Ձեր վստահելի աղբյուրը

ՀՀ վիճակագրական կոմիտեի հրապարակած տվյալների համաձայն՝ 2022 թվականի հունվար-դեկտեմբերին 2021 թվականի նույն ժամանակահատվածի համեմատ տնտեսական ակտիվության ցուցանիշն աճել է 14.2%-ով։ 

Վիճակագրական կոմիտեի տվյալները փաստում են, որ աճին շարունակում են ամենաշատը նպաստել առևտրի ու ծառայությունների ոլորտը։ Մասնավորապես, առևտրաշրջանառությունը 2022 թ-ի հունվար-դեկտեմբերի 2021-ի համեմատ աճել է 17%-ով, իսկ ծառայությունների ոլորտը՝ 28.2%-ով։

Արդյունաբերական արտադրանքի ծավալն էլ հունվար-դեկտեմբերին աճել է 7.8%-ով,  էլեկտրաէներգիայի արտադրությունը՝ 16.1%-ով, շինարարության ոլորտում էլ գրանցվել է 12.5%-ի աճ:

Գյուղատնտեսության համախառն արտադրանքի ծավալն էլ նախորդ տարվա 12 ամիսներին ավելացել է 0.4%-ով։

Սպառողական գներն էլ, ըստ վիճակագրության` հունվար-դեկտեմբերին աճել են 8.6%-ով, իսկ ամսական կտրվածքով՝ նոյեմբերի համեմատ գրանցվել է 1,1%-ի աճ: Արդյունաբերական արտադրանքի գների ինդեքսն էլ աճել է 2.6%-ով:

Ըստ վիճակագրական կոմիտեի` 2022 թվականին Հայաստանն արտաքին աշխարհի հետ իրականացրել է 14 մլրդ 128.8 մլն ԱՄՆ դոլարի առևտուր, ինչը 2021 թվականի համեմատ աճել է 68.6%-ով:

Հաշվետու ժամանակահատվածում արտաքին առևտրի ընդհանուր ծավալում արտահանումը կազմել է 5 մլրդ 360.1 մլն դոլար՝ 2021թ-ի համեմատ աճելով 77.7%-ով, իսկ ներմուծումը կազմել է 8 մլրդ 768.7 մլն դոլար՝ աճելով 63.5%-ով: