Մենք կոշտ արձագանքել ենք Ադրբեջանի հակահայկական զեկույցին. ԻԿՕՄ Հայաստանի նախագահ
Թանգարանների միջազգային խորհրդի (ԻԿՕՄ) 26-րդ գլխավոր վեհաժողովի երկու կոմիտեների գիտաժողովի ընթացքում Ադրբեջանի պատվիրակության կողմից զեկույց է ներկայացվել պատերազմների հետևանքով մշակութային ժառանգության ոչնչացման թեմայով, որպես օրինակ ներկայացվել է Արցախը։ Հայկական պատվիրակությունը նախապես իմացել է թշնամի երկրի կողմից նման զեկույցով հանդես գալու մասին, մասնագիտական քննարկումներ ունեցել ՀՀ ԱԳՆ գործընկերների հետ՝ հակադարձելու ադրբեջանակն կեղծիքին։ Ասուլիսիում այս մասին ասաց ԻԿՕՄ Հայաստանի նախագահ Հայկ Մկրտչյանը։
«Իրենք սովորաբար բոլոր հարթակներն օգտագործում են իրենց կեղծ, հիմքերից զուրկ թեզերը ներկայացնելու համար: Ներկայացրեցին իրենց երկիրը որպես հնագույն քաղաքակրթություն։ Հասան Ղարաբաղին, պատմեցին, թե իբր հայերն ավերածություններ են անում, մզկիթներն են ոչնչացնում և այլն, հիմա ստիպված են վերականգնել։
Կոշտ արձագանքեցինք, որ բացահայտ կեղծ, հիմնազուրկ զեկույց է, որևէ ապացույց չկա իրենց ասածներին։ Ներկայացրինք ՅՈՒՆԵՍԿՕ-ի ազգային կոմիտեի կողմից հրապարակված զեկույցն այն մասին, թե վերջին 2 տարիների ընթացքում ինչ է տեղի ունեցել Արցախի տարածքում, որը հիմնված է միջազգային հեղինակավոր պարբերականների, կառույցների հետազոտությունների վրա»,- նշեց Հայկ Մկրտչյանը:
Նա նաև հայտնեց, որ Հայաստանի պատվիրակությունը վրդովմունքի նամակ է փոխանցել պատասխանատուներին՝ ընդգծելով, որ պրոֆեսիոնալ հարթակը չպետք է վերածվի քաղաքականի։
«Նիստից հետո մեզ մոտենում էին, ասում՝ շատ լավ հասկանում ենք ձեզ, գիտենք, բայց զեկուցումը դրվել էր, չէինք կարող մերժել։ Ասացին՝ դուք էլ կարող էիք դնել զեկուցում, մենք ասացինք, որ չէինք ուզում սպորտային ռինգի վերածել։
Մենք փորձել ենք կոշտ, բայց դիվանագիտական ձևով դրան արձագանքել»,- ասաց նա։
ԻԿՕՄ Հայաստանի խորհրդի անդամ Արուսյակ Ղազարյանն ասաց, որ իրենք հարթակն օգտագործում են դիվանագիտական տարբերակով։
«Ամեն անգամ նման վեհաժողովների ժամանակ մենք ներկայացում ենք մեր երկիրը, պատմությունը, մշակույթը։ ԻԿՕՄ-ը միշտ եղել է ոչ քաղաքական, մեր մոտեցումն էլ փորձել ենք ներկայացնել ավելի շատ հենց մշակութային տեսանկյունից, որպեսզի նաև իրենց կողմից խոչընդոտների առջև չկանգնենք»,- նշեց նա։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին