Ձեր վստահելի աղբյուրը

Եվրասիական միությունն ու Իրանը ավարտել են ազատ առևտրի մասին համաձայնագրի նախագծի շուրջ հիմնական քննարկումները: Այս մասին Sputnik միջազգային մուլտիմեդիոն կենտրոնում տեսակամուրջի ժամանակ հայտարարել է Եվրասիական տնտեսական հանձնաժողովի (ԵԱՏՄ գործադիր մարմին.) առևտրի նախարար Անդրեյ Սլեպնյովը, գրում է ParsToday-ը։

Ազատ առևտրի մասին Ժամանակավոր համաձայնագիրը (սահմանափակ թվով ապրանքների համար մաքսատուրքերի իջեցում երեք տարի ժամկետով) ուժի մեջ էր մտել 2019 թվականի հոկտեմբերին։ Դրանից հետո սկսվել են մշտական հիմունքներով համաձայնագրի շուրջ բանակցությունները։ Կողմերն ավարտել են ըստ էության քննարկումները և հղկում են ապագա փաստաթղթի մանրամասները։ Սլեպնյովը նշեց, որ մայիսին կավարտվի նաև աշխատանքի այս փուլը, իսկ հունիսի սկզբին նախատեսվում է համաձայնագրի նախագծի մասին զեկուցել ԵԱՏՄ երկրների վարչապետներին Սոչիում Միության միջկառավարական խորհրդի նիստի ընթացքում:

Դրանից հետո կանցկացվեն ստորագրման նախապատրաստման ֆորմալ ընթացակարգերը, և մեծ է հավանականությունը, որ այն կստորագրվի ոչ այնքան հեռավոր ապագայում, նշեց ԵՏՀ նախարարը։

Իրանն իր շուկայում բարձր արգելքներ է պահպանում օտարերկրյա ապրանքների դեմ։ Դրա ֆոնին իրանցի գործընկերները ԵԱՏՄ երկրներին մուտքի աննախադեպ պայմաններ են տալիս, նկատել է Սլեպնյովը։ Նույնիսկ ներկայիս ձևաչափով սահմանափակված համաձայնագիրը հանգեցրել է ԵԱՏՄ-Իրան առևտրի ծավալների գրեթե կրկնապատկմանը։ Ներկայումս այն կազմում է մոտ 6 մլրդ դոլար, իսկ լիաֆորմատ համաձայնագրի դեպքում 5-7 տարում կարող է աճել մինչև 20 մլրդ դոլար։

Խոսելով այլ երկրների հետ համանման համաձայնագրերի նախագծերի մասին ԵՏՀ նախարարը նշել է, որ այստեղ մեծ աշխատանք է սպասվում այնպիսի խոշոր գործընկերների հետ, ինչպիսիք են Ինդոնեզիան, Հնդկաստանը, Արաբական Էմիրությունները և Եգիպտոսը: Ինդոնեզիայի հետ պայմանավորվածություն է ձեռք բերվել աշխատել «կանաչ միջանցքի» ռեժիմով, այսինքն հնարավորինս օպերատիվ։ Նմանատիպ պայմանավորվածություն կա նաև Էմիրությունների հետ։

Ինչ վերաբերում է Եգիպտոսին, ապա հաջորդ շաբաթ նախատեսված է ԵԱՏՄ՝ առևտրի բլոկի ղեկավարների հանդիպումը Եգիպտոսի արդյունաբերության և առևտրի նախարար Ահմեդ Սալեհի հետ: Այդ հանդիպման արդյունքներով կոնկրետ ծրագիր կհստակեցվի, որը թույլ կտա բանակցություններն ավարտել ընթացիկ տարում։

Ինչ վերաբերում է Հնդկաստանին, ապա, դատելով երկու կողմերի կառավարությունների ցուցաբերած նշաններից, բանակցություններն այս տարի ակտիվ փուլ կմտնեն։