Մեղք եք, ժողովուրդ. Սաթիկ Սեյրանյանը՝ Ալեն Սիմոնյանին
«Ես ցավում եմ, որ պետական ինստիտուտներն այդպես մսխվում են ոչ միայն ֆինանսապես, այլև մասնագիտական, մարդկային առումներով։ Ի դեմս Ալեն Սիմոնյանի, ես նրա խոսնակին չեմ պատասխանելու, որովհետև նրա գործունեությանը մամուլում բավականչափ ծանոթ եմ, կարող եմ ասել, մեղք եք, ժողովուրդ։ Բայց ավելի ցավում եմ մեր երկրի համար»,-այսպես արձագանքեց 168.am-ի խմբագիր, Ժուռնալիստների միության նախագահ Սաթիկ Սեյրանյանը՝ արձագանքելով ԱԺ նախագահի պաշտոնը զբաղեցնող Ալեն Սիմոնյանի խոսնակի հրապարակած գրառմանը։
Նշենք, որ Ծովինար Խաչատրյանն արձագանքել է հասարակական-քաղաքական գործիչ Էդգար Ղազարյանի «Ոսկե հորթ» խորագրով հաղորդմանը, որտեղ Ղազարյանը մեղադրանքներ է հնչեցնում Ալեն Սիմոնյանի հասցեին։
«Նրանք անտեսել են բոլոր աղաղակող փաստերը, որոնք հրապարակված են եղել մամուլում, բազմաթիվ լրատվամիջոցներում, Էդգար Ղազարյանը հղումները տվել է դրանց, և կենտրոնացել են այն բանի վրա, որ անոնսի լուսանկարը տեխնիկական պատճառներով հայտնվել է Ժուռնալիստների միության ֆեյսբուքյան էջում։ Ցավում եմ, բայց հույս ունեմ, որ աղաղակող, կոռուպցիոն դեպքերի մասին դեռ հրապարակումներ կլինեն, քրեաիրավական գնահատականներ կտրվեն»,-ասաց Սաթիկ Սեյրանյանը։
Ժուռնալիստների միության նախագահը հիշեցրեց՝ ինքը 90-ականներից, նաև դրանից առաջ եղել է մամուլում։
«Անքան հին եմ, որ եթե մի բան հրապարակում եմ, թող իմանան, որ իմ ձեռքին հինգ այլ փաստեր ունեմ։ Իրենք փոխարեն կենտրոնանան և պատասխան տան այդ աղաղակող փաստերի, կոռուպցիոն երևույթների, դեպքերի մասին, որ ոչնչից դարձել են միլիոնատերեր տառացիորեն, կենտրոնացել են ինչ-որ բաների վրա։ Վա՜յ, լուսանկարը հայտնվեց Ժուռնալիստների միության ֆեյսբուքյան էջում։ Պահակ են կանգնել, պահակ են աշխատում, հուսամ՝ դրա համար էլ պետական բյուջեից աշխատավարձ չեն ստանում։ Մեղք են ուղղակի։ Բայց ավելի շատ ափսոսում եմ երկրիս համար, որ այդպիսաի մարդիկ են աշխատում պետական կառավարման համակարգում ու մասնավորապես օրենսդիր մարմնում»,-ասաց Ս. Սեյրանյանը։
Մանրամասնենք. վաղը՝ դեկտեմբերի 13-ին ժամը 12։00-ին Արարատի և Վայոց ձորի մարզերի առաջին ատյանի ընդհանուր իրավասության դատարանի Վեդի քաղաքում գտնվող նստավայրում դատավոր Գևորգ Բալյանի նախագահությամբ տեղի է ունենալու քաղաքացիական գործով դատական առաջին նիստը, որտեղ կքննարկվի Ազգային ժողովի նախագահ Ալեն Սիմոնյանի հայցն ընդդեմ Էդգար Ֆերդինանդի Ղազարյանի։
Դատական նիստին պատրաստվելիս Էդգար Ղազարյանը տվյալներ է հավաքել։ Այդ ամենը նա ներկայացրել է STAND UP ոճում՝ «ՈՍԿԵ ՀՈՐԹԸ» խորագրով տեսանյութում, որի շահառուներն է համարում դատարանը, իրավապահ մարմինները ու լայն հանրությունը։
«Ադրբեջանաթուրքական հեղափոխությունից հետո միանգամից փոխվում է Ալեն Սիմոնյանի կյանքը»,-նշում է Ղազարյանը տեսանյութում։
Ի պատասխան այս տեսանյութի Ալեն Սիմոնյանի մամուլի խոսնակը գրել է.
«Առհասարակ անգրագետ սլայդ-շոուները մեկնաբանելն անպտուղ գործ է, հանդիպումը՝ դատարանում։
Ի պատասխան այն հարցին, թե ինչպես ենք մեկնաբանում Էդգար Ղազարյանի մենախոսությունն Ալեն Սիմոնյանի վերաբերյալ, նշեմ, որ առհասարակ անգրագետ սլայդ-շոուները մեկնաբանելը համարում եմ անպտուղ գործ։ Մանավանդ, որ շուտով դատական հայց է ներկայացվելու բազմիցս հերքված և հնչած անհիմն մեղադրանքների առնչությամբ:
Բայց մի բան չվրիպեց տեսադաշտից։ Տվյալ սլայդ-շոուն եթեր է հեռարձակվել 168.am կայքի յութուբյան ալիքով, ինչից կարելի էր հետևություն անել ընդամենը, որ կայքի գլխավոր խմբագիրը կա՛մ Էդգար Ղազարյանի համակիրն է, կա՛մ, օրինակ, պրոդյուսերը։ Երևի պրոդյուսերի վարկածն առերևույթ առավել արժանահավատ է, քանի որ կայքի գլխավոր խմբագիրը համատեղությամբ նաև Հայաստանի ժուռնալիստների միության նախագահն է։ Եվ ահա, օգտվելով նախագահ լինելու հանգամանքից, կայքի գլխավոր խմբագիրը որոշում է Էդգար Ղազարյանի սլայդ-շոուի վերաբերյալ անոնս տեղադրել նաև Ժուռնալիստների միության էջում՝ ՇՈՒՏՈՎ գրառմամբ։ Անհասկանալի է սեփական բիզնեսը Ժուռնալիստների միության էջով գովազդելու միտումը, քանի որ, ինչպես ցույց տվեց իրադարձությունների զարգացումը, անգամ Ժուռնալիստների միության էջով տեղադրած անոնսը չաշխատեց շատ քիչ դիտում արձանագրած սլայդ-շոուի համար։
Ուստի տարակուսելի է, թե ինչպես են Ժուռնալիստների միության անդամները թույլատրում իրենց համքարությանը պատկանող էջով միության նախագահի բիզնեսին նպաստող անոնսի տեղադրումը։ Դժվար է հավատալ, որ, օրինակ, միության մյուս անդամները ևս ունեն այդ հնարավորությունը՝ իրենց կայքերի դիտումներն ավելացնելու համար նյութերը կիսվել միության էջով։ Ինչևէ, Հայաստանի ժուռնալիստների միությունը փաստացի մնացել է 2017-2019 թթ. միջակայքում։ Բանն այն է, որ իրենց կայքի տվյալների համաձայն՝ դեռ վարչության անդամներ են այն անձինք, որոնք մասնավոր զրույցներում նշեցին, որ վաղուց ոչ մի կապ չունեն միության հետ։
Ըստ տրամաբանության՝ ամենաօպերատիվ թարմացվող կայքը պետք է լիներ Ժուռնալիստների միության կայքը, ինչն այդպես չէ, իսկ թե ինչու, արդեն մեր հետաքրքրության ոլորտից դուրս է։ Ի դեպ, մեկ օրից ավելի Ժուռնալիստների միության ֆեյսբուքյան էջում սլայդ-շոուի վերաբերյալ անոնսը երեկ օրվա երկրորդ կեսին այլևս չկար։ Լրագրողների իրավունքները պաշտպանելու առաքելություն ունեցող, փաստացի անփույթ գործող կառույցը չենք զարմանա, եթե անդամագրած լինի մասնագիտությամբ ոչ լրագրող Էդգար Ղազարյանին, հենց թեկուզ նրա համար, որ լրագրող բառն արտաբերում է երկու ռ-ով՝ լՌՌագրող»։
Լրահոս
Տեսանյութեր
Ի՞նչ կա մեքենայի մեջ. Կիրանցում ծակեցին մեքենայի անվանդողերը
