ՌԴ-ն և Ղազախստանը հրաժարվել են ԱՊՀ համաձայնագրի շրջանակներում տրամադրել իրենց սահմանները հատած մեքենաների տվյալները
Պաշտպանության և անվտանգության հարցերի մշտական հանձնաժողովի այսօրվա նիստում ընդգրկված է երեք հարց՝ «Ավտոտրանսպորտային միջոցների հափշտակումների դեմ պայքարի և դրանց վերադարձի ապահովման գործում Անկախ պետությունների համագործակցության մասնակից պետությունների համագործակցության մասին» 2005 թվականի նոյեմբերի 25-ի համաձայնագրում փոփոխություններ կատարելու մասին» արձանագրությունը վավերացնելու, «Անկախ պետությունների համագործակցության մասնակից պետությունների զինված ուժերի կապի համատեղ (միավորված) համակարգի մասին» համաձայնագիրը վավերացնելու մասին համաձայնագրերը և «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին նախագիծը:
Ներկայացնելով առաջին նախագիծը՝ Ոստիկանության իրավաբանական վարչության պետ Ռուսլան Մարանդյանը տեղեկացրեց, որ արձանագրության 3-րդ հոդվածի համաձայն՝ այն ուժի մեջ մտնելուց հետո բաց է ԱՊՀ ցանկացած մասնակից պետության միանալու համար։
Նրա խոսքով՝ արձանագրությունը ժամանակավորապես կիրառվում է ստորագրման օրվանից 60 օրը լրանալուց հետո, որը սակայն հակասում է «Միջազգային պայմանագրերի մասին» ՀՀ օրենքին, որով ժամանակավոր կիրառում հնարավոր է միայն համաձայնագրի ընդունումից հետո::
«Արձանագրությանը միանալը կարող է ստեղծել բարենպաստ պայմաններ հափշտակված ավտոտրանսպորտային միջոցները ահաբեկչական, քրեական և այլ հակաօրինական գործողությունների իրականացման նպատակով օգտագործելու դեպքերը նվազեցնելու համար՝ ավտոտրանսպորտային միջոցների հափշտակման հետ կապված հանցագործությունների նախազգուշացման, հայտնաբերման, կանխարգելման և բացահայտման միջոցով»,- ասաց Ռուսլան Մարանդյանը:
Ըստ ոստիկանության վարչության պետի՝ արձանագրությամբ փոփոխություն և լրացում է կատարվում Համաձայնագրի 4-րդ հոդվածում, որի համաձայն՝ ավտոտրանսպորտային միջոցների հափշտակումների կանխման, դրանց հետախուզման և վերադարձման ապահովման նպատակով յուրաքանչյուր կողմ ապահովում է ավտոտրանսպորտային միջոցների մասին տեղեկատվական բազայի ձևավորումը և պահպանությունը:
Ոստիկանության ներկայացուցչի խոսքով՝ տեղեկատվական բազայում պետք է ներառվի նաև հաշվառումից հանված, պետական սահմանը հատող ավտոտրանսպորտային միջոցների, այն ավտոտրանսպորտային միջոցների մասին տեղեկությունները, որոնց վերաբերյալ տեղեկությունները պետական սահմանը հատելիս օրենսդրությանը համապատասխան ենթակա են մուտքագրման մաքսային մարմինների տեղեկատվական բազաներ:
«Տեղեկատվություն է տրամադրվելու նաև այն ավտոտրանսպորտային միջոցների մասին, որոնք վնասվել են այնպիսի ճանապարհատրանսպորտային պատահարի, հրդեհի, տարերային աղետի և այլ հանգամանքների կամ երրորդ անձանց գործողությունների հետևանքով, որպիսիք հանգեցրել են դրանց կոնստրուկտիվ կործանմանը»,- հայտնեց Ռուսլան Մարանդյանը:
Ըստ նրա՝ համաձայնագրով կողմերից յուրաքանչյուրը, օգտագործելով տեղեկատվական տեխնոլոգիաները, ապահովում է այլ կողմի իրավասու մարմինների կողմից վերոնշյալ տեղեկատվական բազաներում առկա տվյալների ստացման հնարավորությունն՝ իրական ժամանակի ռեժիմում, ինչպես նաև սահմանվում են տվյալների բազաներից տեղեկություններ ստանալու հարցմանը ներկայացվող պահանջները, տեղեկատվության տրամադրումը մերժելու հիմքերը:
Ոստիկանության իրավաբանական վարչության պետը հայտնեց, որ ՌԴ-ն և Ղազախստանը համաձայնագիրը ստորագրել են վերապահումով և հրաժարվել են պետական սահմանը հատող տրանսպորտային միջոցների մասին տեղեկությունները տրամադրելուց:
Հանձնաժողովը քվերակությամբ հաստատեց նախագիծը:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ