Ձեր վստահելի աղբյուրը

Ուկրաինան մեղադրել է Վրաստանին, Հայաստանին և Ադրբեջանին՝ պատժամիջոցները շրջանցելու հարցում ՌԴ-ին օգնելու մեջ։  Մեզ (panorama.am) հետաքրքրում է, թե ինչ իրավական, հարևանական, բարոյական իրավունք ունի Ուկրաինան որևէ բանում մեղադրելու Հայաստանին, երբ թուրքադրբեջանական 44 օրյա ագրեսիայի օրերին Ադրբեջանին օդով ու զենքով, խոսքով, գուցեև՝ մարդկանցով է աջակցել։

Այս հարցով դիմեցինք «Պատիվ ունեմ» դաշինքից ԱԺ պատգամավոր Տիգրան Աբրահամյանին, ով, շնորհակալ ենք, քաղաքացիների հետ քաղաքացիական անհնազանդության ակցիաներ է իրականացնում, ասուլիսներ է տալիս՝ ժամանակ գտավ պատասխանալու panorama.am-ի հարցդրմանը։

Տիգրան Աբրահամյան.- Ուկրաինայում ստեղծված ճգնաժամի պայմաններում ու այս իրավիճակում՝ Հայաստանն ստացել է, բնականաբար, և մեծ թվով խնդիրներ, և հնարավորություններ, որոնք պետք է օգտագործի։

Ընդհանուր առմամբ՝ Ուկրաինան պետք է որ Հայաստանից դժգոհելու որևէ շարժառիթ չունենա, հատկապես, երբ նրա բարձրաստիճան պաշտոնյաները, ընդամենը օրեր առաջ, խոսում էին այն մասին, թե՝ լավ կլիներ Հարավային Կովկասում, Արցախի ուղղությամբ երկրորդ ճակատ բացելու մասին։ Այսինքն՝ ակնհայտ հակահայկական հայտարարություններ են արվում, ինչը հետո, որքան հասկանում եմ, փորձեցին որոշակի «փափկեցնել»։

Երկրորդ՝ այս նույն Ուկրանիան Ադրբեջանի հետ անընդհատ ռազմական համագործակցության մեջ է եղել. բավական մեծ թվով հայտարարություններ են եղել, որոնք չեն բխել  Հայաստանի հետ ունեցած հարաբերությունների տրամաբանությունից։

Բայց նույնիսկ այդ պայմաններում Հայաստանը հնարավորինս զերծ է մնացել Ուկրաինայի նկատմամբ թշնամություն, կամ այլ հետևանքներ առաջացնող հայտարարություններից։

Մյուս կողմից՝ Ուկրաինան բավական ծանր վիճակում է, միգուցե բոլոր՝ իր համար հնարավոր բաները փորձում է քննարկել, հնարավորություններ է իր համար ուզում ստեղծել, բայց լավ կանեն, որ Հայաստանին Ուկրաինական ճգնաժամի մեջ չներքաշեն։