Ձեր վստահելի աղբյուրը

Մեծ Բրիտանիայի նախկին վարչապետ Լիզ Թրասին 2022 թվականի համար 12 հազար ֆունտ ստեռլինգ արժողությամբ հաշիվ են ներկայացրել՝ սննդի և խմիչքի, ինչպես նաև խալաթների և հողաթափերի ծախսերը հոգալու համար, որոնք ենթադրաբար անհետացել էին նրա պաշտոնական նստավայրից՝ Չիվնինգ-հաուսից, երբ նա արտաքին գործերի նախարար էր։ «Ռիա Նովոստի»-ի փոխանցմամբ, այս մասին գրում է Times-ը՝ վկայակոչելով անանուն աղբյուրին:

Թերթի համաձայն՝ նախարարների գրասենյակը Թրասին ուղարկել է Չիվնինգ Մանորում նրա բնակության ծախսերի հաշիվ-ապրանքագիրը, որտեղ նա հյուրեր է ընդունել 2022 թվականին Մեծ Բրիտանիայի Պահպանողական կուսակցության ընտրությունների քարոզարշավի ժամանակ:

«Պաշտոնյաները կապ են հաստատել Թրասսի հետ և հասկացրել, որ նա պետք է վճարի իր պաշտոնավարման ընթացքում անհետացած իրերի, ինչպես նաև սննդի և գինու համար, որը նա և իր օգնականներն օգտագործում էին այնտեղ։ Նրանք նաև հայտնել են, որ այդ ժամանակահատվածում անհետացել են նաև սրբիչներ, խալաթներ ու նույնիսկ հողաթափեր, և նրան խնդրել են վճարել»,- ասել է անանուն աղբյուրը։

Թերթի տվյալներով՝ բրիտանական կառավարությունը վճարում է միայն նստավայրում պաշտոնական միջոցառումների համար, իսկ անձնական հյուրերին հյուրասիրելու կամ կուսակցական հանդիպումներ անցկացնելու ծախսերի համար չի վճարում։

Ինչպես Times-ին ասել է քաղաքական գործչի ներկայացուցիչը, Թրասը նախատեսում է վիճարկել այդ որոշումը, քանի որ այն կարող է պարունակել ինչպես անձնական, այնպես էլ պաշտոնական ծախսեր: