Ձեր վստահելի աղբյուրը

Դիետոլոգ Ելենա Սոլոմատինան 60-ից բարձր տարիքի մարդկանց խորհուրդ է տալիս սննդակարգում ներառել վիտամին D, B12 և Օմեգա-3 պարունակող մթերքներ։ Բացի այդ, պետք է ուշադրություն դարձնել բանջարեղենին, մրգերին, կաթնամթերքին, ձավարեղենին, ընկույզին և բուսական յուղերին, ասել է նա «Մոսկվա 24»-ի հետ զրույցում։

Դիետոլոգի խոսքով՝ սննդակարգում պարտադիր պետք է լինեն օմեգա-3 ճարպաթթուներ և վիտամին D պարունակող մթերքներ, քանի որ այդ նյութերը դանդաղեցնում են ճանաչողական խանգարումների զարգացումը։ Բացի այդ, վիտամին D-ն ամրացնում է իմունային համակարգը և պաշտպանում է օստեոպորոզից, ինչը շատ կարևոր է տարեցների համար։

Դիետոլոգը նշել է, որ Օմեգա-3-ը հեռացնում է բորբոքային գործընթացները և օգնում է կանխարգելել հոդերի հետ կապված խնդիրների զարգացումը։ Օմեգա 3 ճարպաթթուներով հարուստ է հատկապես յուղոտ ձուկը։

«Օմեգա-3-ը լավ վիճակում է պահում խոլեստերինի մակարդակը, նպաստում է բարձր խտության խոլեստերինի արտադրությանը և հեռացնում է «վատ» խոլեստերինը: Իսկ դա աթերոսկլերոզի և անոթային խանգարումների կանխարգելումն է՝ ինֆարկտ, ինսուլտ և ծերունական դեմենցիաներ»,- նշում է մասնագետը։

Ի դեպ, խոզի ճարպի մեջ ևս կա օմեգա-3 և վիտամին D, ուստի դիետոլոգը խորհուրդ է տալիս սննդակարգից հանել երշիկներն ու նրբերշիկները և դրանց փոխարեն օգտագործել խոզի ճարպ՝  օրական մեկ անգամ 10-20 գրամի չափով։

60-ից հետո մարդկանց անհրաժեշտ է վիտամին B12: Դրա դեֆիցիտի պատճառով առաջանում են նյարդային համակարգի խանգարումներ՝ երերուն քայլվածք և դանդաղ ռեակցիա, ընդգծում է մասնագետը։ Վիտամին B12 կարելի է ստանալ կենդանական ծագման մթերքներից։

Սննդաբանը խորհուրդ է տալիս ուշադրություն դարձնել նաև մրգերին, բանջարեղենին, հացահատիկային և բուսական յուղերին, որոնք օգտակար են աղիների համար։ «Ծերության ժամանակ պետք է պահպանել աղիների միկրոֆլորան, քանի որ միկրոբիոմի փոփոխությունը նվազեցնում է իմունային համակարգի աշխատանքը, վատթարանում է տրամադրությունը, ստիպում է ավելի շատ քաղցրավենիք ուտել»,- ասում է մասնագետը։

Կաթնամթերքը նույնպես պետք է լինի սննդակարգում։ Ցանկալի է դրանք օգտագործել երեկոյան, քանի որ այս ժամանակ կալցիումն ավելի լավ է ներծծվում։ «Դա կաթնաշոռն է, յոգուրտը, կեֆիրը։ Դրանք պետք չէ ամբողջությամբ յուղազրկված լինեն, 2,5% յուղայնությամբ կաթնամթերքը նորմալ է»,- խորհուրդ է տալիս բժիշկը։

Ձիթապտղի յուղը պետք է ևս լինի սննդակարդում՝ օրական առնվազն մեկ գդալ: «Եղել են ուսումնասիրություններ, որոնք ցույց են տվել, որ ձիթապտղի յուղի երկու շաբաթվա օգտագործումը հանգեցնում է սրտանոթային համակարգի վիճակի զգալի բարելավմանը»,- ընդգծում է դիետոլոգը։

Բացի այդ, ըստ մասնագետի, կարելի է ուշադրություն դարձնել արյունը նոսրացնող միջոցներին, օրինակ, դա կարող է լինել սխտորով և լոլիկով հյութը։

«60 տարեկանից հետո ցանկալի է օրական գոնե մի բուռ ցանկացած ընկույզ ուտել: Ընկույզը շատ արժեքավոր է։ Տարեց մարդը պետք է օրական առնվազն երեք ընկույզ ուտի: Ի դեպ, բրազիլական երկու ընկույզը պարունակում է սելենի օրական անհրաժեշտ չափաբաժինը։ Սելենը օրգանիզմի համար շատ կարևոր միկրոտարր է, այն հզոր հակաօքսիդանտ է», - ասում է մասնագետը։