Ձեր վստահելի աղբյուրը

«Անհատական մակարդակում այդպիսի դժգոհություններ մենք շատ ենք ստանում, հիմնականում դրանք անձնավորված լուծումներ են ստանում և, ես կարծում եմ՝ ժամանակն է, որ դրանց համակարգային լուծում տանք»,- հայտարարեց  ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանը՝ ներկայացնելով  44-օրյա պատերազմի հետևանքով զոհված զինծառայողների ընտանիքների անդամների և Արցախից տեղահանվածների վարկային խնդիրները:

«Պատիվ ունեմ» խմբակցության պատգամավորի նախաձեռնությամբ ԱԺ-ում հրավիրվել է քննարկում արցախյան վերջին ռազմական գործողությունների հետևանքով զոհված զինծառայողների ընտանիքների անդամների, Արցախից տեղահանվածների համար բանկերի և վարկային կազմակերպությունների կողմից արտոնությունների սահմանման հնարավորությունների վերաբերյալ:

Թագուհի Թովմասյանը գտնում է, որ խնդրին այնպիսի լուծումներ պետք է տալ, որ դրանից չտուժեն մասնավոր բանկերը և միաժամանակ օգտակար լինեն նման խնդիրներ ունեցող ընտանիքներին:

Պատգամավորը տեղեկացրեց, որ տեղահանված արցախցիները ևս ունեն մեծ վարկային պարտավորություններ՝ նկատելով, որ կան դեպքեր, երբ վերջիններս կորցրել են այն գույքը, որը գրավադրել էին, կամ որի համար վարկ էին վերցրել:

Ըստ Թովմասյանի՝ կան օբյեկտիվ պատճառներ այդ վարկային պարտավորությունները չկատարելու համար, բայց նաև պետք է, որ այդ պարտքերը մարվեն:

«Ըստ էության ստացվում է, որ զոհվածների ընտանիքները մնում են բանկային խնդիրների հետ միայնակ»,- նշեց հանձնաժողովի նախագահը և հայտնեց, որ եթե խնդրի լուծման համար օրենսդրական նախաձեռնության կարիք լինի, ապա ինքը կներկայացնի այն:

Քննարկմանը մասնակցող Բանկերի միության գործադիր տնօրեն Սեյրան Սարգսյանը հայտնեց, որ բանկերն ու վարկային կազմակերպությունները 2021 թվականի հուլիսի 30-ի դրությամբ ներել են պատերազմում զոհված և անհետ կորած անձանց, նրանց ընտանիքների 17 հազար 100 անդամների՝ 2.8 մլրդ դրամի չափով վարկային պարտավորությունները: 

Նրա խոսքով՝ զոհված և անհետ կորած անձանց պարտավորությունների ներում է իրականացվել՝ 2400 անձանց մասով՝ 1 մլրդ 948 մլն դրամի չափով, իսկ նրանց ընտանիքի անդամների պարտավորությունների մասով ներվել է 631 մլն դրամ:

«Պատերազմի արդյունքում հաշմանդամություն ձեռք բերած անձանց և նրանց ընտանիքի անդամների պարտավորությունների մասով ներվել է 230 մլն դրամ և ամբողջը կազմում է շուրջ 2.8 մլրդ դրամ, որի 2 մլրդ 252 միլիոնը բանկերի կողմից է ներվել, 557 մլն դրամը՝ վարկային կազմակերպությունների»,-հայտնեց բանկերի միության նախագահը:

«Հայաստան» խմբակցության պատգամավոր Գեղամ Նազարյանը, որի որդին զոհվել է 44-օրյա պատերազմում, իր խոսքում ասաց. «Այնքան տարօրինակ էր ինձ համար, երբ մեր տան անդամներից մեկը բանկերից մեկում ուներ սպառողական վարկ և երբ գնացինք, որ վարկը մուծենք, ասացին, որ մեզ կորոնավիրուսային համակարգի զեղչման համակարգի մեջ կներառեն: Գիտե՞ք այնքան վիրավորական է, որ հայրենիքի համար կյանքը տված մարդու համար չկա ինչ-որ որոշում, և նրան ընդգրկում են կորոնավիրուսային ինչ-որ ծրագրի մեջ»: