Ձեր վստահելի աղբյուրը

Սննդի առաքման ծառայություն մատուցող Menu.am ընկերությունը մոլորեցնում է սպառողին։ Նման գնահատական տվեց «Իրազեկ և պաշտպանված սպառող» ՀԿ նախագահ Բաբկեն Պիպոյանը  Panorama.am-ի հետ զրույցում՝ արձագանքելով Menu.am-ի աշխատանքից դժգոհ քաղաքացու բողոքին։ 

Հիշեցնենք, որ այս իշխանության օրոք էկոնոմիկայի նախարարի պաշտոնին նշանակված Վահան Քերոբյանի հիմնադրած Menu.am-ից սպառողը պատվերը կատարել էր ժամը 18։32-ին, սնունդ տեղ էր հասել ժամը 22։05-ին, որ պատվեր կատարած անձն այն արդեն չեղարկել էր ու այդ տարածքում չէր գտնվում։ Մինչդեռ ընկերությունը խոստանում է  արագ առաքում, որը կտևի միջինը 40 րոպե, նույնիսկ 15 րոպեում։

«Նմանատիպ խնդիրների կարգավորման համար շատ կարևոր է, որ կամայական բիզնես հասկանա՝ իր կողմից գովազդվող տեղեկատվության հետևից գալու է համապատասխան մարմինն ու կիրառելու է սանկցիա»,-նշեց Պիպոյանը։

Նա մանրամասնեց, եթե ընկերությունը գովազդում է առաքման տևողություն, որը միակ ինֆորմացիան է պատվերի տեղ հասնելու մասին, պատվերի դեպքում հետադարձ կապ չեն հաստատում ընկերությունից, չեն տեղեկացնում, որ օրինակ փողոցում խցանում է ու պատվերը կլառաքվի ոչ թե 40 րոպեից, այլ երկու ժամից, ապա այս  պարագայում գործ ունենք ոչ թե անփույթ աշխատանքի հետ, այլ բացառապես մոլորության հետ։

«Այս պարագայում պետք է և կարող է  քայլեր ձեռնարկել մրցակցային մարմինը»,-ընդգծեց նա։

ՀԿ նախագահն առաջիկայում մասնակցելու է Մրցակցության պաշտպանության հանձնաժողովի նիստին, որտեղ քննարկելու են զեղչերի, ակցիաների ժամանակ սպառողներին մոլորեցնելու վերաբերյալ իրավական կարգավորումը։

«Կարծեք մրցակցային մարմինը ցանկանում է սպառողին մոլորեցնելու հոդվածով ինչ-որ քայլեր անել, և օրենսդրություն է մշակում։ Բայց ըստ էության, օրենսդրություն մշակելն ու օրենսդրություն կիրառելը տարբեր բաներ են։ Շատ կարևոր է, որ հենց Menu.am-ի նման գործերն ընդունվեն վարույթ, որպեսզի հասկանանք, թե ինչ գործիքակազմով ու ինչ ազդեցությամբ կարող ենք քայլեր ձեռնարկել»,-նշեց նա։

Պիպոյանի խոսքով,  հանձնաժողովը պետք է գնա յուրաքանչյուր բողոքի հետևից՝ կլինի քաղաքացու բողոքը, մամուլի հրապարակումը, թե մեկ այլ տեսքով, դա արդեն հարցի մյուս կողմն է։