Ձեր վստահելի աղբյուրը

Ներկայումս Վերին Լարսի հետ կապված իրավիճակը կայուն է։ Այս մասին Panorama.am-ի հարցմանն ի պատասխան հայտնում են ՀՀ էկոնոմիկայի նախարարությունից։

Panorama.am-ը պարբերաբար անդրադառնում է վրաց-ռուսական սահմանով՝ Վերին Լարսի անցակետով հայ բեռնափոխադրողներին հանդիպող խոչընդոտներին։ Մեկ ամսից ավելի է արտահանող հայկական ընկերությունների բեռնատարները կանգնած են Լարսի ճանապարհին և չեն կարողանում հատել սահմանը։ Այս անգամ խնդիրը եղանակային վատ պայմանները չեն. Ղրիմի կամրջի վրա տեղի ունեցած պայթունից հետո բեռնատարների նկատմամբ վերահսկողությունը մեծացել է: Այսպիսով, Ռուսաստան հասնելու համար նրանք օրերով սպասում են մաքսային անցակետերում՝ կրելով մեծ վնասներ։

Ավելին, օրեր առաջ մի քանի բեռնատար փչացած ապրանքով վերադարձել էր Հայաստան։

Panorama.am-ը հարցում ուղարկեց ՀՀ էկոնոմիկայի նախարարություն՝ պարզելու, թե պետությունը խնդրի լուծման համար ի՞նչ քայլեր է իրականացնում, բազմաթիվ արտահանողների, տնտեսվարողների սնանկացման տանող այս խնդիրն արդյոք քննարկվո՞ւմ է գործադիրում, եթե այո, ապա ո՞վ է ստեղծված իրավիճակի պատասխանատուն, կա՞ հաշվարկ, թե ի՞նչ վնասներ են կրել հայաստանցի տնտեսվարողները ստեղծված իրավիճակի հետևանքով, քննարկվո՞ւմ է նրանց որևէ կերպ աջակցելու, փոխհատուցելու հարցը։

Էկոնոմիկայի նախարարությունից նախ հիշեցրեցին, որ Վերին Լարսի անցակետում բեռնատարների կուտակումների հետ կապված խնդիրը ծագել է Ղրիմի կամրջի պայթյունից հետո, և ռուսական կողմը խստացրել է վերահսկողությունը բոլոր բեռնատարների  նկատմամբ՝ անվտանգության խնդիրներից ելնելով։

«Ներկայումս Վերին Լարսի հետ կապված իրավիճակը կայուն է։ ՀՀ էկոնոմիկայի նախարարությունը հետևում է թողունակությանը, ինչպես նաև առաջացող խնդիրներին։ Նախարարությունը նաև օպերատիվ աշխատում է ինչպես ռուսական, այնպես էլ վրացական կողմի գործընկերների հետ, որպեսզի հնարավորինս կարճ ժամկետում խնդիրը լուծվի։ 

Վերին Լարսի անցակետով Ռուսաստանի Դաշնություն մուտք գործող հայկական բեռնատարների կուտակումները, որոնք առաջացել են Ռուսաստանի Դաշնության համապատասխան ծառայությունների կողմից բեռնատարների և ավտոմեքենաների խստացված զննման գործընթաց սկսելուց հետո, նվազում են, քանի որ Լարսի անցակետի թողունակությունը վերականգնվել է։

Ղրիմի կամրջի պայթյունի դեպքից հետո Հայաստանից դուրս եկած և Ռուսաստան մտած մեքենաների տարբերությունը կազմում է մոտ 1600 մեքենա, այսինքն, այս պահին, հայկական բեռներով բարձված մոտ 1600 մեքենա կա Վրաստանի տարածքում:

Տեղեկացնում ենք նաև, որ Լարսի անցակետի այսօրվա թողունակությունը հայկական բեռներով մեքենաների վրա նույնն է, ինչ-որ եղել է մինչև նշված դեպքը։ Թողունակության ծավալը օրական կազմում է մոտավորապես 160-170 մեքենա»,- հայտնում են էկոնոմիկայի նախարարությունից։

Նաև հետարքրվել էինք՝ որպես Լարսի ցամաքային ճանապարհին այլընտրանք, կառավարությունը պարբերաբար խոսում է լաստանավի գործարկման մասին, սակայն դա այդպես էլ չի իրականանում, ի վերջո երբ է այն գործարկվելու։

Ինչպես սպասվում էր, նախարարությունում այս հարցի վերաբերյալ հստակ պատասխան չունեն, ավելի ճիշտ՝ ունեն, բայց մեղքն իրենցը չէ՝ բոլորը մեղավոր են բացի իրենցից։

Այսպիսով, պատասխանից հասկանում ենք, որ նախարարությունը չգիտի՝ երբ կգործարկվի լաստանավը։

«Լաստանավի գործարկման ժամկետների ձգձգումը մեծապես պայմանավորված է Ռուսաստանի Դաշնության դեմ սահմանված պատժամիջոցներով։ Առաջացած բարդությունները հաղթահարելու և Հայաստանի Հանրապետության տարածքից արտահանման և (կամ) Հայաստանի Հանրապետության տարածք ներմուծման նպատակով բեռների՝ լաստանավով (լաստանավերով) տեղափոխման դեպքում առաջացած լրացուցիչ ծախսերի նվազեցմանն ուղղված միջոցառումը հնարավորինս արագ գործարկելու նպատակով շարունակվում են անհրաժեշտ աշխատանքները»,- հայտնում են նախարարությունից։