Ուղեվարձերի թանկացումն անխուսափելիորեն շատ վատ էկոլոգիական վիճակ է ստեղծելու Երևանում. Սիլվա Ադամյան
Երևանի քաղաքապետարանը միասնական տոմսային համակարգի լրամշակված նախագծով առաջարկում է սահմանել ուղեվարձի քարտեր՝ 30 օրվա համար 8800 դրամ, 90 օրվա համար 23600 դրամ, 365 օրվա համար 88000 դրամ ուղեվարձ։ Վերոնշյալ սահմանաչափով ուղեվարձը 100 դրամից թանկանալու է մինչև 200-300 դրամ՝ ըստ օգտվելու հաճախականությունից։ Փարձագետներն ահազանգում են, որ այն բացի սոցիալական վատ հետևանքներից՝ ունենալու է նաև նեգատիվ բնապահպանական հետևանք։
Խնդրի շուրջ Panorama.am-ը զրուցեց «Էկոլոգիական հասարակական միություն» ՀԿ նախագահ, բնապահպան Սիլվա Ադամյանի հետ։
«Հանրային տրանսպորտի ուղեվարձերի թանկացման մասին իմանալուց, առաջինն ինչ մտածել եմ, այն է, որ մարդիկ չեն ուզենա տրանսպորտի համար վճարել այդպիսի գումարներ։ Ինչքան հասկացա, այն տարեկան 90 հազար դրամին մոտ գումար է։ Դեռ վերջնական չգիտենք, թե ինչ գին կլինի, քաղաքապետարանը և ավագանին պետք է որոշում կայացնեն։
Առաջինը, ինչ մտքիս եկավ այն է, որ մենք չենք կարող խուսափել նրանից, որ մարդիկ, ովքեր կուզենան երթևեկել, ընդհանրապես աշխատանքի գնալ, և այն մարդիկ ովքեր դեռ չունեն ավտոմեքենա, անպայման կփորձեն այն ձեռք բերել և երթևեկել ավելի շուտ դրանցով։ Եթե մենք նայում ենք՝ բնապահպանական խնդիրների տեսանկյունից, էլ չեմ խոսում սոցիալական խնդիրների մասին, սա շատ վտանգավոր որոշում է և քաղաքապետարանը պետք է հասկանա, որ շատ մարդիկ ուղղակիորեն կհրաժարվեն հասարակական տրանսպորտից։ Սա առաջին։
Երկրորդ՝ մեքն գիտենք, որ մեր ժողովրդի սոցիալական վիճակը բավականին վատ է, ոչ բարենպաս՝ ինչպեա ԱՄՆ-ում կամ Եվրոպական երկրներում է, և նրանք գնելուց գնում են հին մեքենաներ, հին տեխնիկական հնարավորություններով։ Այո գնալու են 3-4 հազար, նույնիսկ 2 հազար դոլար վճարեն և գնեն շատ վատ տեխնիկական հնարավորություններով հին մեքենաներ և դրանցով սկսելու են երթևեկել։ Սա ուղղակի անխուսափելի է։
Առանց այն է մենք գիտենք, և արդեն տվյալներ են հրապարակվում, որ բավականին բարձր է Երևանի աղտոտվածությունը, փոշու հետ կապված՝ մի քանի անգամ, և ավտոմեքենաների արտանետումների հետ կապված, սա բավականին լուրջ վտանգ է մեր քաղաքի համար, որովհետև առանց դրան էլ քաղաքն ապրում է ծանր էկոլոգիական կրիզիս։
Գնում է անկառավարելի շինարարություն, այսօր սոցիալական ցանցերով ցույց են տվել, թե ինչպես է դրանից փոշին տարածվում քաղաքով մեկ։ Ոչ մի միջոց չի ձեռնարկվում, որպեսզի այն չկատարվի։
Երկրորդ տեղում է ավտոմեքենաների արտանետումները, որոնք կարող են գալ առաջին տեղ, ինչն անխուսափելի է։
Առաջինն ինչ մտածել եմ, երբ իմացել եմ, որ հասարակական տրանսպորտի ուղեվարձը հնարավոր է այդ գնին լինի, այն է, որ շատ ավելի ճիշտ կլինի, որ ես երթևեկեմ կա՛մ սեփական մեքենաներով, կա՛մ տաքսիներով։ Ասեմ, որ տաքսիների քանակն էլ կավելանա, որովհետև իրականում մարդիկ կփորձեն նաև տաքսիներով երթևեկել։ Ոչ մեկը չի ցանկանա նման գումար տա և խցկված, թեկուզ առանց խցկվել մի կանգառից մյուսը գնալ։ Իր մեքենայով որտեղ ուզի կգնա, կկանգնի, իր ընտանիքին երեխաներին էլ կտանի։ Նույնը նաև տաքսիների դեպում՝ կսկսեն դրանով երթևեկել, սա անխուսափելի է, ժամանակը ցույց կտա և կտեսնենք, որ կկանգնենք արդեն լուրջ էկոլոգիական խնդրի առաջ։
Էլի եմ կրկնում, հին տեխնիկական միջոցներով մեքենաներ են գնվելու։ Այնպես չէ, որ մեր քաղաքացին հնարավորություն ունի էլեկտրոմոբիլներ գնելու և մեր երկիրն էլ էն երկիրը չէ, որ բանկային համակարգի միջոցով 30-40 տարով պայմանագիր կնքի քաղաքացու հետ՝ քաղաքացիներին տրամադիր վարկեր, որի միջոցով նրանք գնեն փոքր էլեկտրամոբիլ և դրանով երթևեկի քաղաքում։ Անխուսափելի շատ վատ էկոլոգիական վիճակ է ստեղծվելու։ Սա պետք է գիտակցի և քաղաքապետարանը և ավագանին և ընդհանրապես կառավարությունը, որը նման որոշումներ է ընդունում։ Սա պետք է անպայման բարձրաձայնվի։ Կան նաև այլ բնապահպանական խնդիրներ, որոնց մասին չեմ ուզում բարձրաձայնել հիմա»,-ասաց Սիլվա Ադամյանը։
Հարցազրույցն ամբողջությամբ՝ կից տեսաձայնագրությունում։
Լրահոս
Տեսանյութեր
«Ձեր սիրելի Ալիևը «Նոլդու Փաշինյան» երգը միացրած Արցախով պտտվում է». Բագրատ Սրբազանը՝ իշխանությանը
