Արցախ ժամանած ՀԲԸՄ նախագահ Պերճ Սեդրակյանը ծաղկեպսակներ են դրել քաղաքային հուշահամալիրում: Այնուհետև, Գարեգին Բ-ի գլխավորությամբ կատարվել է հոգեհանգստյան պաշտոն՝ ի հիշատակ հայրենիքի համար նահատակվածների:
Վեհափառ Հայրապետը այցելել է նաև Ամարասի Վանք , տեղում ծանոթացել 44-օրյա պատերազմից հետո Արցախում ստեղծված անվտանգային իրավիճակին։ Կաթողիկոսը հանդիպել է նաև այդ օրերին Արցախում գտնվող, «Պատիվ ունեմ» դաշինքի վարչապետի թեկնածու Արթուր Վանեցյանի հետ։
ԱՀ ԿԳՄՍ նախարարը հայտարարել է, որ Արցախի դպրոցներն ընթացիկ ուսումնական տարում թողարկում են 1141 շրջանավարտ։ Նրանցից 857֊ը դպրոցն ավարտում է Արցախում, մնացած 284֊ը թշնամու կողմից սանձազերծված պատերազմի պատճառով՝ Մայր հայրենիքի կրթօջախներում։
Արցախի ԱԻՊԾ հայտնում են, որ զինադադարից հետո Արցախի վերահսկողությունից դուրս գտնվող տարածքներից 1557 աճյուն է տարհանվել։
ԼՂ հակամարտության մասին
ՌԴ ԱԳՆ խոսնակ Մարիա Զախարովան հայտարարել է , որ ԼՂ շուրջ իրավիճակի կարգավորման ուղղությամբ աշխատանքներն իրականացվում են ամեն օր: Ըստ նրա` խոսքը ոչ միայն քաղաքական ջանքերի, այլ նաեւ երկրի ղեկավարության դիվանագիտական, ինչպես նաեւ անձնական ջանքերի մասին է:
Ֆրանսիայի նախագահ Էմանուել Մակրոնը հայտարարել է , որ շատ կարևոր հարց է պատմամշակութային ժառանգության պահպանությունը ԼՂ-ում և շրջակա տարածքներում։ Թե՛ քրիստոնեական, թե՛ մահմեդական ժառանգությունը պետք է անպայման պահպանվի։ Որպես ԵԱՀԿ Մինսկի խմբի համանախագահ երկիր` ԱՄՆ-ի և Ռուսաստանի կողքին, Ֆրանսիայի պարտքն է ամեն ինչ անել, որ կողմերը հասնեն դեէսկալացիայի և հաստատեն երկխոսություն:
Ի պատասխան Մակրոնի այս հայտարարության, Ադրբեջանի ԱԳՆ-ից հայտարարել են, որ ողջունում են Ֆրանսիայի նախագահի հայտարարությունը մահմեդական հուշարձանների վերականգնման վերաբերյալ: Սակայն «Լեռնային Ղարաբաղ» անվան հետ կապված, որը Ֆրանսիայի նախագահն իր խոսքում նշել է, Բաքվի համար նման վարչատարածքային միավոր գոյություն չունի»։
Հարակից հրապարակումներ`
- 05.06.2021. «Հենակետ». Ադրբեջանցիները դիրքավորված՝ ամուր հենակետեր են դնում նաև Գեղամասար համայնքում
- 31.05.2021. «Հենակետ». Ալիևը և Էրդողանը քննարկում են Ղարաբաղում վերականգնողական աշխատանքները
- 30.05.2021. «Հենակետ». Ինչ է կատարվել Արցախում և Արցախի շուրջ՝ մեկ շաբաթում
- 24.05.2021. «Հենակետ». Ադրբեջանը Շուշին ներկայացնելու է Դուբայի միջազգային զբոսաշրջային ցուցահանդեսում
- 23.05.2021, «Հենակետ». Արցախում և Արցախի շուրջ տեղի ունեցած իրադարձությունները՝ մեկ շաբաթում
- 17.05.2021. «Հենակետ». Ադրբեջանի հետ կապված կարևոր իրադարձությունները՝ վերջին մեկ շաբաթում
- 16.05.2021. «Հենակետ». Արցախյան մեկ շաբաթը
- 15.05.2021. «Հենակետ». Անվտանգության հարցերը՝ մեկ շաբաթում
- 10.05.2021. «Հենակետ». Ադրբեջանական մեկ շաբաթը
- 09.05.2021. «Հենակետը»՝ Արցախում և Արցախի շուրջ տեղի ունեցած վերջին իրադարձությունների վերաբերյալ
- 03.05.2021. «Հենակետ». Ադրբեջանի հետ կապված կարևոր իրադարձությունները՝ մեկ շաբաթում
- 01.05.2021. «Հենակետ». Անվտանգության հարցերը՝ մեկ շաբաթում
- 26.04.2021. «Ադրբեջանական շաբաթը»՝ ըստ «Հենակետի»
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ