Ձեր վստահելի աղբյուրը

Ռուսաստանում կարող է առաջանալ սիլիկոնե իմպլանտների դեֆիցիտ, որոնք օգտագործվում են կրծքի մեծացման վիրահատությունների համար: Այս մասին «Գազետա.ռու»-ի հետ զրույցում ասել է վիրաբույժ Գեորգի Չեմյանովը։

Նրա խոսքով՝ Ռուսաստանի դեմ միջազգային պատժամիջոցների սահմանումը կազդի պլաստիկ վիրաբուժության վրա՝ կուրծքը մեծացնելը կդառնա ավելի թանկ։ Ըստ նրա՝ կրծքային իմպլանտների գներն արդեն աճել են, իսկ կլինիկաները բախվել են լոգիստիկայի բարդություններին և արտերկրում արտադրվող արտադրանքի դեֆիցիտին։

«Սպասվում է իմպլանտատների, դրանց տեսակների որոշակի դեֆիցիտ։ Վիրաբույժն այլևս չի կանգնի հարյուրավոր տարբեր ապրանքներից ընտրություն կատարելու խնդրի առաջ, այլ կընտրի հարմար տարբերակներից մեկը, որն առկա է։ Ցավոք սրտի, սա մեզ հետ է տանում 2000-ականների սկզբի զարգացման մակարդակին»,- նշել է վիրաբույժը։

Իմպլանտների դեֆիցիտի հավանականությունը կապված է Ռուսաստանում այդ նյութերի սեփական արտադրության բացակայության հետ։

«Ռուսաստանում առկա բոլոր իմպլանտները արտադրվում են բացառապես արտասահմանում։ Մենք չունենք դրանցից»,- բացատրել է Չեմյանովը։

Նա հավելել է, որ պլաստիկ վիրաբուժության կլինիկաներում այժմ օգտագործվում են նյութեր ԱՄՆ-ից, Հարավային Կորեայից և Չինաստանից։ Թեև դրանց ներմուծման ուղղակի արգելք չկա, լոգիստիկ շղթաների կառուցման հետ կապված դժվարությունները կարող են ազդել Ռուսաստան մատակարարվող ապրանքների քանակի և տեսակների վրա։

Վիրաբույժը նաև հայտնել է, որ պլաստիկ վիրաբուժության պահանջարկը Ռուսաստանում նկատելիորեն աճել է արդեն մարտի սկզբին։ Նման աժիոտաժը նա բացատրել է արժույթի փոխարժեքի բարձրացմամբ և ռուսական շուկայից կրծքի իմպլանտներ արտադրող եվրոպական և ամերիկյան արտադրողների հեռացմամբ։