Գարիկը փոխանցել է՝ չկոտրվեք. Աստղ Գալեյան
Արցախյան երրորդ պատերազմում զոհված Մխիթար Գալեյանի հայրը՝ Գարիկ Գալեյանը չի ընդունում մեղադրանքը։ Այս մասին Ընդհանուր իրավասության Շենգավիթի նստավայրի դիմաց լրագրողների հետ զրույցում ասաց նրա կինը՝ Աստղ Գալեյանը։
Ձերբակալությունից ի վեր նա չի հանդիպել ամուսնուն։ Գ. Գալեյանին անհրաժեշտ իրեր, սնունդ փոխանցել են ընկերները, տեսակցել են պատգամավորները։
«Փոխանցել է՝ լավ եմ, դուք չկոտրվեք»,-ասաց նա։
Հերոսի մայրը պատմեց, երեկ իրենց տունը խուզարկել են։ Ինքն այդ պահին եղել է ոստիկանության քաղաքային վարչությունում, զանգել է տատիկն ու ասել. «Դուռը ծեծում են»։
«Չեմ հասկանում, հանգիստ դուռը ծեծել չկա՞, քնած տեղից երեխան վեր է թռել։ Բարձրախոսը խնդրել եմ, միացրել է, ասել եմ՝ սպասեն, մինչև հասնեմ տուն։ Մտել են, ստուգել են, ըտենց տեղ չկա, որ չեն նայել՝ երեխու օրորոցը, մանեժը, ավտոտնակը»,-ասաց տիկին Գալեյանը։
Նրա խոսքով, ամուսնու նկատմամբ հետապնդումը պայմանավորված է իրենց ակտիվությամբ։
«Նպատակ ունեն մեզ կոտրել, երևի քիչ ենք՝ կոտրված։ Ողնաշարս կոտրել են, հիմա էլ գլուխս են ուզում կոտրել»,-ասաց Աստղ Գալեյանը։
ՔԿ-ից ավելի վաղ հայտնել են, որ թմրամիջոց ապօրինի ձեռք բերելու, պահելու և իրացնելու անմիջականորեն ծագած հիմնավոր կասկածի հիմքով Երևան քաղաքի Վարդանանց փողոցից ոստիկանության ծառայողների կողմից ձերբակալվել է Գարիկ Գալեյանը։ Վերջինս իր կողմից վարած «Տոյոտա Քեմրի» մակնիշի ավտոմեքենայով տեղափոխվել է ոստիկանության բաժին:
Գ. Գալեյանի անձնական խուզարկությամբ վերջինիս մոտ հայտնաբերվել և վերցվել է պոլիէթիլենային տոպրակ, որի մեջ առկա է եղել 3 միանման պոլիէթիլենային փաթեթ՝ համապատասխանաբար 1.59 գրամ, 1.51 գրամ և 1.60 գրամ ընդհանուր քաշերով «Մարիխուանա» տեսակի թմրամիջոցի նմանվող յուրահատուկ հոտով դեղնականաչավուն զանգվածներով:
«Վարույթն իրականացնող մարմնի կողմից միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց ընտրելու վերաբերյալ՝ հաշվի առնելով նաև այն հանգամանքը, որ նա խախտել է ազատության մեջ մնալու պայմանը»,-նշել են ՔԿ-ից։
Այս պահին դատարանը քննում է նրան կալանավորելու միջնորդությունը։
Հարակից հրապարակումներ`
- Սա քաղաքական հետապնդում է․ Արա Ռոստոմյանը՝ Գարիկ Գալեյանի ձերբակալության մասին
- Գալեյանի ձերբակալությունը ևս ցույց տվեց, որ իշխանությունն այլանդակության իրականացնելիս որևէ բանի առաջ կանգ չի առնում. Պատգամավոր
- Սեպտեմբերի 9-ին, ժամը 11:00-ին՝ Շենգավիթի դատարանի մոտ մեր ներկայությամբ աջակցենք հերոս Մխիթար Գալեյանի ընտանիքին. Գառնիկ Դանիելյան
- Զոհված զինծառայողի հորը՝ Գարիկ Գալեյանին, կալանավորելու միջնորդություն է ներկայացվել
- Գարիկ Գալեյանի տան խուզարկությունն ավարտվել է