Ձեր վստահելի աղբյուրը

«Հայաստանի Ազգային ժողովի պատգամավոր եմ ընտրվել Հայաստանի քաղաքացիների կողմից,  մի քաղաքական թիմի կազմում եմ, որի առաջնային խնդիրը Հայաստանի պետական շահերի սպասարկումն է։ Իրականցնում եմ իմ աշխատանքը, սպասարկում եմ ՀՀ  պետական շահերը, պաշտպանում Հայաստանի ժողովրդի շահերը»,- Ազգային ժողովում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Գուրգեն Արսենյանը՝ պատասխանելով օրեր առաջ իր արած հայտարարարության վերաբերյալ հարցերին։

Հիշեցնենք, որ փետրվարի 3-ին ԱԺ լսումների ժամանակ նա մասնավորապես ասել էր. «Ինչ-որ բան երևի մոռացել եք իրականությունից, մոռացել եք,  թե հայ-ադրբեջանական հարաբերությունների զարգացումն ինչի բերեց,  ինչի առջև ենք մենք կանգնած՝  Հայաստանի Հանրապետությունն ու Հայաստանի  ժողովուրդը։ Անընդհատ Ղարաբաղի 120 հազար  բնակիչներ... 3 միլիոն Հայաստանի բնակիչներ։ Պատասխանատու ենք մենք այդ  մարդկանց համար, մեր երկրի համար»։

Լրագրողի հարցին՝ պատր՞աստ է կրկել իր այդ նույն հայտարարությունը, որը մեծ քննադատության արժանացավ, Արսենյանը պատասխանեց. «Ես շարունակում եմ պնդել, որ Հայաստանը 3 միլիոն բնակիչ ունի, շարունակում եմ պնդել, որ  իմ համար առաջնայինը Հայաստանի պետական շահերի սպասարկումն է։
Արցախի 120 հազար ժողովորդը, որը շրջափակված է, մտնում է Հայաստանի պետական շահերի սպասարկման կոմպլեքսի մեջ»։

Դիտարկմանը՝ կարծեք խմբագրում է նախկինում իր ասածը, ՔՊ-ական պատգամավորն ասաց. «Ես կրկնում եմ, որ Հայաստանի Հանրապետությունը Հայաստանի Հանրապետության քաղաքացիների պետությունն է, այն մարդկանց, ովքեր ապրում են Հայաստանում, հարկեր են վճարում Հայաստանում, ծառայում են ՀՀ բանակում, ունեն ՀՀ Սահմանադրությամբ նշված իրավունքներն ու պարտականությունները։ Դա աքսիոմա է»։

Նա ընդգծեց, որ իր արած ոչ մի հայտարության համար երբեք չի ափսոսացել, այլապես հերքումով հանդես կգար։

«Սա քաղաքական հստակ դիրքորոշում է. ես պաշտպանել, պաշտպանում եմ և պաշտպանելու եմ ՀՀ պետական շահերը որպես ՀՀ բնակչության կողմից ընտված ԱԺ պատգամավոր։
Կա պետական և ազգային շահեր, ես  պետական շահերով զբաղվող անձնավորություն եմ, ազգային շահերի սպասարկումն այլ տիպի գործիչների մասնագիտական ունակությունների դաշտում է։ Ես պաշտպանում եմ ՀՀ պետական շահը»,- ասաց նա՝ հավելելով, որ իր գործընկերներից որևէ մեկի կողմից քննադատություն չի լսել իր արած հայտարարությունների վերաբերյալ։

Հարցին՝ պատրա՞ստ է էթիկայի հանձնաժողովում բոլոր հարցերին պատասխանել, Գ. Արսենյանը պատասխանեց. «Եթե էթիկայի հանձնաժողովը կգտնի, որ Գուրգեն Արսենյանը  էթիկայի հանձնաժողովում բացատրություններ տալու, իր հայտարարությունների վերաբերյալ մեկնաբանություններ տալու կարիք կա, ես երբեք չեմ խուսափել շարադրել իմ մտքերը»: